Misnaming

Emmanuel Bolwari

“Sengchi… Simchi… Rimchi… Bonchi.” Bonchiko okamnan abitangrangni bimungrangko ma∙gipa mingangesa sokanga. Indake ong∙aniko an∙ching nikrongaia; miksongede sakobasa okamgen, mingatara sakobasagen; basakobara nokgimikko mingangesa jeko mingmanchaa uona sokgen.

Mandeskako bimung mingsrete okamakon Englisho misnaming ine agana. Iani bidingo psychologyni gita sandirikkite nigiparang gnang. Bimung mingsretgipa bewal an·ching sakantinan ong·na man·a. Basakobade an·chingni namen u·igipa ba meligipa mandeko okamoba ku·sikde sakobasa mingatmana. Research ka·ani gitade, je bilsini mandeba indake bimung mingsrete okamgipa bewal dongna man·aia, uan bilsi re·angao pangchakja. Indiba ma·gipa pagiparang — mongsongbate ma·gipa — bi·satangko indake mingsretani bata ine research ka·giparang nikaha.

Sakoba bimung mingsrete okamania “jebasi” dakede ong·ja ine sandirikkite nigiparang agana. Psychologistrangni nikani gitade, bimung mingsretgenoba uan social group ba badiaba apsan ong·gipa tok manderangni gitasa ong·a. Nokoni sakoba minge okamon noktangni saoba mandechi bimungchisa mingsretgen; class-o saoba skigipa bi·sarangko bimung mingsretode classni bi·saskani bimungchi ong·gen. Apsan daken, ripengskako bimung mingsretode apsan dolni ong·gipa ripengskani bimungchi ong·gen.

An·chingni gisiko chipe donaniba computer gitan ong·a. Manderang, bosturang, biaprang, aro jeni bidingoba ong·ja maina, an·chingni gisiko (memory) chipe donania apsangipa bosturangko basee damsan tom·e dona gitan ong·a. Nokni manderangni bidingo an·ching taningni apsan bakon chipe dongen; ripengskarangni bidingo taningni gipin bako chipe donskagen. Taningba (an·chingni memory) bosturangko donchakaniko tok tok dake bak dake taria gitan ong·aia; bilding bildangde memoryko taningo donja. Indake apsan ong·giparangko bimung baksa memoryo chipe dongiminkon mental semantic network ine aganna man·gen.

Libraryo ki·taprangko ki·tapni subject ba rokomni kri ma·ate dontoka. An·ching badiaba ki·tapko nangon uko ma·ate donchakgipaoniko sandia, aro unon apsan dakgipa ki·taprangkoba nikgen, basakobade kolmangen. Janapbagimin mental semantic networkniko mandeni taningni sandipilaniba indaken ong·a. Maikoba gisik ra·na nangahaon semantic networkniko taning sandia; ua sandie man·ao pangchake taning an·chingko ge·eta. Taning jeko ge·eta ukon an·ching ku·sikchi agana, an·ching ja·a jakrangchi aro be·enchi daka ba ka·a. Basakobade indake sandimitingo taningba maiba apsan apsan dakgiparangko mingchina mandeni ku·sikko ge·etmana gita ong·akon. Indiba iano sing·anide, sandirikkite nigiparangni nikani gita, maina ma·giparangsa indakbata?

Misnaming ba sakoba bimung mingsretania ramramgipa ong·anisan, aro je bilsini mandeoba ong·na man·a. Uan bilsi re·angani giminba ong·ja, Alzheimer’s diseaseni a·selba ong·ja. Indiba bimung mingsretania gisik ra·ani aro nike nie u·i-ma·sianio bilgriahani giminsa ong·ode uan dingtang katta.

Mikkangko nike uni bimungko gisik ra·anio bilgriahani giminsa bimung mingsretode uan semantic dementia-ni a·sel ong·a.

Semantic demetia — kattarangni ortorangko, mikkangko, bosturangko ba mamingkon “mai minga” taningni u·iaona sokbaatna neng·e saanikon semantic dementia ina. Indake ong·on, sagipa an·tangni nikenggipa aro knaenggipako mai minga, tik ong·gipa kattako meliatna neng·aha: kattakoba uani ortoming meliatna neng·aha, aro meliatna man·gijaona sokanga.

Natengchipak donggipa taningni bakni (front temporal lobe) jakasichipak tissuerang namangjahaon semantic dementia ong·baa ina. Unon chanchia aro u∙i-ma∙sianiko ua taningni bako chimonge dongipako ku∙sik agananiona nabaatna man∙ningja, jean mandeni gisikko gualrakata (ong∙enggipa obosta, biaprang, bosturang aro bimungrangko u∙i ma∙sianirang); uarangko tik ong∙e agana man∙gijani aro bik dake agana man∙ninggijani ong∙a.

Dementia mandeni gisikni chanchiani aro u∙i-ma∙sininganiko gimaatangani ong∙a — chanchiani (thinking), gisik ra∙atani (remembering), chanchibewalani (reasoning). Mikosto man∙ani, aganna sapani, nie nike ma∙siani, neng∙nikaniko chel·chake rakkina changani bil, an∙tangna simsakna changani, jenan gisik on∙e knatimna man∙ani bil — iarangan salantio dakna nanggipa kamni bakrang ong∙a. Indonga kamrangko salantio bitbatgija tik ong∙e ka∙na man∙aoniko gimaatroroanga. Mitam dementia ong∙giparang uamangni gisiko nangeaniko (emotions) ra∙rikna amja, aro mitam daka rika bewalrangba dingtanganga.