Kamrup Jolni Garo

Anjima R Marak

Kamrup jolo aganbewal Garo ku·sik aditan dingtanga. Kamrup Garoni gimin aganode bang·batan “Cha·om ringom” ingipa ku·sik inesa u·itokaia.

Kamrup jolni Garoko agannade adita auxilliary verbrangko unikoa mitam adjective aro adverbrangko u·ie ra·chengon ong·aia. Uni ja·mano, Standard Garo-oni dingtangtegipa verb aro nounrangko u·itokahaode ku·nokgiparangni sulkosan nangdapaignok.

Adverbrangoni –cho inako u·ichengbo. Kamrupo -cho ingipara Standard Garoni -ona ba -chi inaming apsana. “Ande Hahim anticho he·angedong” (Angade Hahim antichi re·angenga). Atongode -chi inara -o inaming apsanskaa: Noko gnang = Nokchi ganang.

Kamrup jolni Garorangni aganbewal adita kattarangkosan iano see mesokatenga.

niken 👉 “indaken” inako seng·sote aganani 👉

ande 👉 Na·ade inako seng·sote na·’de ina gita angade inako Kamrup jolo ande intoka.

-nim 👉 Future tenseko mesoko -gen inani pal -nim inskaa. “Anga Kamrupcho he·angnim” (Anga Kamrupchi re·anggen).

-edong 👉 Present continuous –enga inani pal Atongo gita apsanange –edong ine jakkala: “Anga tuedong” (Anga tuenga)

om/am 👉 -aha ba –jok inani pal manderangni aganronggipa –om ba –am inako jakkala. “Mi cha·om?” (Mi cha·aha?). “Cha·amke” (Cha·ahake). Kamrupoba jolni krisa ia –om aro –am inako jakkala. Badiaba jolchipak  -om inbata, badiaba jolchi –am. Indiba name knatimode ian om aro am inani gisepgrikosa gam·ako u·igen.

-beldaka 👉 dakdame dongako ba maikoba bang·e daka ba ka·a miksonga. Robeldaka (Rodame donga); cha·beldaka (bang·e cha·a)

teba 👉 indiba: “Teba ande na·timcho he·janim” (Indiba angade na·simangchi re·jawa).

na·tim 👉 Atong ku·siko na·tym ina gitan apsane, na·simang inako na·tim inskaa.

-naka 👉 -ming ba baksa. Garo Hillsko an·pae donggipa Assamni A·chik songrangode (Dudhnoi sepangonin) angming, saming inani pal ang’mikka, samikka ine jakkala, jekai “Samikka re·angnaka?” (Saming re·angnaka?). Indiba Kamrup jolode ia -mikka inani pal –naka inako jakkalskaa. “Nang·naka he·nim” (Nang·ming re·gen). “Sanaka he·baom?” (Saming re·baaha?)

-dang 👉 Kamrupo -mang inani pal -dang inskaa. “Aidang babadang he·banim” (Aimang babamang re·bagen)

teninga 👉 indakeming inani pal: “Ande dokancho he·angnim, teninga mamadangnaka roangnim” (Angade dokanchi re·anggen, indakeming mamamang baksa roanggen). Mama+dang+naka (mama+mang+baksa)

dai 👉 ne: A·we, Chisak jolrangode “dai!” inara interjection ong·ronga, indiba Kamrup jolode interjection ong·a baksanaba sulni kri miksongani dingtange dongkua: “Angnaba donsobo dai” (Angnaba donsobone)

pra 👉 da·nang: “Nambeomke pra” (Nambeahake da·nang)

nu 👉 mo: Ian sakoba ku·mongani katta. “Ong·ake nu?” (Ong·aba mo?)

jabe 👉 nabe: Daknabe, ka·nabe ine beng·anina -jabe inako jakkalskaa. “Dakjabe” (daknabe)

Kamrup jolni A·chikkuko ripengskarangna agano uamangni ga·sunikbatgipade Maibanbasi, jeni miksongan “maiaba dakpile” ine ong·a: “Maibanbasi nidika” (Maiba dakpile nidika).

 

Chimik|Vol 6 No 10, June, 2023