Rugarangni Mesaa
aro
Uamangni Ganding Chinding

Bestwell Dajel Marak

A∙chik A∙songni salgipengchipak Bugi chibimani rikam jolo (Dalu sepango) Rugapara song donga. Ua jolo songdong a∙chagipa manderangkon Ruga minga. Rugarang A∙chik manderangan ong∙a, indiba ku∙agana, chrok mesaa, gana china aro daka rikanirango gipin A∙chik manderangoni dingtanga. “Na∙a sawa?” inani pal Ruga ku·siko “Na∙nung chang?” inskaa; “Atchiram songtang gitade ong∙ja” inako “Atchirama gangtangano dongcha” inskaa; “Poraibo” inani pal “Porainibo” inskaa.

Ruga Mesaa inon aiao inmanpilgipa katta gita chanchiatmana. Rugarang gipin A∙chik manderang gita wangale chrok-mesaja. Uamangni chrok-me∙saani bewalrang dingtanga; Ruga pagitcham ma·gitchamrang chrok-me∙saaniko ramram dake ra∙jachim; mande siani Ja Watosa chrokrongachim. Uni bidingo da∙o namesrang u∙ie aganna man·gipa dongjaha; indiba adita me∙apa me∙chikma gitchamrang uamangni u·irikako agantalate on∙kuenga. (Skangni kam bewalrangsa ong·oba iano present tense-o done seanggen).

Rugarang ramram chrok-mesaja — dama, rangko dokja, adilkoba sikja — uko dangtapna mangmangba man∙ja. Uamang mande sie janggi galani jamanosa dama (me∙mang kram) doka, rang doka, adilkoba sika. Unosa songni nokni manderang songo mande siaha ine u∙ie sigipani nokona chagrimbatoka. Mande siahaon uni jama janggina do∙o bi∙sako kae dona. Unbaksana matchuko, noktango dongjaoba bree, mandalko songe biming minge uno ka∙e dona. Sigipako so·a mangani ja·manosa matchuko name simsake jeng on∙e, chi kane ja∙dok ba bilsisa jile dona. Apsan dake, do∙okoba jile dona.

Ruga ma·gitcham pagitchamrangni bebera∙ani gitade mande be∙en bikap soruronge bon∙oba jama janggide bon·chapja. Skangni salrangode mande sio gope galja, so·esa gala. Sigipani ma·drang kamchonspa grengko kole ripinge donkuenga dipet uni jamemangde nokon dongkuenga ine bebera∙a. Mande siani Ja sokpilosa jama janggi ra∙rikgipa Tombolko ra∙one so∙a. Ua sal somoi ong∙na skangan nokdangni mahari nanggipa pilakan mia chua song∙e donsoa. Sal somoi sokon songni nokni manderang dongatang man∙atang gita merong mechu ra∙e, chu dika ole, sale moe ra∙batoka. Ua salo daka kamkosa Me∙mang Gala ba Ja Gala ine Rugarang agana, jekon gipin A∙chikrang Mangona inskaa.

Rugarang mande sie janggi galani Ja Wata ja·manosa dama (me∙mang kram), rang doke, adil sike, khal sike, chrok me∙sae cha∙e ringe Ja Gala. Ia manianio sianggipa mandena minge jilgipa matchuko sale, doke dam∙e sike moe grap mangtate mahari nanggipa nokantionan moangon nokmechik an∙tangni ra∙e sengsogipa chu bitchi matgranko kane, mi du∙e, matchuna agan-agane grap-mangtate watata. Nokantio napjoljolange sianggipana nokona sokbapilon mandalko songe unon matchuko ka∙e dona.

Bon∙kamao grik-toree matchuko den·a. Maharini dingtanggrikgipa chatchioni seoka man·gipa chra depantesa matchuko den∙a. Ia jagalako (Mangona) Rugarang chrok-mesae da∙alo mesokenga. Ia chrok-mesaako Rugarang ramram dakja, sianggipa Mandeni Jama Janggiko kal∙e minge, grap-mangtate watata. Sianggipa mandeni janggiko dilatenga watatengani gimin duk ong∙a gnangsa chroka.

