Kattarang Gimaroroangode Ku·sikba Gimagen!

Mamingko minge chananinan “ge·” ine jakkalengani bidingo pil·taitaie seachi mikrakataha. Uarangko poraisoe bang·a manderangan, “Aiao! na·simangni seata namjok, angaba iani bidingon suk ong·jaenga” ine agantokaha. Bebe chong·mot! an·ching A·chikkuni ia dingtangmanchagipa gunko gimaatnasienga. Ge·sa, mangsa, dotsa, kingsa ine ma·ate channa jakkalgipa kattarangkon Classifiers minga ine seakoba ia websiteon nikgen (Garo Classifiers). A·gilsakni gipin ku·sikrangoba indake minge chanani gnang, indiba ia gun A·chikku ku·bichong Sino-Tibetan ku·sikrango dingchikbata gita nika. English ku·sikomangba indake minge chanani A·chikkuo gitade bilakja — mande saksakoba “one man” inaia, menggo mangsakoba “one cat” inaia. A·chikkuni ia dingtangmanchagipa gun donganina A·chikrang rasong chana krachong·mota. Da·ororo bang·a manderangan mamingkon minge chananinan “ge·” inesa agantokenga. Jeans kingsa ra·na am·oba “jeans ge·sa,” SIM card ra·na photo kinggni nangakoba “photo ge·gni” intokaenga. (Iako poraidapbo: Sino-Tibetan Ku·sik)

A·gilsakni gipin ku·sikrang chasongni ja·kurang baksa apalbatroroengon A·chikkuni indake ong·angenganina an·ching dingchiken chanchina nangenga. Maini gimin A·chikku apalbatroroani pal apchonangenga? Maini gimin ia chasongni A·chikrang ku·tangni kattarango (vocabulary) bilgri ong·angroroenga? Iaranga ku·tangna an·chingni simsakna gualengani aro uko gamchate ra·tokjaengani a·sel ong·engama?

Skangode A·chikrangoba script dongachim aro uarangko bigilrango see ra·bitachim ine agana. Indake aganritingbaania kakket ong·ama ong·ja ukode anga aganjaenga, indiba indonga obostako A·chikku chagrongbebegen ine kenchaksona nangenga. Da·o gimanasigipade script ong·jawa (skangon gimajok ine chanchibo), indiba ku·sikni kattarangan ka·sine ka·sine gimaroroangskagen! Ku·sikni kattarangan gimaahaode, bon·kamaode ku·sik manchaba gimagen. Haida, indine aganode darang A·chik mandean ra·chakna sikjawa, “Maidake A·chikkuara gimagnok?” ine aganstonge galnaba donga. Indiba an·ching iakon nipilna nangenga: “Sawa A·chikku kattarangko bang·bate jakkala – ia chasongni A·chikrang ma da·oni chane bilsi sotbongana skangni A·chikrang?”

Badiaba ku·sik uni samtangtango donggipa gipin ku·sikrangchi supekako man·on gimaanga ine agana. Ku·sikni gimaangani bidingo indake agana:

“The most common process leading to language death is one in which a community of speakers of one language becomes bilingual in another language, and gradually shifts allegiance to the second language until they cease to use their original (or heritage) language. This is a process of assimilation which may be voluntary or may be forced upon a population. Speakers of some languages, particularly regional or minority languages, may decide to abandon them based on economic or utilitarian grounds, in favour of languages regarded as having greater utility or prestige.”

A·gilsakni badiaba badiaba jolrango donggipa A·chikrangni obostade indaken ong·angaha ine an·ching nika. Da·odipet, Garo Hillsni A·chikrangde ia language shift ba language assimilation ingipa obostarango ong·kujawa gita nikmana, indiba ku·sikni kattarangni gimaroroangengako an·ching an·tangtangan nikengaha. Dokkan dakgipa saksani agana gita, da·ode bree cha·gipa bi·sarangan “Gong·sa dakgipako, gong·gni dakgipako” ine bi·jaengjokna, “One dakgipako, two dakgipako” inesa bi·skaengjokna. Uan bi·sarangni English man·batengahako mesokenga ine chanchinabe, ku·sikna brangengasa – uan languages regarded as having greater utility or prestige ingipao ong·engako mesoka!!! Da·ororoni bi·sarangko nibo: matburing, sam bol aro uandakgiparangko Englishchi mingna man·tokoba ku·siktangchi man·gijagiparang bang·batroroenga. An·ching iana jajrengsona nangani dongjama?

Badiaba mande tok ba jat chubata gadangona sokangroroon uamangni ku·sikba apalbatroroanga ine agana. Indiba chasong gital ong·barikrik A·chikrangde batesa ku·siktangni kattarangkon u·iangtokjaengaha ine an·ching an·tangtangan nikrikenga. Da·o an·chingni chanchina nanganide: maini gimin an·ching ku·tangko jakkalanio kattarangko bang·batatroroani pal batesa gimaatangroroenga? An·ching songsalni badiaba bewalrangkon nipiltaina nangengama?

Melkey Chisim
Published : CHIMIK Vol 5.No.9,  June 2009
Updated