“Mainasa angko senggija re·anga? De angko salegalgalbo. Gari buskoba sraprikjaha,” Rapse mikchatang kawatangna phone ka·ataha.

“Mai rengkonta dake da·onaba re·bakuja?” mikchatang Jamdam rang·pretataha.

“Chinga group dance skienga ine nang·na da·sion aganachimba.”

“Jawaming gipake an·senge rogipakora sawa sengna sikgen? Achakmangba kon·konchae rojawa! Anga nang’ mikchatang ong·jongjonge nang·ko jawani gipaka de·toma dakako nie roode jarasa ong·pilaigen!”

“Aiao! uno chrokanara maisa ong·pagnokna! Unoara maming namgijakoba daka griba.”

“Akgol gri me·chik! Matchaba nang·ko chikna guala!” Jamdam chrike inataha. “Nang·ko anga namgijako dakenga inengama? Sengbo, angaba jawa me·chikming cultural nighto gipakpile an·senggen. Ku·samai aganode gingting an·chi ong·pile su·pretgen! Ian aganenga.”

“Chrokana mangmangba na·ara indakpilesa sanalama ? Program ong·anasa chrokengaba.”

“Sanalgen o·e. Sanalako nangnikjaode da·on watbo. Angade achak miktokma? Da·o sonibar attamo na·a sanalama sanalja niskana!”

“De raja, I’m sorry. Anga house captain-na aganataignokba ne… Anga chrokjawahaba… De salebo baby… ka·sapae… maxiba dongjaha…

Sorry inani gimin Jamdam an·tangni NS 200 tomtomako sale ong·katangaha. Chitoktako Rapseni nok para donggipaona NEHU Campus-oniko sale doneaha.

Nokona sokbae Rapse au-miksue meattam cha·mane neng·takengachim. Ua group dance incharge-na nombor dokataha.

“Oi Nancy, angade chrokjawaha. Ua Alex-na partner gipinko sandiaiboha. Ang’ mandean angkode chrokna on·jaengaha; anga chrokode chingade golmal ong·gen.

“Aia! iano chrokana mangmangra maisa ong·pagnok?” Nancy namrenge aganchakataha, Da·o gitik gitak sawa skikugen… knalni salsaon chroknara nangengaha. Gipinko sandijawajok. Chrokaiboha, neba ta·ma… Ra·kuja kimkujaon indakpilesa sason ka·engama?”

“Baby.. chrokjana sing·atahachim. Gipinkode sako man·kugen, na·an chrokaiboha inataijok,” Rapse ka·sina ku·rangchi Jamdamna phone ka·e aganataha.

“De baby, please! Angara nang·nasan ka·saaba…”

“Angko nang·ni mamingba ong·jaha inode chrokaibo. Manina sikjaode chrokani attamon angko block ka·e number delete ka·bo. Iakosa agana. Mittela. Goobye.” Jamdam phone off ka·e kataha.

*******

Group dance ong·engaha. Jamdam conference hall ki·sangchipak asonge niengachim. Rapsemangni house chrokani ong·aha. Rapseko Alex jako rim·e napbaengachim. Jamdam nichana man·jaha. Ua video record ka·ako done Donjrangko ong·katna mong·aha.

“Hai re·gnok. Banosa na·ara?” kontasamang ja·mano program matchote Rapse phone ka·aha.

“Chibragre. Mai rengkontana angko nanga?”

“Mai daka? Mainasa re·anga? Mai dakenga uchiara? Saming?” Rapse jajajiji sing·ataha.

“Donjrang and others…”

“Pekaram Donjrangmingra mainasa uchira re·angskaa?”

“Chu ringnasa re·baa. Chu ringana agre maiko dake rokugen? Sipileba ringgen! Alex-ko salangatbo. Tuaba tubaatbo. Jeba dake robo. Anga nang·ni mamingba ong·jaha.”

“Aiao! Indakpilesajokma na·ara!?!” Rapse grape aganchakataha, “Alexba mikchatang dongasaba… Maina indakpile amita?”