MESAANI
Ruga mesaanio dama (me∙mang kram) aro rang doke, adil aro khal sike, jamako janggiko kal∙e minge, grap mangtate watata. Uano mongsongbate kal∙dil-rodile chrok-mesaakon JAMA KAL∙A ine agana aro ua chrokgipako ABIKA ineba minga.Jama kal∙gipani chrok-mesaani namen dingtanga. Ua jako katchi ra∙bita, katchio gaguriko kabita, wantiko tong∙jang tong∙jang dake toka, mikkangoba dimak nonga, jaksamsachi chatako ra∙bite una wanti toka. Iarang mingprakon rakbea niam aro miksongani gnang. Jama kal∙ani ba me∙mang kal∙aniko dakaniara sianggipa mandeni jama janggiko me∙mang a∙songchina dilatanian ong∙a. Jama kal∙gipa ramram mande man∙ja, sianggipa mandeni chratangsa me∙mang kal∙aniko dakdilna man∙a.

Ruga bebera∙ani gita, sianggipa mandeni jama janggiko salgi mitapsnio donggipa Nawang Skal nisina sengsoronga, aro ina unasa me∙mang dilataniko daka. Jude Nawang — uan skalrangoni dal∙batgipa ong∙a. Bimangni kri uni sko namen dal∙a, sre peksni gnang, aro jaksi chong∙sni gnang; uni dakna amgija a∙gilsako mamingba gri. Indiba ua skal chata winge rama re∙ode “angni skona bata” ine kenenba ramao dongsona pa∙jae kene kata; katchi ra∙e re∙o, “angni sreko matatgen” ine kene kata; gagurini gam∙ana “angko rikbaengjok” ine kene kata; chankol su∙untini dim·akko mikkango nonge rama re∙oba “wa∙al kama” ine kene kata ine Ruga ma∙gitcham pagitchamrang bebera∙a. Uni giminsa jama kal∙e mesagipa mikkang bimangtangko dakjea ine agana.
Ia chrokanio me∙asarang jako mil∙am sepi ra∙e chroka. Me∙mangko Balpakram ba me∙mang a∙songona dilaton ramao bobil jarikode dingna tona ine uno dongpae chroka. Ia chrokanio chrokgiparang Hai Jaora Jaora Huhue ine agana. Uan bobil kensochina bil dinge inwatgipa kattarang ong∙a.

ME∙CHIKRANGNI CHROKANI
Me∙chikrangba miksongani gnangsa chroka. Bang∙bata changon sianggipani ma∙detang ma∙jongtangrangsa chrokbata. Me∙chikrangni chrokanio dingtang dingtang jak de∙anirang gnang.

• Skanggipao, jak de∙e wilwile chroka. Uan sianggipa mandeko so∙na mangna ine ra∙baaniko miksonga.
• Gnigipao, uamang ok rim∙e chroka. Uan oko bil∙e change deko ba∙jok, ua da∙o dongjaha ine miksongani ong∙a.
• Gittamgipao, jak samgniko pakreo rim∙e chroka, uan nang∙ko pakkreo ba∙e keesa roachim ine ong∙skaa.
• Brigipao, mi on∙atani ba mi goatani chin gita jakko goe chroka. Mande sia bon∙ani somoio do∙reng gakasini bimango me∙mangsa re∙baa ina. Unasa sianggipa mandena mitin chitina. Ukon mi gala ba muri gala minga.
• Bongagipao, nokkingoni am∙pangko okani chin gita jakko de∙e chroka. Uan chrani bil man∙aniko mesoka.
• Dokgipao, jakpa samgniko de∙e aro goringrange chroka. Uan siaha bon∙aha re∙angaibojok ine salam ka∙e watatani ong∙a.

ME∙ASARANGNI GANDING CHINDING

Jama kal∙gipani ganding: Jama kal∙gipa ba∙ra marangko kopinge do∙me pota, aro ba∙ra marangkon pakrepa. Uni kang∙kareo gangipa ba∙rako marang ja∙gisim ba ba∙ra marang ine minga. Ua ba∙rako ki∙tingoni chonkale, ja∙aona dal∙bate gadang gadang dake sika. Uni gitoko pakripegipana bate kang∙kareo gangipa ba∙ra dal∙bata. Uni chelo wentonge pakripee gangipa ba∙ra marang gipin me∙asarangni pakripe ba∙raoni dingtanggrika.

