Kamrupo Chenggari Oka

Gohalkona a·bri aro uni ja·rek Boko Chiring jolo leap year soka changanti chenggari ong·jinmaa inako skang salrangonin knaa, re·ange niara gri. Leap year ba bilsi 4 prako ong·rongode periodical cicada ingipa ong·gen, nina re·srangna ine re·anggipa bilsion chinga tik ka·e donaha.

Periodical cicada ingipade a·gilsakon bang·ja. North Americao rokom 7 gnang. Uarangoni rokom 4 bilsi 13prako aro rokom 3 bilsi 17prako jrak jrak ong·katronga. Uarang gimik 1803 bilsio apsan ong·katdimaha: ia bilsioba indake ong·katdimani bilsi soktaiaha ine searangko nikenga.  Una agre, bilsi 8prako ong·katgipa Fiji chichango donga. Bilsi 4prako ong·katgipaba Meghalayani Ri Bhoi jolo donga ine adita bilsirangna skang scienceni gita u·ie uko Chremistica ribhoi ine biming segataha. Ri Bhoi jolo bilsi 4 prako ong·katgipa Fifa World Cup ong·ani bilsio ong·katrongani gimin uko World Cup Cicada ine mingkalaka. Kamrup joloniko chingni nina re·anggipade leap year ong·o ong·katrongani gimin Leap Year Cicada mingskana kraa.

Jong·tiket, maijingjing, chenggari, potaneng aro uandakgiparangko man·gope Englisho “cicada” ine minggopa. Garochide indake minggopa gri, indiba Kamrup aro Ri Bhoi jolni Garorangde “chenggari” mingtokaia. Uni gimin, ianode “chenggari” inen sepaaigen.

Periodical cicada ong·ani gimin chinga gisik nangbataha. Indakgipade a·gilsak gimikon bang·ja, re·ange nina sikaha. Assam aro Garo Hills gimikon sal rakchangmiting — April 27 tariko chinga sak 3 — Emmanuel Bolwari, Dr. Bilnang K Sangma aro anga Turaoni pring 9:12 bajio re·chakatangaha. Rajaparani A·chik Dhaba-o wak me·a meseng, do·o bangsi, na·kam bitchi aro na·bisa jo·krapaming mi cha·e golpororoengon dhabani managerba a·dingpaaha. Ua an·tangan Gohalkona jolchini ong·e chenggari ong·katgipa biaprangko chingna agandape on·aha.

Boko-Hahim pa·angdingding ramako gari salangkue 2 bajimango Rangsapara sokeaha. Uano pamong Sanden K Sangma aro Lenon Koksi Sangma chingko nisoengachim. Koksirangni nokon cha ringroroe, bachipak re·o namgen golpoaha, Boko Chiringchipak re·na ku·mongtokaha. Nokni me·chikrangba mi song·gitike, gal·da na·kam aro wak jo·krapako e·salo srom-dipue meattam cha·china on·ataha.

Attam 4 bajimango Rangsaparaoni salgrochipak mikkangaha. Lezadubi bazaro nanga bosturangko breaha; te·raja dal·prete sriako gong 10 bree cha·angaha. Gohalkona bakraona attam 5 bajimango sokangon a·brichi dona bike aro garirango mande chimonge dongtokako nikeha. Ua jolode “chenggari oka” intoka. Ta·gong oka gitan chenggarikoba sopsop sapsap oktokbebea, chingade man·chakrikja.

Chenggari okna sambasigiparangko nikeon an·sengpila. Me·apa, me·chikma, pante, me·tra aro bi·sarangba an·seng an·seng chenggari okna re·toka. Gohalkonani salaramchipak Rajapara songona re·angchenga, jeonin re·gni ramako salgipengchipak doangna nanga. Boko Chiringode bang·e ong·jaenga inani gimin chingaba a·briko gari saldoangkuaha. Indiba adita saldoangon, rama namgijakode chingni ra·anggipa gari amdojawa ine nikaha. Gariko ramasamo done, bosturangko borom botom ketoke ja·achi doangtaiaha. Bilsi 10mang ong·gipa me·a bi·sa saksani wa·sing ra·bite re·baako nikana chel·ama chel·jaha sing·on, “Aiwano” ine jaksi ote agane re·chichiangtaiaha, nirikon nikrikmangjaha.