“Alexni chame daldiba ian, chingmingan — grape roako Donjrang rime ra·baa. Ango kema bi·na skang Alisao kema bi·bo gaptek me·chik! Angade nang·ko kema ka·na man·kugen, Alisa man·genma? Indakpile agano katta ra·gijagipa me·chik, Saitan-na batgipa sala!”

Jamdam inruruatengon uni jakoni phoneko Donjrang ra·seke Rapsena aganatkuaha.

“Alisa grape Alexko beng·achimna. Manijana. ‘Alisa beng·enga, angade chrokjawa’ ine Alexni jechako na·asa mong·draa inengade. Jamdamba nang·ko beng·achimna. Beng·ode na·ara mainasa katta ra·jajok? Jeni je namnika aro namnikja.”

*******

Salgipin ong·e, sonibar attam sokaha. Cultural nighto Jamdam Donjrangming re·angaha. Jamdam chrokakosan chrokenga, an·sengakosan an·sengenga.

“Oi mosa Jamdam, hai hai, kaldik re·nama; su·buna sikenga,” Donjrang mong·aha.

Su·buram kaldik ong·onbaon Rapseko gipin me·asaming panipuri cha·engako nikdataha. Jamdam Donjrangko re·angatsoe an·tangde joljol Rapsechi re·angaha.

“Filmde ga·suakon ga·sutaienga!” Rapseni sambaona sokon Jamdam jakpa doke inaha.

Rapse to·tro ong·pile kenaha. Ua Jamdamko niksojachim.

“Watnakode srangsrang watbora,” Jamdam inaha, Anga badita chake rokugen? De phoneko on·atbo, angni ra·e on·gipako.”

“Maikosa indake aganenga na·ara?” Rapse mikwang pewang dakaha. “Angara bikora ka·jaba; washroom re·bao panipuri cha·angbo inana cha·engasaba!”

“Oh, jawaming cha·osa tobatakon! Varsity Week ong·chengaoni changsasikba angmingde roan gri; jawamingchek. Baditana anga kema ka·chagen? Ian bon·kamjok. Phone on·pilboha, SIM-koba on·bo, angni adhaar cardchi tariasa.”

“Angara nang·nasan ka·saaba” Rapse rake grapaha. “Maina angko watna am·enga na·ara? Watnabe. Please!”

“Bani grapmika daka bani plis; ha ia ang’ jakchi malis,” Rapseko natengo satkapatna jak engmitingo Donjrang sokbachange, Jamdamni jakko rim·change malmokaha.

“Sorry baby!” Rapse mikchatangko rim·ding rim·ding dake inaha, “De, anga da·alde nang·ni nokchi’n re·gen. Walgimikba dongbagen. Angko kema ka·bo. Ka·sapae! Angko watnabe! Da·alan last, anga indaktaijawaha!” Rapse grape ka·stik ra·e agankuaha.

Uamangni kajia golmal nangako Donjsrangsa malmoke namatna man·aha.

“Hai, indakode da·on joljol re·bo,” Jamdam aganchote NS200 tomtomao chabi siktekaha. “Da·attamde nang·ko tik ka·gen,” Jamdam mitu mitu agane Rapseko gatangaha.

“Sani dos ine agangen, uniba uniba ong·a; uniba uniba ong·ja,” Donjrang uamangko nirike sko rim·rokengon an·tangna chanchirikaha. “Program ong·arango me·a me·chik chrokara mai namgijani uara? Programosan ong·ode, maming namgijako dakjaode maina sko sana. Indiba u·ijare: alamala mataonin pa·sike pari jelangaba dongade dongaia. Mikchatang gipin me·asaming gipake chrokode angaba ninade sikjawakon. Mikcha-ka·sagrika ingipade saksa sakgipinni namnika namnikgijakoba ma·sichake dakna nangaiakon, jakgitelba ong·jakon? Ang’ gita saksan dongon nampila; video call ka·kame battery bon·atgipaba gri, chu ringna beng·gipaba dongja.” Gisiktango chanchiroroe ua rakprete git ring·atsrangaha:

“Nangja angna me·chikko, sko saatgipako!”

Chimik | Vol 6, No 11 | Nov-Dec, 2023