Sutter’s Mill

Mukthi Rangsa

Mitam gitrangkode ru·uta bilsirangonin knabaengoba beekja. Uandakgipa gitrangoni mingsara Dan Fogelbergni Sutter’s Mill. Ia gitko anga skang salrangonin da·ona kingkingba wate knatimkuenga; gitni sulna ka·srokani on·tisaba dimelangkuja, kattarangchi noksa sale golpo agananiko gisiko grikjangjang nikatna man·a. Gario songremitingo knatimroroe re·na manchade country git gita gisikko an·saoatgipa dongjawakon ine anga chanchimanpila. Indiba da·ororo Sutter’s Mill gitko knatimengon A·chik a·songo ong·enga obostani noksarang angni gisikona maibakae sokbarongskaa.

Sutter’s Mill git 1848-1855 bilsirangni gisepo Californiao ong·anggimin obostarango pangchake tarigimin ong·a. Ua salrango sona am·na California a·dokona manderangni daarianganikon California Gold Rush ine mingsinga.

Californiani Coloma minggipa biapo, John Sutter-ni bol ratna kuligipa mill-ko jokpakgipa chibimao 1848 bilsini January 24 tariko sonako nikchengaha. Ua mill-kon da·onaba SUTTER’S MILL ine mingsingkuenga; apsan biapon mill nokko rikpiltaie ripinge donkuenga. Sonako nikchenggipara Sutter’s Mill-ko rikaniko jako ra·enggipa James W. Marshall ong·achim. James W. Marshall aro John Sutter sonako nikani bidingo darangnaba agangija donnuna jotton ka·ahachim, indiba man·jaha. Sona man·ani kobor ru·utgijan dingtang dingtang biaprangchina gipangaha.

Sona man·ani koborko  knaon, dingtang dingtang biaprangoni manderang Californiaona chabildangangtokaha. America jolonisan ong·ja, a·gilsakni gipin bakrangoniba Californiaona re·angna a·bachengaha. Ua salrango sona am·na Californiaona re·anggiparangkon Forty Niners ine minga (1849 bilsio pangchake). Indiba Californiaona sokangna nengrabea ong·jachim. Mitam apalbegipa sagalrangko batsotangmitingo jahas napsrime janggitangtangko gimaataha; mitam ga·nanggijagipa a·bri a·churangko re·angmitingo ramaon janggi galaha. Sona am·na re·anggiparang sokangrikrikon Californiao mande jelani  batroroaha. Sutter’s Mill gitni kattarang gitan, sona am·na re·anggiparangoni mitam man·e cha·tokaha, mitam batesa kangal ong·tokaha:

Californiako a·gilsak gimikchinan mingsingangaha. A·gilsakni pilak biaprangoni manderangan Californiaona re·angna siktokaha. Ru·utgijan, chonbegipa San Francisco, Californiani niksenggipa songjinma ong·baaha. Sorok ramarang ta·raken nambatroroaha; namnamgipa nokrangko  rikaha. 1846‑1848 bilsirangni gisepo US-Mexican War ong·engachim. Ua dakgrikanio US ame Californiani a·dokrangko ra·aha. 1848 bilsini January 24 tariko sonako nikchengaha; antisani ja·mano, chong·motan February 2 tariko Californiako US ra·aha. Sonako man·ani aro US-ni ning·ona Californiako chapatania apsan somaion ong·aha. Sona bang·e man·engani gimin California state-ni gadangona sokna ta·rakaiaha: uko 1850 bilsion USni ning·o state damsa dake ra·gataha.

Californiao sona cho·ani a·sel a·dok chigana nama namja pilakan sokbaaha. Namgijanide, ua jolni a·dok chiga namen nosto ong·atako man·aha. Uano skangonin songdonggipa Native Americanrangna sabisi, cha·asiani sokbaa baksa uamang a·doktang chigatangon gipin jatrangni nisia aro a·rikako man·aha. Mitam biaprangode a·palchini re·anggipa manderangsa chengonin songdongsogiparangko dakgrikpile uamangko rikgalaha. 1845 bilsio ua jolo Native Americanrang sak 150,000mang dongachim, indiba 1870 bilsiode sak 30,000na komiaha. Ua jolni chiring chibimarango namgijagipa chemicalrang brinahani gimin mande jakkalna man·jaha; na·tok na·batrang dongjaha; bang·a biaprangon ge·na gamna man·tokjaha. Indaken 1860 aro 1870 bilsirangni gisepode agriculture aro mining-ni gisepo nangtinggrikani ong·beaha. Ua jolo a·ningni gamko bikotana bate ge·a gamanion tangka man·ani bata ine ja·manode u·iaha. Unon a·ningni gamko bikotanichi chiring chibimako nosto ong·ataniko champengna niam ra·gataha. Ua salrango Californiao a·ako a·kangani bidingo namedake tarigimin niamrang dongkujani gimin gipin biaprangoni re·anggipa manderang ua biapo songdongkamna chol ong·aha.