Adita doangon bike bang·e dondamako nikaha. Uano rama cholgni dake dongachim. Bike sale sokanggipa pante me·tra jorasaba bachipak re·gen jajae dongsoengachim. “Jakra gitade a·bri chua, jakasi gitade donoknokaia” ine sambao donggipa saksa chrikatani gimin chinga jakasi gitan doangtaiaha. Andalaha, jakrachi a·bri chujolgipaode light nate chenggari okgiparangan ching·ret ching·chet London songjinma dakpilengachim. Ua jolo songde donga, indiba a·bri totprak nokprak dakaia.

“Chel·ama chel·jaha?” bike sale re·anggiparango chrike sing·riktaiaha.

“Chel·kuenga,” saksa inwatanga, indiba joljolan aganangtaiaha, “…indiba chel·jaha.”

Uamangni “chel·kuenga, indiba chel·jaha” inangako chanchiroroe doangkuon kilometre 5mangde ong·gnok. Unon bike sale re·anggipa jiksesa chingko srape sing·aha. Uamang Lenonko namen u·iachim. Uamangsa rama jakasichi dakdogipa a·briona re·dilangaha.

Bita (bit-a) chiringko ga·bate chinga wa·a grimona sokangaha. Uanon chenggarirang chreeet chreeet insoengachim. Wa·a ja·pangona sokon mikka wasisia gita ka·sinjrimjrim dake chi gnang balwa baldapaha. Uara chenggari jinmani su·buatenggipasa! Uarangde raka bostuko cha·gipa ong·ja, sam-bolrangoni bitchikosa ope tangtoka. Be·eno nangana bate bitchi dongako uarang su·bue galtoka ina. Wa·a ja·pang gimikan chijimjim dakpilachim.

Ki·chilrangni jildobaa gita wa·a ja·pango chenggari bi·sarangni nadobaako uano nikaha. Uandake ma·pilkugija chenggarikon Englisho “nymph” minga. Bitchi pe·ani ja·mano uarang a·ningon bite donga, ma·pilani somoiosa a·ningoni ong·kate gilsrea ba kingsrea. A·ningoni ong·kate uarang maioba ma·bakchakna miksa ba mikgnimang chue maldoa. Name ma·bakna man·ahaon uarang janggilo groe biking breta. Ua bretgipa gitasa bimang ong·katbae ma·pilna a·bachenga. Ma·pilengon ki·chil gita dakgipa bimangni bikrokoni dingtangbegipa bimang ka·sine ong·katbaa.

Bang·batan kontasani gisepon gilsre kingsree ong·kata, mitam ru·utbate nanga. Ong·katmitingon rakchange dongakoba mangsa manggni nika. Chenggari ma·pilako gilsrea ine mangmangde aganna man·jawa. Dongrikgipa bikrokni ja·a jak aro mikronrang adita somoina skang mangmang kam ka·kuengachim. Da·o uarang janggi gri bikrokrara dongrikaha.

Garorangsan ong·ja, Rabha aro Bororangba chenggari oktoka. Chenggari ong·ako niroroe somoi re·angako u·irikjaengon mikka kima gita knaaha; re·pilna nangaignok. Ong·onbapilon rama brange chiring rong·brak dakgipaona sokangaha. Unoni rama sandiroroe re·baesa Mawdangopona re·gipa rama ka·mao chiringona ong·onna man·aha. Da·sio mikka kima gita knagipara aeroplane bilengasachim. Biap ga·nangani gimin chinga uanon neng·takaha. Ro·ongko konge chikong daka gnang; na·tik aro etchalukrangba uano bang·a; mi cha·chaknaba ro·ongrangan tebil gita apsane dongtoka. Mi bijak oltimgipa “Hai cha·naha” insimaijok — sakbrina on·atako ketima da·nang! Okkribea ong·kujaoba wak jo·aming gal·da na·kamko nongbrine cha·aton jrongjrong napangaijok.

