Melkey Chisim
A·chikrangni bilakbee dakgrikna nangenggipa mingsara ku·tangni bidingon ong·enga. A·chikrang skia man·bataha; janggi tangani gadang namen tang·dobataha. Indiba ku·tangko name sronge aganna aro sena man·gipa A·chikrang dongangrorojaenga. Iani kosakon bobil sokbadapa gita, mitam A·chik chadamberang A·chikku sea-jotaniko namen ong·siatenga. Da·ororo chadamberangni angava, indiva, myna (maina) ine searangko nikna man·enga. Mitamde porikkaoba indaken setokenga ine skigiparangni aganako knana man·a. Uamang indake serongen ranta ong·pilengaha. Indake ranta ong·anichi ja·manode uarangkon sea-jotanio ja·rikgen ine kenchaksoani ong·enga. Unode A·chik jatna kratcha·ani ong·gen. Maini gimin aro maidake kratcha·ani ong·gen?
Ku·siko gam·atani krisa phonetics-o pangchake spellingrangko sea. English alphabetni F,V, Z aro ugitarangni gam·ani A·chikkuo dongja. Uni gimin, A·chikkuko sena uarangko jakkalode u·igijani kamsan ong·a. Kattani kattana, adita bilsirangni ja·mano “angava, indiva” ine setokaha. Ua salrango gipin a·songoni saoba mande A·chikkuni bidingo research dakna re·baaha. Unon ua mande maiko agangen? “Aiao! iamangde ku·tango v gam·a donggijaon v-ko jakkala. Phonetics-ko u·igipan dongpajakon!” injawama? Indake ong·ode jatna kratcha·ani ong·gen. Uni gimin, pilak A·chik ma·a-paarang, mama-adarang, ma·de-ma·jongrang aro skigiparang iani bidingo chadamberangna agan-skie on·ode namgen.
A·chikkuko sena gita English alphabet-ni oik0rrangko chu·ongen ra·gataha; English alphabet-o donggijagipa mingsako bikotna nangaha, aro uan raka (·). Beben, da·o baring, kilding gita dakgipa kattarango jakkalgipa “i” oikorni pal maikoba donskana man·genma ine chanchiani nakatenga. Ia gam·aniko mesokna badiaba jatni sea-jotanio saltonggipa “i” oikorko (i) jakkala.
A·chik jatna iako uako nanga ine u·sikgiparang bang·a, indiba ku·tangko name ripingani bidingo an·tangan dakmesoke didigiparangko nikna neng·a. “Ku·sik gimaode jat gimaa” ine agana. Uan ong·chongmota. Ku·sikan dongjahaode jat ong·ani chin ba identityan dongjawaha! Jatni dakbewal-ka·bewal aro ku·sikni bidingon da·o Salgro-Salaram a·dokrangni pilak jatrangan simsakna nangtokenga. Mesokna gita, Bodoland Territorial Council-ni Plan & Programme-ko nibo — No.1: Centre for development & research of Bodo Language ine nikgen. No. 2 aro 3-ni ning·o education aro culture ong·a.
“A nation stays alive when its culture stays alive.” Ian National Museum of Afghanistan-ni motto. Jatni culture-ni skanggipa bakde jatni ku·sikan ong·a; maina jatni ku·sikan griode jatni culture-ba dongjawa. Uni gimin, an·ching ku·tangko ripinggijade jatko ripingna man·jawa.
Mittelbea Jattangni ku’sik aganani gimin rongtale talate seatanina.