Ripengsa

Bilnang Raka K Sangma

“Oi… an·chingni changsao mesam kal·e nok dakmitingosai mo? Achak pagla nakatsranga!”

“Het! Basako? Gualatpilengaha angade…”

“Mama Chontengmangni te·brong dal·gipa ja·pangora?”

“Daat…. Aiao! da aganaha ukode, nidikata angade… hahaha. An·tangara be·en ra·na re·anga dakengachim da·nang, sojona sekkiko. Angara a·dimuko chi brine mi song·a daka; te·brong bijako chu·na am·engahachim.”

“Panterang achak pagla rikgomengani gisepo angade bani be·en bani mai… noko ma·gipade saksan ineming nang·kon jokatna ka·oksie rikbikpilangaha. Katnade changpaama ma·gipaba. Ganako ro·e gana baksa  janggilo bi·sa ba·bitaa dongkuasa!”

“😂… video ka·rika gita gisik ra·kuengake na·ade. Bilongjok!”

“Saobasa an·chingkora salchichiange tebil kokkimao doneachim mo? Sani nokanchim, gisik ra·jaha. A·palo mande jinma jikjaka, achak chikgrika namahaosa noktangtangchi katangaiaha. Tebil kokkimao dongnumitingoba na·an ka·sine ‘chit’ inpile ki·sisrangaba…”

“ Dat, tol·a na·a!”

“De donainaha. Knal golpotaina. Networkba nambrejaenga. Walnam.”

“Da·onma? Film ga·suengachimba. Ka·dingan ok sapilaha. Am de, na·a knal pringni re·angna nanggen. Walnam.”

Salantio jakra jakasi dakna nanggnirangko matchote, walo palango tugrange golpoe ka·dinge walnam ra·grikanian uamangni dakbewal gitan ong·pilaha ine kan·dike aganoba ong·aia. Chonaoni klas 10onan stappile meligimin; ja·skiloni sko kambeona aganbo inoba man·gen.  Ka·dongchakna man·gipa ripeng inoba, “Do·ga hook namjaha, mande nisokubone” ine Benzioni jako bag donange Simchini toilet re·anga inarangde agreangpila. Uamangni a·gilsak a·bachengo, miktuatgija ripengko da·o Facebook-o grongtaie, skang gitan apsan, maming cha·chipila gri ripeng ong·pilna man·anina Facebook malik Mark Zuckerberg-na maiko on·pilskagen?

Simchi mingaiana anggal dakade ong·ja; ma·gipako man·eming on·titi sakgisim inesan. Indiba chasongni kri tarina changeming sakchigrik ina man·aia. Haida pagipani gisik ka·sinako man·akon, dongani kride donggijako mikchepgipa ong·ja. Uamang nok gadang rika, tangka ino bol bijakni kride ripeng ong·naba angade krapaja, indiba maibadake angni chanchiarang baksa Simchini chanchianirang apsanronga. Mingangode bang·a, indiba ua mikasale chanchininggipa me·chikan ine ra·chakronga.

Melitaiaonide, Silchimangchiba gisepode roangrongaia. Pagipara jripjrip, nangakosan aganaia, indiba me·apa dake golpoana Benzioko namnikakon! Melibea. Ma·gipara agrepile achakrara menggorara. “Achakkode achak gita jakkalakosa nama. Walo salonan jila, nokningo sofao tuataioara mai namgni?” Ma·gipakode Benzio mikkangon aganaia. “Nang’ maniko agane ra·angpaboke,” Simchiba bal·ekatskaaia. Changsade tebiloni biskutko menggo gisim dangot dangote kole cha·an baditaba kap ong·angpilaha. Intangde angkosa potgen ineming Simchini babilsi napangmitingo ki·sango ga·tekatara wilwil bawil noksikchi tang·angpilaha. Ukode Simchinaba aganjaha.

Apsan songon dal·rimbaaha, uamang da·o jadel-bolchaaha, skia-pora gnanggipa pante-me·trasaha. Ripeng ino ripeng bebe, maming dingtang chanchia gri. Changsade Benzio Whatsapp-o sing·ataha.

“Na·ara sako ka·enga da·oara?”