Mi okkaprete cha·e jimje jimje re·bataiaha. 10 baji ong·nasiaha, indiba me·a me·chik jinmani chenggari okna doangako ramao grongtaiaha. Gohalkonaoni doanga intoka. Camera tripod ra·bitako nikon me·chikmarangde ka·dingnapa daktokbeom. Rama re·rongjani kride chinga ja·aba saja, neng·aba neng·tokja, indiba bike dondamgipaona sokbapilon minit 10mang neng·takbaaha.

Wal 10 baji on·tisa bato gari donanggipa biapona sokbaaha. Chingni gari donangako nikeankon, gipinrangba uanon donpaaha. Gari ki·sangni ainaode saobaan “I love you 2” ine see donangsangom, chi ruprakatoba taljaha. Unoni maikoba majakoba dakroroe, Gohalkona, Kompaduli aro Hahim gita wilwilange wal 11 bajimango Aradongaona sokeaha. Gohalkonaoni doangon Lezadubio Welcome to Meghalaya ine sea donggipa tiktakonin sorok namjani gimin sokningjahakon.

Aradonga chirikam ong·e walode ka·sinjrimjrim dongtobea. Sokange Dilsing chibimao autokon golpoarangde ga·sutokbeom. Simsang chijolo rong·kem dona inako uchide rong·kol dona inskaa. Rong·kol donaoniko na·tok rim·akoba basakoba niegen. Walode chinga Immanuel mondolini opiso biap on·aon tusitokaha.

Robibar pring — chingni mikrakkujaon pamongde sokangahakon, angni miksuna chakatode gario I love you ine seatgipako su·srangtokenga. Adita ja·mano cha ringjoljol romitingo Rajasimlaoni gachi napegipa Rutherford Wa·tre sokangaha. Uni golpo agandamakon chingade ku·angpile knatimaha, Sunday school class ra·a gita daknikpilom.

Sal ding·engoba Robibar ma·ate balwa balsri balsri baljolaha. Chola ba·ra teng·kapkap gane chi·rongbitbit gilja re·angtokako nikrikon ka·srokchake nikaha — re·panaba chingara longpenkon ra·angtokjani gimin Rangsaparachi mi cha·na re·angaiaha.

Koksirangni noko mi cha·na asongora tebilo bijak sachiakon chansokpiljaha. Tura jolo “chi·gi” minggipako Rajasimlaoni A·dokgreona “ta·rong” minga, Kamrupchide “rong·tagong” mingskaa. Cha·manronggija bijakrangonide wak rong·tagong pura song·gipa, aro ga·subatgipade chenggari jo·a! Chenggari jo·ako cha·e niora bi·samitingo gukmitim so·e cha·ako gisik ra·atbeom. Ru·ute chobaie roosa su·uaniko u·ibatanga. Saoba saobarangni nokrangode roanggiparangnan cha ra·bao biskutni pal chenggari jo·akosa on·a ina. Ua babilsio jaksuchakna dongipao salang walang jokame dongenggipa chiko gisik ra·aton gisiko matdua.

Gario re·angode kam ong·ja, un’ attamo chenggari oknade pamong Sanden nokoni bike bol 3ko on·aha. Bike bolsade dal·dugaani gimin saniba scootyming srebaaha. Attam 4 bajio chinga Rangsaparani salgrochipak, Nowapara jolchina miksonge wenangtaiaha. Kompadulioni Langpihona a·briko daksotgipa ramako saldoangon college napmiting salrangko gisik ra·atmanpiljok. Gongge gongdang a·briko saldoangon balwa ka·sinroroangjok, saliramchi gitchaksrisri sal napangakoba niondape rona man·pilaha.

Banomancha chenggari ong·enga uko chinga u·ijani gimin pattalona sokon manderango sing·aha. Google mapo niode ia biap 25.83571, 91.21773 tiktak. Uanoni jakasi gita dakanggipa sorokko re·angon ki·sango salgipade a·dimu dimpongako chakangjok; banobade gadopagipa ong·onna nangaha. Ua jolchian Balwa Wari minggipa donga ina. Aganako knaani kride ua dare aro wari dakjola.

