Na∙an Aski

Laritha A Sangma

Chansokja niksoja, teng∙rikrak askirang,
Ching∙cheta bangbango rasong chae u’rang;
Andalao teng∙suenga jekai jajong aski,
Bidan’ a∙bao teng∙sue ong∙bo na∙a sakki.

Sikjama ong∙na na·a aski rongsa gita,
Teng∙supana a∙gilsako A∙chik jatoniba?
Da∙on seng∙a dongmiting, bida so·bakrikna,
Tikkelesa sa·attalo man∙gen gisikna.

Dongaiode arate salko jaronikgen,
Gong∙e kamko ka∙ode sal bakkandikgen;
Gamchatgipa salko chi banpakanga gita,
Sokbagen sal skimani balmikkanan bata.

Jakkalbo somoiko skie ra∙na da∙al,
Jatni bolgong matgitchak ong∙mesokna knal;
Mikkangtangko janiari dongaiode da∙al,
Nipilate ka·siksikgen ia salna knal.

Ong∙bo na∙a mikrake gisik do∙mesal,
Da·alo tikkel-gabrite ong·bo aski knal;
Chu∙sokangbo na∙an, aman’ songni aski
Krenge jotton ka∙bo, ong∙bo na∙an sakki.

 

Chimik | Vol 6 No 11, August 2023