“Maina nang·nara?”

Sombar sal — opis kam ka·roro jepo mobile modildilana nioa Simchi ka·dingsmitenga.

“Busyma?”

“Indakpilede ong·ja. Mainachim?”

“Daribok ingipako nikpagijaba angasan ong·enggnok. Re·dilpabora pai. Gengsi gengdangmangba sakgni maiba gitko chroke nina.”

“Basako?”

“Nang·ni somoi jokora. Angara bi·sa ong·jahaba, sengna man·aigen. Hi hi.”

“Ia antian re·nakode re·bo. Mikkang antide anga opis kam bang·genkon.”

“Bebe? Hai indide ia Sonibaron mo?”

“Am re·aibo. Skango gita kni pekgni sake, skirt gitchak ganbataibo.”

“Haha… intang ganangbebeode garion gatjawaha.”

Chiblok je dongao beng·blok rerabaaha, pring ripamchi onao samsi sosibaaha, ramarango morning walk ka·giparangko bang·bate nikbaaha: maibakai somoi an·tantangarian an·sengkari sokbaengaha inen chinrangchi mesokaia. Mandeskaming bilsimitingni bako jegita gisik sagrikoba, sin·karini salrango maming miknengani gri. Dukni salrang ong·genoba pilakan kusini mikkangrangsan gapa. Bilsi gimikan indake janggi tangna man·ode a·gilsak an·sengbatkugenchimkon! Benziode Sonibar pringnin, chimongtekteke second-hand ra·pagipako Daribok re·na su·srangjoljol rikkit dangkit chanchiengachim.

Sakgnitangtang re·ange namen jakgitel. Saoba re·angpaode aratgnokchim. Rangoli, Chandrakanta, Alif Laila, Shaktiman — rama jolgimikan agana-ka·dinga. Turaoni Daribok mai galgal sokangaha, uamang u·israpjaha. A·bri-a·chu doangchengaonin “Wow! Wow!” inangade inanga, soksrangoa mikka wasisiakon maming che ingija photo ka·an, sil·ake roan maiko! Indake ong·kate roramaba dongpajakon; bi·sa dake gobrangpile iachi uachi  katdingdangpile an·sengbejok da·nang Simchide! Manderangan nitattokpilaha. Camera ka·timaan Benziode mai dakkuna inesa.

“Pai, de na·aba ka·bo. Anga ka·atskana.”

“De, nang’ ka·an angnade chu·onga,” ka·bosan ka·bo inana, on·tisa be·entangko gonggeate, kang·kare rim·e Benzio inaha, “Babamang chasongni style.”

Ramao cha ringsroke Sakal A·dumachi sokangon Simchi neng·kalahakon; skang gita gogotekjaha. Sonibarode mandean awen jawenchim, indiba unsalode mikka wasisiemingkon, rogipa dolsamangba gri. Nokachik rikgipao nigame balwa ringengon sakgnitangtang ronade maiba dakangpilaha; saobarang nikode maikon chanchigen.

“An·sengbatgenchim na·a dongo inanisa, biap manchade mo?”

“Maina rimbajaeming? Rimbapabochim, angming rona man·genchimba” chi ra·bitako Simchi ringataha.

“Dongjaoara sako rimbapana,” Simchiko name niatna pa·bregija nikomroro longpeno samsok bite ma·bakako okroroaha. Mikka wasisidapani sin·srikengaha ine Simchini ku·chilon u·iengachim.

“Ha, iako ganjaoba chindapbo” kosako ganatang chek dakgipa cholako oke on·aha.

Simchi asongchongkoma gnang cholako chingopengon maikoba sing·kugenma ina gita Benziochiko niengachim.

“Ma, angkode sing·jawaha?”

“Maina kni pekgni sakeming skirt gitchak ganbajaha ineming?” Benzio bal·ektaiaha. Indiba pangna gita Simchi ka·dingsikmangjaha. Maiaba dingtang uni gisiko ning·tuani gnang ina gita uni mikronrang mesokengachim.

“Oh, Oh, sako ka·enga? Dongode rimbapabo; angming rona man·genchim,” Benzio ka·dinge inaha.

