Ma·ama: Nigiparangni Review

 

Indiani dingtang dingtang bakrango aro gipin a·songrango mesokani ja·mano Dominic M Sangmani tarigipa Ma·ama jawilwatko re·anggipa October 18 aro 19 tarikrango Turaoba 22x10ft dal·gipa screeno mesokako nitokaha. 18 tarikni attamgro 2 baji aro attamni 6 bajio aro 19 tarikni pring 11baji, attamgro 2 bajio District Auditoriumona bang·a manderang re·bae nitokaha, aro 19ni attam 5 bajiode auditoriumon biap chakjapilaha. Aiao inmananiara, nigiparang giljao asongenga gita dakpile, jrip jrip, namen gisik nange nitokaha; maina ia jawilwatko name chanchie nijaode miksonganikon u·ijawachim! Garorangsan ong·ja, gipin jatrangba ia jawilwat mesokako nina re·batokaha.

Ma·ama filmko u·ina altubea ong·ja: filmni miksongani aro ning·tuaniko u·ina kraa gitan u·i-ma·siani gnanggipa ong·na nanga. Uni gimin saoba saobarangde uko “intellectual film” ine agane rotoka.

Plotni gita aganode, Ma·ama bilsi 85 ong·gipa Philip minggipa budepa saksani golpo ong·a. Ua bilsi kolatchimangna skangan sianggipa uni jikgipana simbra ma·ringkue, janggi tanga salrangko ma·ama gita re·ate, jikgipako siani ja·mano atchiramasachi grongtaina ka·donge dongengachim. Unon walsao ua jumang mingsako nikaha: Balpakram gita dakgipa biapo bang·a me·chikrangko jumango nikaha; uamangoniko jiktangko am·e nion Philip nikjaha ba u·ijaha. Ia jumang nikanichi jawilwatni golpo a·bachenga.

Jumango jikgipako nikgijani ba u·ipiljanian Philipko ka·suangataha. “Salgi aro Balpakramba ong·ja maina, atchiramasachi ong·ahaode mikkang bimang dingtangaijokma? Angni jikgipara angko u·ijawahama? — ia sing·anirang uni jikgipako grongtaina ka·dongsoaniko bingbrangataha. Jumang nikaniko ua pringo demechikna aganaha, indiba demechik uko dal·e ra·jaha. Unon Philip jajaan gape aganchakaniko am·na dingtang dingtang manderangko grongna re·angaha. Skanggipa, ua photo gitchamrangko ra·jole, Shillongo donggipa demechikona re·angchenge an·tangni gisiko dongtogija ma·amengako parakaha. Ah… uni ja·mano golpo maidake ong·anga filmko nigiparangde u·igen, plotko iano sedamjawaha.

Ma·ama-ni mongsonggipa theme atchiramasachi ong·aniko mandeni agan-chanchisokna man·gijanian ong·a. Siani ja·mano mandeni janggi jamana mai ong·a, dingtang dingtang toromrango dingtang dingtang bebe ra·anirang gnang, indiba mandeni gisiko ua bebe ra·anirangko sing·palpilanian gapa. Ma·ama golpoo gipin themerangkoba man·chapa: uarangoni mitamara:—

• A·chikni dakbewal gita, jikgipa siani ja·mano on·songrikaniba filmni theme mingsa ong·a, maina agangrikanirangko nigrikode jikgipa siani ja·mano Philipni gnigipa jikgipakora on·songrikasa ine u·ina man·a. Paningsa golpoengon, gnigipa jikgipako ua bi·sarangni gimin chanchie ra·na nangaha jne agana. Indita sak bi·sarangni pagipana on·songrikanio uamangni gisepo baditana kingking turam tutip meliaha ukoba filmo nikrikna man·a. Nokdangko nirokanio jikgipa gitalba jikgitcham gitan chu·oningnikaniko on·ahama? Jikgipa gitchamna gitan Philip uni gnigipa jikgipana ka·saama? Sakgnian kusi ong·e janggi tangrimaha ma sakgnian ma·ame janggi tangaha?
• An·tangni kamrangchi tinggelpake nokdangna chu·onga gita somoi on·na man·gijani obostakoba ia filmo katta naata. 
• An·ching Kristian ong·ahaoba pagitcham ma·gitchamrangni bebe ra·anirangko galna neng·a, iaba theme mingsa. Philip saksa Kristian ong·oba — salgini songnoko bebe ra·gipa ong·oba — ua me·mang a·song Balpakramo bebe ra·anikoba galna man·ja.

