Result Namjaoba

Flash Fiction by
Wilberth D Marak

“Government quotao napatnasa indake ka·donge dongtokaia. Indiba ia quotara badita bilsiona choliangkugen. Bang·gija bilsirangni ja·manon iako ra·galnaba donga. Unosa susaani a·bachengode baditan A·chikrangde ja·manchakrikgen,” Chibetpa uamangna talatna jotton ka·aha.”

“Ama, Pulsar-ni chabia baosa?” Uan Ivanni sing·atenggipa ku·rangchim. Ma·gipa chabi sitee donram gojaloniko ra·bae on·eaha.

Dedrangni re·angmanahaoa Chibetma merong basena asongtaiaha. Indiba ruansa ruangnimang man·kuaengon noksul Nadama aganang, ka·dingang dake nabaaha.

“Chibetmang abisako nikrikesa na·a sari. Porikka matchotpilahaoba poraiaan, skiaan matchotja inesa!”

“Chutti gimik noko maidake rochimgen ine pagipa computer class napatengana,” Chibetma mora on·soe aganchakaha.

Chibet, jonggipana bilsi gittammang dal·bata; indiba bi·samitingo sasimaiani gimin nurseryo poraiengpittion jonggipa Ivan uko srapeaha. Nursery-onin abisa susagrike poraie, da·o matric seaonan, classo skanggipa aro gnigipa biapkode uamang abisaan man·simaia.

“Computer training pass ka·gipaba a·nasamsamnakonde. Chingade Nadakode agane nioba man·ja. Na·songde result namjaoba maiba kamnade cholipagen da·nang – computer training inming inming!” Nadama uni kam ka·ao asongtime bel·belengachim.

Chibetma uni miksonge aganengako ma·sie, kamtangon gisik on·bataiengachim. Noksul Nadamani gisikkode uade u·irok u·itok. Beben, da·o aganengade mikkango, indiba mittino mitakakon nachil gappile knasogiminsa. Songo-noko donga ma·ataiengjok — rongtal-an·talkale donganaba ka·dingsteka; Chibetpani cha·dil-dongdilanaba mitaka; dedrangni poraiao man·kalbatanaba mikbua. Indiba Chibetpa uarangna gisik sadilja. An·tangtangan town jillao dongbae, skia man·giparangni daka-rikarangko nikman-nimangiminrang ong·e, skia man·gijagiparangni kamrangko daksningna nangja ine jik-dedrangko aganskikamaia. Me·chik ong·ede, indake onik-che·ep aganbaon aganchakatna gitik dakade dakmana, indiba knaronggimal ong·ani gimin nachil samsachi knatime samgipinchi jokangaia ina gitan, Chibetma bamchikari knatimesan dongaengachim.

“Kolkatani bisimakkon man·chapbaakon sari, na·song dedrangde! Chibet, Ivan abisade bilsiantin sagipa, gnigipa ong·chekchekaia. Ma manderangni agangni ro na·tok cha·dilsimaianinma?” Nadama aganangkuaha.

“Chingara bi·sarang skul re·kujaon Kolkataoni re·dilbaaijokba,” Chibetma aganchakaha. Unikoa ua an·tangtangni Kolkatao nok para ra·e donge kosto ong·ako, railway departmento Chibetpani chona rema kam ka·ani dormahara Kolkata gita dakgipa songjinmao koros ka·nade chu·onggijako; jillao maming kamnan tangka nangako; aro uandake songadamo dongon nambata, altubata ine agane Nadamako golpo ka·dilaha. Dedrangni poraina man·ania Kolkatao dongdilbaani ba ro na·tok cha·dilani gimin ong·ja, indiba ma·a-paa ong·e dedrangni salantio dakbewalengako niroke, uamangni daksret-re·sretanirangko namatani aro poraiani ja·kuprakon dilkepani a·selsa ine ua talataha.

“Da·oba nang·na mangmangsa, na·a aganpilosa knaaigen,” Nadama a·bachengtaiaha. “Mija cha dokkano Pangsemani aganengakosa knapaaiane sari, angaba. Chibetpara da·o Kolkatachini re·bapilode, ua maiba GPF ma CPF ingipako bikote, dedrang result namode science poraiatnasienganasai?”