“Gisiko suk ong·gija dongenggipa mande uni ra·bitenggipa gisikni bojako sanaba parakna man·ode bu·su bu·ako oka gita namkalanga. Ong·chongmotara maia uko u·iatna man·ode gisiko baditan ritchengako man·a; ia me·asade angni obostarangko rektek u·ipajakon!” Simchini gisiko chanchiaha.

“Ma da·alde anga sing·gijan sako mikchaenga aganna am·engaha?” Benzioni kattarangna Simchi deldik dakpilaha. Haida, ian una parakna namgipa chol ong·gen: Simchi gisiko man·dikoba  bagtangni chumbukko oka teka dake aganna a·bachengaha.

“Ripeng, na·a mejaonin sing·beengachim. Angni gimin mamingkon u·ipaja ine nang’ kattarangan paraka. Oe, ango dongachim, indiba da·o u’ming ong·jaha aro ong·taijawaha. Sing·roknasanjokchim. Salsao uni ripengtangni birthdaychi rimana re·angaha. Me·chikskarangba bang·a aro choligipararasa. Angaba alamala man-solman hisape light drinks jakkalpaaha. Te·sa ringon angade maibakai mamingkon u·ipilgija pekangaha. Atcha, basakobade indakarangkoba agane rona chagronga aro bon·anga ine anga ja·delgimin chanchikuachim. Antigipinoa, angni peke tuako, ja’n jara,  ku·dima gipaka dake video viral ong·atsrangaha. Anga sion nambataignok inmanpilaha, angni kratcha·akode agannan changjaha. Angna ka·sagiparang agan-kupattiaha, ai-babamang angko mangrakataha; indakesa na·a da·al angni tangako nikenga.

Ua kattarang Simchini ku·sikoni gam·angenga inen bebe ra·nan neng·ani ong·pilaha. Pil·sara ua me·asako nidikengachim. Indita sa·dikako maming u·igija sikatang bal·ekanaba chanchipile suk ong·jaha. Mai kattakon aganchenggnok ine dongmitingon Simchi aganangkuaha.

“Ta·raken mamamangni FIR ka·ahani gimin FB-onade sokjahakon. Angade donaibo inaiachim, indiba an·chingo bang·a a·selrang ong·engani gimin police-rangba case ra·bo inaiahana. Chingchiniba gimikan suk ong·ja baksa ka·onangtokaha. Under Section 354C. IPC R/W. 66E IT Act ingipa baksanaba maikon maikon case gatdapaha inenga, angade kobor dongjaha,” Simchi grapa mitam agana mitam ritchuangkuaha. “Uni sakgipinko ka·dapakoba changgni rim·a man·a. Ukoba anga kema ka·achim. Business ka·na ine babaniko tangka lak 10 ra·gipaba indin ong·aiaha!”

Ripengtangni indakpilgipa obostako knaon Benzio mamingkon daknan changjae dongaha. Chadenga, asonga, re·jipjanga; maikon maikon daka; maikon maikon agana. Mikka wasisia namja baksa attambaon sin·batrorobaani gimin wa·al so·e chakna nangaha.

Okkrie mi minako senge dongenggipa bi·sa gita Simchi wal·samo kom·tote dongengon rang·gitik uni gisikni janerao hajalni hajal noksarang nabadame supekaniko man·ahakon. Uni obostako ripengrangba u·itoka, indiba gisiko sa·dikako sakgipinna pakbrake mesoke ka·dimena gitade ua darangkon man·jaha. Bisi minani minsu somoi ong·ahaosa ong·kate nama jekai, Simchini chimonggimin sa·dikanirang jokongkatna gitade su·prue on·gipako sandie dongenga gitachim.

Manchisogija somoi aro biapo chanchisoa grigipa ong·ani ong·na man·aia. Attam andalani batrorobaaha; indiba gisiko aram simdapako man·gipani a·gilsak krangbaskaaha.

Sakal A·dumao pringni skanggipa sal ja·dil nangchakeaha. Uan gital pring; gital sal; gital re·mikkangani. Gitcham salrangni bisimak sin·ana so·gipa wa·alni wal·kuo gimaangaha.