Ba∙ra marang: Chrok-mesaagipa me∙asarang ba∙ra marangko skoo kopinge kae do∙me pota. Ba∙ra marangko chengode mande sio pindapna jakkala; uko pindapa joljol so∙chape gala. Me∙asarang ba∙ra marangko gitoko chang dake wene kang∙kareo wenbikpila.

Gamsawa ba Gamcha: Gamsawa ba gamchako me∙asarang kang∙kareo wene ki∙sangchipakna salbikpile ki∙sango siksepe gana. Rugarangni gangipa gamchade gipin A∙chikrangni gangipaoni dingtanga. Rugarang ja∙skuona soke kan∙dike ganskaa.

ME∙CHIKRANGNI GANA CHINANI
Me∙chikrangni gana chinani gipin A∙chik me∙chikrangni gana chinanirangoni namen dingtanga, indiba natapsi aro seng∙ki apsana. Uamang Jagalani somoiosa chrokbata aro an∙tangtango nambatgipa ganding chindingrangko gane chine chrok mesatoka. Ruga me∙chikrang chrokmitingo gipok aro gitchak rongni cholako ganrongbata.

• Ba∙ra marangko skoo kopinge do∙me pota.
• Gipok aro gitchak rongni cholako gana.
• Cholani kosako pakrepa aro ua pakrepgipa ba∙rako batreng minga. Batreng ba∙ra bang∙e dal∙ja, pakrepna tiktak tiktak ong∙ronga.
• Uamangni gana gangipa ba∙rako repena minga. Uko ja∙skuona kan∙dike gana.

Me∙chikrangni gitoko, jakpongo, jakgitoko, mikkingo, kang∙kareo gananiranga gamchatgipa bosturang ong∙a.

• Kokasil: Uko koping kaani kosako, mikkingo gana. Kokasil ma∙gitcham pagitchamrangni gangipa mukut ong∙a; uko skangni rajarang ranirang gana ine agana. Kokasilni jangchio bibalko nitoatna taria aro nitobee dingonaniko nikna man∙a.
• Kotchihar: Iaba me∙chikrangni gitoko gangipa, dinggittam dakgipa silni ripok ong∙a. Chengode ia silni ripoko janggi gnangchim ine agana. Kotchihar ripok mande kal∙akgija an∙tangari il∙enga aro gitoko ganomangba gitika ine agana. Iako montro mingesa tariani gimin il∙enga ineba bebera∙a. Kotchihar ripokko ramramde ganrongja, jagalani somoiosan Ruga me∙chikrang ganronga.
• Ripok: Skangoniko man·rikgimin ripokrang mongma wagamoniko tariani gimin jria. Ripokko dingsa dake ganode ro∙ani gimin uko dinggni dakate kon·e gana.
• Ripok Gitchak: Ripok gitchak me∙chikrangni gangipa ripok jatsa ong∙a. Ripok gitchakko ro∙ongoniko taria. Uko me∙chikrang gitok chaka dipet gana.
• Samchok: Samchokko me∙chikrang jakpongo gana. Uarang cheng∙bea aro uko nitoatna ma∙marikkit dake taria.
• Jaksan: Uko jakgitoko gana. Iako dongani kri Ruga me∙chikrang chrokmitingo jakgitoko gana.
• Seng∙ki: Seng∙kiko mongma wagam aro grengniko taria. Uko Ruga me∙chikrang kang∙kareo, repenani kosako gana.

Ruga chrokanio gangipa ba∙ra marangko chio su∙na man∙ja; uko salo ramprangesa donaia. Uko su∙na niam dongja ine agana.
Chengo Rugarangba bilsi kari soke ratman tetmano an∙tangtang cha∙na ringna skang pattigipa ra∙rongipa Rokkime Minimako de∙mitelna songgimik chu song∙e, wanti toke, rongchu gale, merim goe, grike an∙senge kram doke, dadi chape chrok mesae wanrongachim. Indiba ua wananirangna bate Ja Galakosa dal∙bate maniachim. Ja Galako ripingna chrok-mesaachi dakmesoke ia chasongo rakkienga.