Chibetpaan una agankuja maikaesa songni me·chikmaranga knaange cha dokkano agane rona man·pilengjok?” Chibetma chanchiengachim. Indake manderangni agan-mitakako, onnik-chonnikarangko knasoon ua dukba ong·pilengachim. Ua Nadamani sing·mikengako u·iengani gimin, jinma tom·dake mitak-aganao agane on·echina inen agandapataha.

“O·e, Chibetpade ‘result namjaoba’ ine aganan gri. ‘Result namode’ inesa agansimaia. Unan computerkoba skiatengana. Dedrangni birth certificate, caste certificate gimikkoba tarie dontokmanjok. Result namode science poraiatgen inenga. Admission mamingna tangka nanggenjokona, haida officeo chimonggipaoniko okna am·bebeengarok. Indiba angnade aganatkuja inesa.”

“Aiao! Pangsema, Kalchengmamangde bilonggiparangsa! Ku·sakoba bisong mikkangode da·a agansrang! Da·oba nibora, be·’n nokgipaan knakuja, agankuja; uamangsa dokkanai, bajarai katta badingengjok….!” Nadama agantaiaha.

Chibetma uni ku·chi bokbak napile aganako knatimesan dongengachim.

 “…Chingade Nadapade bao; uko uko dakaba gri! Demechikba… Nadaba do·daba, poraibo inoba TV nian chakatja, mobile kal·an chotchangja. Porikkaode man·jana….!”

Meattam song·na namengjok; Nadama indine nangae-nangjae bel·belroroange re·angaiaha.

Chibetmaba kamtangko dontongaha aro dedrang computer class joke re·bapilahao cha·ena man·na gita song·na-channa a·bachengaha.

Dedrang nokona re·bapilaha, indiba pangna gita cha·na-ringna sandiejaengachim. Chibet babilsichi re·ange kringkring krangkrang gam·atengon, mainaba sakoba ka·onangenga ine ma·gipa u·iatengachim. Ivanba bike-ko noksamo nok rikgipao donatani pal, sa·raon chadengate donkuaengachim.

“Maikosa Nadamanara aganatjok, amara?” Chibet babilsioni rake rake sing·ataha.

“Angara maiko aganateming?” ma·gipa jajrenge sing·atskaaha.

Abisa class joke re·bamane nokona bostu nanggiparangko ra·jolna ine neng·takon, Chibetmang abisakode science ra·atnasiengana, certificate gimikkon tarimanjokna, pagipaan admissionna tangka ra·baengana ine dokkano roenggipa gimikna Nadamani agane on·sobeengako uamang knadikeaha. Result man·gija indake daksamsooba fail ong·na nangjokode baditan kratcha·ani ong·gen ine agane ka·dingdilengako knadikesa, ma·gipaan Nadama agane on·ataha ine chanchie Chibet ma·gipako ka·onange inengachim.

“Uara mai ka·onangani ong·pajokna?” ma·gipa balnamate inaha, “Na·simangara result namaigen, namjaosa kratcha·ani ong·bebegenchim. Agangipa aganaichina.”

Mikkaba wana gitik, aram simpile gam·petpetengachim. Sa·ra sosioba asongnade cholikuenga, indiba mikkana ka·dongani dongja ine Chibet aro Ivanni porikka namana minge ra·enggipa bi·ani giljako nokningon ka·na tariaha.

Chibetpaba chutti ra·e re·baani gimin nokonchim. Bi·ani giljaona re·bagiparangna meattam on·na tarisoani gimin, nokni manderang kam apchakjaengachim. Giljaona re·bagiparangba gipinrangko sengsoe golpoe rotokkuaenga.

Chibetmang abisa nama gadangon pass ka·ani gimin, Guwahatini nambatgipa collegerango napna man·aigen ine sokbagiparang Chibetpana agane on·aha. Guwahatian nokona sepangbata – chutti ba choljoka somairango uamang abisaba nokona re·bana man·gen aro Chibetmaba dedrangko nirokena altubatgen.

Shillongan Indiani Salgro-Salaram a·dokrangni gisepode poraina nambatenga ine, Shillongo poraiatchina mitam agane niskaaha. Unbaksana, ‘technical line’ re·angna inoba quota-o altue man·gen ine uamang janaptokaha.