Ma·ama filmni bidingo chanchibewale agananirang bang·en gnang, uarangoni camera angleba mingsa ong·a. Filmo manderangko, uamangni agangrikarangko mesokon basakoba sepange basakoba chel·e, basakoba saksako basakoba sakgipinko dake plip plap camera ka·aniko an·ching nika. Indiba Ma·ama-ko tarion an·ching mikrontangchi nikbebeenga gita camerani angle ong·a. Obostarangko an·chingni mikronchi nikania pangnan wide angle — indaken Ma·amao nikanirangba mikrontangchian nikenga gita wide angle ong·ate tariaha. Indake tarianira ramram ong·ja, camerako off ka·e angle dingtangoni ka·gija scene mingsako ru·uten ba matchoten ka·a. Uan cameraman aro actorrangnaba namen raka. Haida, iani gimin Ma·ama Shangaio Best Cinematography man·baakon (?)

 

 

Ma·ama filmko nigiparangni kattarangko an·ching niangna. (Reviewrangko nangani kri update ka·rorogen).

Ma·ama filmko anga October 19 tariko niaha. Ia film National Awardko man·e A·chik jatna mikkim rasongko ra·baaha. Plot rikani ma·keta, ka·be ring·ani aro ajeako man·chapatanichi filmni gunko batata. A·songni silroroanina kam ka·on ong·telaigiparangni nosto ong·angako mesoka. Pagitchamrangni bebe ra·anirangni gimaangako Philipni adatangni siao uko gopatako aganao paraka. Filmo suspenseko jakkalani bilsua. Ma·gipa (Philipni jikgipa) maikai siaha, uko film nigiparangna parakningijanichi uko u·ina sikani suspenseko ong·ata. Changsatai, ia filmna golpo ga·sue see name tariahanina Dominic M Sangmako mittela. (Crystal D Marak)

 

Ma·ama filmni bidingo angni chanchipaa:

• A·chik pagitchamrangni bebera·anio siani gadang bonga gnang. Mande, Me·mang, Me·te, Pre, Mitde.
• Da·o mande ong·e janggi tanga gitan atchiramasachiba siroroanga ina. Me·mang ong·mitingo ka·satangtangko bilsi snimangnade sengsoa ina; sokangjahaode sakoba kimsoa! Filmni sing·ani ianona soka: je atchiramasachi grongetaioa mikkangchongchong mande gitan ong·kugenma ma dingtanggen?
• Kristian bebera·anio sian ja·man ka·sagiminrangko grongtaina ka·dongani darangon gnang, indiba maidakgipa bimango ong.gen!?

Indonga chanchirangko on·e ia filmko tariania darang mandeni ka·tongkon su.dikdikaha! Filmko niengon ong·chongmotengako nikmanchaenga gitan, maming dakjeani gri, pilakan jak kamal. Nambejok!
(Bilnang Raka K Sangma)

 

MA·AMA gisik chanchia gri niaigipa mandenade ga·sujawa, indiba gisik rongjrie chanchie nigipa ua filmko gamchatnikgen. Katta mingantioni ong·katanggipa sagal an·cheng gita ong·a. International & National Awardko maidake man·aha? Chanchie nijokma? Filmni ning·o “play within play”
Ia sing·anirang:

1. Mande siahaon mikkang dingtangama?
2. Nokni pagipa depante nokdango ka·sagrikoba maina kusiniko pagipara man·ja?
3. Filmo sianggipa me·apa saksara maina salgiko jegale Balpakramchi re·na sikbataha?
4. Maini gimin filmo pagipa an·tangni tangmitingon nokdangni history, jatni itihas, an·tangni janggi tangani — indakgiparangko depantena pakwate donangaha?
5. Filmo pagipa maini gimin simano jikgipako grongtaina man·genma ine sing·aha? Katchinikgipa mande maina uko talatna man·ja?
6.Filmo A·chik jatni kabe ring·ako on·chapa. Uara maiko miksonga?
7. Sam dake siatgipa mandeko pagipa depantena maina aganja? Uko aganode uamangni gisepo mai ong·genchim?

8. Ma·amani orto mai? Ia filmo maidakani gimin ma·amaha?
MA·AMA film nigiparang iarangna aganchake nibo.
(Samil M Sangma)

me atchiramasachi ong·aniko mandeni u·isokna amgijanian ong·a ine aganna man·gen (life after death). Indiba ia filmo bang·a themerangkon man·chapa, jekai — (

Kristian ong·ahaoba an·chingni jajakuanirangko, pagitcham ma·gitchamni bebe ra·anirangko watna man·gijani (traditional beliefs). Philip saksa Catholic Kristian, indiba ua me·mang a·song Balpakramo bebera·aniko galna man·ja.,
Jikgipa siani ja·mano on·songrikaniba filmni mingsa theme ong·a