Vowel shift ong·ania English ku·sikosan ong·ja, a·gilsakni bang·a ku·sikrangon, Chinese ku·sikoba, indake ong·ani gnang. Ian ru·uta bilsi aro chasongrangni gisepo dingtangbaani ong·a. Indide A·chikkuoba vowel shift ong·baani gnangma?

A·chikkuoba vowel shift ong·baani gnang ine chanchichipna man·a — ong·jaode maidake merong-mirong, gume-gumi, me·chik-mi·chik, ru·at-ri·at ine dingtanggrikanirang donggen?

Chingni chonmitingon gue inako bang·en knakuengachim. A·we jolode mija/mijal ingija meja/mejal inesa gimikan agantokachim. Indiba da·ororode bang·batakon gue inani pal gui inakosa knabata; A·we jolomangba meja/mejal inani pal mija/mijal ingiparang bang·baroroengaha. Beben, Standard Garoko ja·rike agangiparangde A·weoba, Chisakoba, Am·beng joloba Merong, Meja, Mejal inen agantokkuenga.

Englishni step 2-o gitan, A·chikkuoba e-oni i-ona aro o-oni u-ona shift ong·ani dongakon, indakesa da·o merong-mirong, do·gep-du·gep ine jolni kri dingtanggrikanirang dongaha. Middle Englishni chasongode sweet-ko sweete ine see uko swēt ine gam·atachim ina: da·ode uko swit inesa gam·atskaaha. Apsan dakgipa dingtanganian A·chikkuko aganrikrikbaanioba dongahakon ine chanchichipna man·a.

Da·o an·chingni chasongon vowel shift ong·anirangko mitamkode nikchrakenga: dakbebea inani pal dakbibia, nikbebea inani pal nikbibia inangtokengjok; unikoa→nikoa→nikua. Badiabarangko jolni kri inoba uan a·kangdraanisan ong·aigen, maina bebe inani pal bibi aro jal·ik meseki inani pal jal·ik miski inahaon uade vowel shift ine jajagijan u·ina man·a.

Chinese ku·sikoba miko (rice) mi (mǐ) inean minga (migimin ba song·gimin miko fàn, aro mi bipangko dào minga). Indiba badiaba jolrangode mai mingskaa. Chineserangni menilming do·o be·en song·ako noh mái gāi ine mingsingakode darangan nikenggnok. A·chikrangba mitam tokrangde miko “mai” inean mingkuenga, jekai Atong, Chibok aro Ruga ku·sikrang.

Merong/mirong inako ra·e social mediarango jera ra·ako pangnan nikenga. Haida, “mi” inaba “me” inaoni shift ong·ahama ine chanchichipna man·a. “Bilsi sotbrimangna skangde mi-ko “me” ingipa saksa sakgni buchuma budeparang dongkuengachim” ine budepa saksani aganako iako senokgipa gisik ra·kuenga. Uan ong·na krabebea, maina Bodo ku·bichongoni pekwatgipa gipin ku·bipekrangko nigrikatode mai-me-mi ine shift ong·nan krae nikata. A·chikkuming apsananggipa mitam ku·sikrango da·oba miko “mai” mingkuenga. Indide, indake shift ong·baahama?

Mai — me — mi

A·we aro Chisak jolrango mi-ni compound wordna me inako ra·chapkuengoba Am·beng aro Matabeng jolrangode gimiknan ong·nasipile mi ine aganskaaha. Indiba Am·beng aro Matabeng jolrangoba mi-ni adita compound wordrangna me inako jakkalani dongkuenga: bang·a biaprangon merong aro me·dik inako knana man·kuenga. A·chik a·songo e-oni i-ona vowel shift ong·ania badita saliramchipak ong·anga inditan bilakbatanga. Mitam kattarangode shift ong·gijakoba nikna man·a, jekai Am·beng jolo dipanti intokoba uni katta ma·akode bang·bataon de ine agankuenga. 

Sino-Tibetan ku·sikrangko niatode mai, me, mi minggittamkon miko mingna jakkala ine nikgen. Miko Japanese ku·siko maidake minga niatjolna:—

ine = mipang
kome = megil ba migil
hakumai = su·gimin; merong gipok
momi = miskak
gohan = migimin (song·gimin)
mochigome = menil
suiden = mi a·pal

A·we jolni ku·siko miko mingna mai inako ra·chape jakkala gri, indiba me aro mi minggnikon ra·chape minganirang gnang:—

Mi
Merong
Mechil
Mechu
Metal
Meattam
Mesal
Mepal
Me·kam
Me·gol
Me·dik
Me·gap/Megap
Migil
Migimin
Miskang
Miginde
Mima
Mibang
Mitong

Meja/mija, mejal/mejal, merong/mirong ine dingtanggrikanirang gnangoba sea-jotanio ra·chakbewal ba standard spellingde meja, mejal, merong inen ong·kuenga, aro bilding bildang ong·jana gita, ukon ja·rikangkuode nama.

Bu·a (tol·a) inaba bo·a inaoni ong·baama? Ma badiaba jolo bo·a aro badiaba jolo bu·a inama? Skang salrangode bo·a inakoba bang·en knabebea. Ong·naba kraa, maina Hamiltonba indake ring·a:—

Poraiako dontongjok,
Nang·ko ra·na inenba,
Do·si do·dokna gitto
Ma·na angko bo·onga?

Icylian R Marak-ni Chigitchakgreni Nokma golpooba indake sea:—

“Mamasongde bo·na man·ane,” pante saksa agital panteko pakkreo doktope aganaha. “Na·songde u·ikujaenggen, biade an·chingni Nokmani grigipasa. Bimingkode knaenggnok. Ianba Kaling, songde awa nalsaon, Pal·wanggopara. Bisong songode pante rogipade biasanjok.”

DS Nengminza-ni 1944 bilsio nakatatchenggipa Garo to English School Dictionaryoba Bo·a ine seakon nika.

Chimik, Vol 6 No 10 | June, 2023