Chibetpara, an·tang baksa rimange Kolkatao poraiatgen inskaaiaha. Dedrangrang dal·baengjok, uamangko nirok-simsake poraiatani, ma·a-paana bamaniko skiani – iarang pilakan dingtang gadang aro bewalosa ong·skana nanggnok. Uandakgipa gadangona sokahaon pagipani dongkape nirokania dingtangmanchagipa ong·a ine Chibetpa ga·chate aganaha.

Walbarikrikbahaon bi·ani giljako a·bachengataha. Nok nokgipani nangnikani gitan, Chibet aro Ivanmang abisani porikkao chu·sokgipa ong·anina mittelan baksa uamangni re·mikkang salrango chu·sokgipa ong·china bi·chakaha.

Chibetpa songona re·baa inako knae songni me·aparang uona rona re·baaha.

“Dedrangkode maiko poraiatna am·enga, Chibetpa?” me·aparangoni saksa sing·engachim.

“Science poraiatna chanchienga,” Chibetpa aganchakaha, “12th sciencekoba joljol namkale pass ka·angpaora New Delhi watatna chanchieba nienga. IAS-na tariatsonaba chanchijolengachim.”

“Science poraiatode aro 12th classko marks chu·onge pass ka·ode doctor ong·jaoba engineerna watatsrangaibo. Maina ‘IAS’ ine mingsamsoe dedrangni poraianiko ja·guataina!” ua agantaiaha.

“Science poraie, government quotao doctor ba engineer-na re·angosa poraia matchoto nengrae kam man·a; ia quotao poraien bang·an mande ong·angtokaha” sakgipinba inaha.

“UPSC porikkao A·chikrangde pass ong·na neng·a. IAS pass ka·giparangko chantektekna man·aianian iani sakki” saksa tap intaiaha.

“IAS-na tarisona am·engani gimin doctor, engineer poraitjawade ong·ja – doctor, engineer ka·eba IAS sesusana man·a aro uan nambata. Kakketko aganode, indakgipa a·barangni manderangan IAS topper ong·rongenga. Aroba kam man·chenge sesusaode IAS porikkao result namjaoba janggi tangnani cholnade jajrengna nangjajok. Government quotao napatnasa indake ka·donge dongtokaia. Indiba ia quota-ra badita bilsiona choliangkugen. Bang·gija bilsirangni ja·manon iako ra·galnaba donga. Unosa susaani a·bachengode baditan A·chikrangde ja·manchakrikgen,” Chibetpa uamangna talatna jotton ka·aha.

Me·aparang Chibetpani dakdilengako jerikkoten dongaiaha. Uamanga an·tangtangni ong·nikatangkosa aganenga; indiba dakdil-ka·dilnakenggipade an·tangsa ine chanchie, ua chonnik che·ep aganbaomangba porainasigipa aro poraiatenggipa dolgni ma·sichakgrikode jeoba chu·sokna man·aia ine chanchie an·tangko ka·dimeataha.

Chibetmang abisako poraiatai giminan cha dokkanoba golpo naengachim. Bang·an uamangko gokarang ine soltokaha. Poraina man·gipa bi·sarangko dal·datana chanchidila dake ja·manode a·achiba nangja, sakchiba sokja dakatnasienga ine saksa aganengachim.

“Ang’ degipasa matrico first division pass ka·e on·na nangachim – doctor, engineer poraiate kam man·atjaode anga!” sakgipin ra·bia gnang inengachim.

Dedrang matrico first division ong·ana IAS  pass ka·aigen ine chanchia. School aro collegeni porikkarangoni namemanchan dingtanga inede u·ija. Science poraiate line watatode, IAS result namjaoba minggipin kamna choliskagenchim – Chibetpani miksongako name taljaomangba uamang indake agansteke roangkuaha.

Nokgimik Kolkata re·angnasienga inako knae Nadama, Pangsema aro Kalchengmamang Chibetmaona rona re·baaha.

“Kolkata re·angode bostu bang·e ra·babone sari,” Nadama aganrorobaengachim.