Tomtomao gadoode sol·dromrikna am·aiani gimin anga Eman-ni scooty salao gadoskaaha. Simsimangengjok, rokomari chenggarirangni ramasamrango mikoako knaon gal·da na·tok cha·kari salrang ine gisikona nabaaha. Buringgop dakao rokomsa chenggarirangni susa bada mikoako knaana chinga neng·takrike photo ka·angkuaha, gipinrangde re·soaha.

Samtangtangchi grang dake donggipa a·brirangni gisep gita re·angkuon ramasamo bike donako nikeaha, manderangde gritoka. Ua jolo mobile network man·jaha. “Bisongde ka·machisa!” kosakchi chenggari okgiparang chingni sandiako u·ie chrikataha. Ka·machi jikjakgiparangsa bebe. Chingoni saksade na·wal nina pagol nanggipa, on·tisa chiring nikahaon light nate niaia.

Salang walang brukbruk brokbrok, a·bri totgnini gisepgrik gita Dron chiring jokanga, ramaba ukon ja·rikanga. Uko joljol re·angode Dolatwa songona sokegen. Mawdangopchi re·ango jakra gita rama dakbagipako nikgipara uanon najokea ineba u·iaha.

Ua biaprangni giminba chanchiani sokbaaha. Indita a·bri ning·tuao ong·gipa biaprang Assamni bak ong·aniko gisikode ra·chakja man·jaengachim. Ua jolrangan Assam aro Meghalayani gisepo sima-arini gita meligrikna man·jaenggipa biaprang ong· a. Ua jolrango donggipa Garorangni gisepoba mitam Assamchi ong·ako namnika, mitam Meghalaya ong·ako nangnika. Ua jolo songdonggiparangna rama sorokrang aro janggi tangani cholrangko tarie bikote on·batgipasa kangnade kragen. Pic 1-ko nibo, ua jolni a·brirangko rakongwaka gita Assamo man·angtoka.

Chenggari ong·chakenggipa biapde ramasamon, saniba a·ba cha·gipao — light nate okgiparangba bang·rorobaaha. Attamsa skang chinga mingsako nikaha — chenggarirang ma·pilaoni joljol bilangtokja, sambao donggipa bol-wa·arangonasa maldoe dongtoka. Bolrango ma·baktoke chenggari jinma su·buatgipakosa “chenggari mikka” ina. A·baode bol dongjani gimin chenggari ma·pilgiminrangni malpriprae dongakosa nikaijok. Haida, uandakgipa chenggarirangde bima bipa ra·gija, bitchi chi·gija gimaaignokkon.

Chenggari okgiparangni aganani gitade, May jao mikka waani ja·manosa bang·e ong·katgen. Chenggari ong·ako chingni niaba 50%mangni gitasan chu·sokbakuaia, chol man·ode re·angtaigen.

Kosako mesokgipa photorangko nibo. Ma·pile bikrok gitchamoni ong·katahaon chenggarini nom·begipa grangrang badalrorobaa. Indakgipa jo·ongrang ma·pilengon hemolymph minggipa, chi gita dakgipako grangni bakrangona watate kringatroroa. Ka·mao mesokgipa photorango rongtalbate nikgen.

Kosako ma·pilenggipa chenggari bon·kamaode ka·mao mesokgipa photoo gita gisime bimang ong·angskaa.

Periodical cicada ingipa rokomde a·gilsakon bang·ja, nikrongja, gipinrangode dongja — dingtangmanchagipa ong·a. Uarang gimajana gita chenggari ong·ram biaprangoni damsako golmal ka·gija donna man·ode namgenchim ineba nikata. Chenggari damberangko oke cha·anichi uarang bon·anggen inede ong·ja, indiba uarangni ong·katgipa biapon ma·pilgiparangna bolrangko nanga. Uarang bol cheksi nom·aosa ra·srite bitchirangko chi·a. Chenggari okmitingo ma·pilgiminrangni bol wa·arango ma·bakako mamingba dakgija dono namgen. Uarang bima bipa roe bitchi chi·na man·osa ma·kimagija dongroroangkugen.