Papni Rongdik
Chonchi K Marak
A·gilsakni nitoa, an·saoatani —
dongoba ang’ gisiko,
Do·o matni knatoa ku·rang,
ring·atmanoba ang’ ka·tongo.
Balbaoba balwa a·paksachini,
nikata nang·kosan ang’ gisiko!
O Nitoa, napketmanjok
tu·bee na·an ang’ ka·tongo.
Chanchia salantian nitoani gimin!
Jada chaa knachengaonin un’ ku·rangnan;
Dongsiksaka sal wal, ka·tong jria unan,
Parakmanjok balgaoa gita, ka·saani gimin.
Ka·saa ka·saa, uan mairongpila katta,
Agansokja ning·tuako, badita ka·saa,
Indioba tosokjaoba ong·gramaian’ gunsa,
Bangbango nabaa, unon bon·a gitasa.
Pante me·tra ka·sagrika, aiao sal wal,
Sokbaa dikdiksana an·sengbean’ sal.
Niksraprikja ong·anga obosta. Papnasa a·sal,
Sokbaa ka·saachin a·sako andalbea wal.
Skimani sal sokbajok,
Duk jajrenga baksa salko re·atna nangaijok.
Katchaan’ sal somoi batangjok,
Janggi tangao kusin’ sal jrip bon·aijok.
Da·nang, Hoban’ kattako,
Atchu chengo ra·chakjok,
Sualangjok su·ritchuna ka·san’ biteko,
Ka·saan’ suakpiloba dukni wariko.
Bilsini bilsi re·angjok —
A·sak nalsa nalspat papan bile roengjok;
Maikaisa gelkuna, salan sesomanjok,
Nokgipani ka·sachakana ‘gre dongjajok.
Chimik | Vol 6 No 11, August 2023