“Ra·ade maiko ra·bana, dedrangkosa re·dilangenga,” Chibetma aganchakroroe mora on·soaha. “Re·babora, maming maming dongjaoba guekode cha·e rona man·genba.”

“Kolkataora mai ku·sikchi poraigen Chibetmangara… Bengalichi?” Pangsema sing·aha.

“Aia! bebe, uamangde Englishkode man·bebejawaha! Bengalikosa man·aignok! Poraiaan Kolkataosajokona!” Kalchengma agandapataha.

“Englishchin poraipagen da·nang,” Chibetma uamangna aganchakaha.

“Na·aba Bengalikode raprapatana dakaiamo, sari? Kolkatao dongbaa incha…” Nadama intaiaha.

Chibetma ka·dingengachim.

“Na·song Nadara da·ora banona mancha?” Pangsema sing·aha.

“Nokgipade Shillongo poraina inengachim,” Nadama aganchakaha, “uara caste certificatekon man·kuja. Uko tarinaba nangaan bang·ana – birth certificate, a·ani kajina gamgipa rosit, pagipa ma·gipani EPIC… Baoniko bik-gal man·gen rositkoba? Kajina gamara gri!  EPIC-naba, mni election photo ka·na re·baoba chingade ka·rikja.”

“Na·songara iarangkode result knana skangan tarie donsona nangachimba!” Pangsema inaha.

“Chibetpade dedrangna nanga lekkarangko tariengjokna ine angni agananan ka·sin ka·sin tarinaha ine Nadapade inachim… Demechik result namjaode kratcha·gen ine angasa beng·a!” Nadama aganchakaha.

“Namjok da·ode!” Pangsema intaiaha. “Mai divisiono pass ka·a, Nadara?”

“Second division pass ka·a dakpilawai! Porikkana poraiade gri,”  Nadama aganchaktaiaha. “Angade result namjaoba, salsal phone ka·sima dakenggipa pantekon sing·e on·aigen inesa chanchiaiengjokchim.”

“Nampilaijok!” Kalchengma kusi ong·a gnang inaha. “Poraibebeode haida Chibet, Ivanmang gitan first divisiono pass ka·naba dongachim da·nang!”

Chibetma uamang baksa aganrimpajaoba, uamangni agana mingrikkitkon knatimrike gisiktangosa chanchirikengachim. Ua Nadanaba duk ong·chakaha. Ma·a-paa a·same simsaksoode demechik indaka duko ga·akna nangjawachim. Detangna daksamsoani pal, simsaksogipa ma·a-paakosa agansteke roania an·tangtangonan sokpila ine ua nikatengachim. Ki·na siko ki·gol pe·ania baditan man·dikbeani! ‘Poraiode pass ka·genchim’ ine aganania ma·a-paarangni agansretanisa ineba ua nikatengachimn. Ma·a-paade, ‘Result namjaoba’ ine agansamsoani pal, ‘Result namomangona’ inesa daksamsodilna nanga. ‘Poraigijan pass ka·a’ inosa uamang ga·sunika, indiba poraijaode maikaesa pass ka·skagnok ine chanchie ua uamangni rasong chaenganiko ong·nikjabeengachim.

“Mai, IAS officer ingipanara garikoba on·ana?” Nadama bik sing·attaiaha.

“Result namode,” Pangsema aganchakskaaha. “Indiba namjaode man·jawa.”

“Result namjaoba ‘Amikkaba IAS sea’ ingipa bimingkode man·pagenba!” Kalchengma indine aganon uamang sakgittaman grau ka·dingaha.

Chibetma uamangni golpoarangko knatimesan dongaengachim. Indiba uamangna maikoba ku·sa ku·gnide aganatna nanggen ine chanchie, an·tangni Kolkatao dongmitingo Bengalirangni detangtangko chu·onga gita somai on·e poraiatako aro poraigipa tebilonan cha·anirangko ra·ange on·a ine nikbaatangko agane niaha.  A·chik bi·sarangkoba uamang gita indake rake jotton ka·atode, haida Chibet Ivanmangba chu·sokangnaba donga ine ua agandapataha.

“Chingara Kolkatakoba nikpakuja, Bengalikoba man·paja… Hai an·chingba re·nahama?” Nadama aganroroe re·na chakatdilaha.