Pangkamgipa namgnirangba sokbaaha.  Americani salaramo ong·gipa bakrangoni saliram jolrangona kenmangija re·angani ramaba grichim. Indiba sona cho·ani ja·mano Americani West aro East nangdimaha. Chonchongipa songrang, jedake Sacramento, Stockton aro San Francisco dal·dalgipa songjinmarang ong·baskaaha. 1846 bilsio mande sak 200 mangmang dongaigipa San Fransisco songo 1852 bilsiode sak 36,000 ong·aha. Rang·sanan mande jelbaahani gimin skul nok aro gilja nokrangko rikaha; sorokrangko cho·aha, jal·angrangko kaaha. Ru·utgijan ua jolrangona rel rama tariangaha. Rel rama aro sorokrangko tarie Californiako Americani dingtang dingtang biaprang baksa nangdimatahaon badingchiwalani tang·dororoe California man·e cha·na a·bachengaha.

Californiao sona man·a gitan A·chik a·songoba a·ningni gamrangko man·enga. Uarangko sandie mitam man·e cha·enga, mitam janggitangtangko gimaatenga. Sona bikotani a·sel California man·e cha·begipa a·dok ong·baaha, grikjangjang songjinmarang ong·kataha. A·songni gamrangko palatanichi a·songna silroroaniko ra·baa ong·ode nama; indiba a·ningni gamrangko bikote palatanichi A·chik a·song baditana silroroenga? A·songoniko salantio ra·angenggipa gamrangni gamchatani kri man·rikskaaniba ong·ode da·alo an·chingni a·dok chigaba  man·e cha·gipa biap damsa ong·gnokchim. A·chik a·songoni koelako a·dokni a·palonasan ong·ja, Indiani a·palchinaba watatenga. Truck bolprako metric ton 9na bate gatjachina Supreme Court niam donmanahachim. Indiba lekkao metric ton 9 koelako mesoke, gariode una bate gatprete ra·angenga ine songbadrango seako poraimana. Iarang ong·bebeode A·chik a·songnasan ong·ja, ma·mong sorkarinaba dal·bea gimaani ong·enga.

A·brini a·dokrango da·o dipet mande jelani komikuenga. Indiani gipin biaprangode mande jeldugaani a·selan dongchakna mangmangba biap man·ja baksa janggi tangani cholrangba komiaha. Da·o A·chik a·songona rel gariba sokbanasiengaha. Rel gari sokbaahaode A·chik a·songo bading chiwalani tang·dognok aro a·song  silrorobatgnok ine ka·dongsotokenga. Uan ong·chongmota. Indiba rel gari sokbae badingchiwalanio tang·doanichi a·songo namroro-silroroani aro man·e cha·ani sokbaoba skango Californiani obosta gita a·dok chigani chong·mot nokgiparangna gimaani sokbana kenchaksoaniba gnang. Gipin biaponi manderang an·tangtangna janggi tangani cholrangko sandijoljole A·chik a·songo ma·chakeode an·chingni chonbegipa a·dokko pipripna uamang ru·ute somai nangjawa. Californiaona a·palchini manderang gukrori jinma bilbaa gita sokbaaha ine Dan Fogelbergni gito janapa:

For they came like herds of locusts! A·paloni gukrori jinma bilbae ma·chakeani giminan da·ororo salgro-salaram a·dokrango ding·doani ong·beenga! Indake napdrabaaniko champengsona bilakgipa niamni guareko an·chingni a·dokna nangenga. Chel·chaksona gita, a·palchini re·bagipa manderangni janggi tangna dake rike cha·gni pilak kamni a·barangkon a·doktangni manderangan jakkipgiparang ong·na nanggen; aro uarangoni mongsongbatgipa mingsara badingchiwalani a·baan ong·a. An·chingo gimikni gitaba balchangsoani griode agalde agal — Californiao chengonin songdongsogipa Native Americanrangni obosta gita ong·na kenchaksoaniko jegalna man·jawa.

Chimik Vol 6 No 6 Nov 2012

Mukthi Rangsa