Rapture Movie Review

Rapture jawilwatko August 15 tarikonin Turao mesokengaha; bang·a manderangan niaha; uko August 25 tarikonan mesokangkugen. Angaba ia jawilwatko nipae an·tangni u·i-ma·siani gita adita seatenga.

Rapture-ko tarina Ri Bhoi, West Garo Hills aro South Garo Hillsni bakrango video ka·a. Indiba biap ba settingko aganode uan Ri Bhoi jolo donggipa A·chik song damsao ong·a ine ming 3 obostarango u·ina man·a.

• Jawilwat a·bachengon me·mang chenggari okako mesoka. Uan bilsi 4prako nakatgipa rokomsa periodical cicada ong·a. FIFA World Cup ong·ani bilsi baksa melie nakatrongani gimin uko World Cup Cicada minga (Chremistica ribhoi). Apsangipa rokoman Kamrupni A·chik songrangoba bilsi 2 offset ong·e Leap Year changanti nakatskaa. (Leap Year Cicadani gimin ia link-o poraina man·gen)
• Jawilwato gure jakkalako mesoka. A·chik a·song gimikode gure jakkalja, Garo Hillsni salgro-salaram a·bri jol, Kamrup aro Khasi Hillso donggipa mitam A·chik songrangosan gure jakkala.
• Basakoba mande gimaon uko tongte dila, gonchu dila, bidawe ra·a ine A·chik pagitcham ma·gitchamrang agantoka. Indake ong·ode ua re·bapilchina cha·samo rimolchi su·dikdike okama. Ri Bhoi jolchide tongte, gonchu aro bidawe inarangko knaja, birakosan agantokaia. Rapture jawilwato bira ra·ana cha·sam su·dikdikako mesoka.

A·chik song damsakosa mesokoba Rapture jawilwatni golpo a·gilsak gimiknan meli-nangchakegipa ong·a. Ua chongipa songni obostachian a·gilsako ong·enganirangko allegory-ni bewalko parakgipa ong·a.

Theme

Rapture-ni bang·bata scenerangan wal ba andala ong·toka. Ia bilakgipa symbolismchian themeko paraka. Andalani a·gilsakko ganggope dongkama, ong·jaode an·ching teng·anikon nangjawachim. Andalanian a·gilsakko salang-walang ganggope donga; salni bako salni teng·suani giminsan ua gimaanga, teng·suani gimaangon andalani ganggoppilna man·a, maina uan dongkamgipa. Sal nanggijagipa biaprango an·ching maiba teng·aniko ong·katatjaon andalani dongaia. Mandeni gisiko andale donganiko gisikni teng·susokani krisa chel·atna ama.

Jawilwatni central theme — darkness ba andalani — andalani bilrang, aro ua bilrangko teng·ani bilchi dakgrikanio bilgri ong·ani. Andalaoni ong·katna tikkelengon teng·suakosan gisiko done re·mikkangna nanga, andalachiko nipilode teng·anikon gimaatgen. “Nanggrio jak rim·e janggilchiko nipilgipa pilakba Isolni songnokna kraja” ina gitan apsanange, chadengdike andalachikon nipilaigipa teng·aniko man·ja. Bira dilana cha·sam su·dikdikako nikeon pamong an·tangba “gisik cholgni” dakgiparangni gimin mikrakataniko on·a.

Andalani inon dingtang dingtang ong·anirangko man·gopa. Andalon name nikna man·ja, obostako talja. Pangchakani grigipa bebe ra·anirangko galkujani a·sel grikgipa u·i-ma·sianiko man·gijanian skanggipa andalani. Gisik cholgni ong·ani aro namgija kamrangko daksruke ka·anian andalani bilrangchi amako man·giparang ong·toka. Ma·ama jawilwato gitan Rapture-oba Kristian torom aro pagitchamrangni bebe ra·animing nangtinggrikaniko mesoka. Kristian ong·tokahaoba pagitcham ma·gitchamrangni bebe ra·aniko chu·gimik galtokna man·kuja; indake dakode namjana, asimaljana ine kenanirangoni jakgitel ong·srangna man·ja. Basakobade maiba obostarangchi uarangko bebe ra·na draatako man·a. A·sakni mitdeko chonnikode Mangkungchini re·bapilanina namjawa ine oja ba kamal mikrakata. “Bani kamal, bani anggal!” Mangkungchini pagipa ojako inprete donbaa. Indiba ja·mano indake ong·bebeon ojani agansogipa kattaranga bebema, “Uni re·bagni ramarangko angan champengjokma” ine ua jajaaniko man·a.

Mandeni a·gilsako janggi tangania andalao gisikni bilchamko teng·ate re·ramenga gita ong·a. Gisikni bilchamo teng·ani grion mande andalao bawange gimaa. Andalao pangchakgipa ma·manti themerang golpoo mitap mitap dakan baksa sakruengrike donga. A·gilsako andalgen ine pamong agansoa. Manderang uni aganani miksongako katta baibai (literally) ra·a. Indiba ning·tugipa ong·anikoa donmitapgipa kattarangchisa parapea ine pamong Kimkimena sruksruk agana. Andalani inon pamong maiko miksonga?

Kenani, dilsretani, cha·bokani, bilko sikatang jakkalani aro songsalko dilanio neng·nikako man·ani — iarangan golpoo stitgrikgipa themerang ong·toka. Saoba mandeni gisiko gipinrangoni dingtange bebe ra·ani aro ong·nikani dongoba ua songsalo jinmani ong·nikakon ja·rikpana draatako man·a. Agittal mande man·ako so·ote galna jak songtokon Nengsal songpana sikjachim, indiba jinmani jak songengon Gaobura uko nitataha aro jak songpana draatako man·aha. Andalani salrangna tangka gilanikoba ua ong·nikja, indiba on·gilpana obostarangchi draatako man·a.

Andalaniko teng·ani bilchi dakgrikanian golponi mongsonggipa theme mingsa ong·a. Andalao manderangni bilcham nate re·ako, lem so·e ra·bitako aro a·gilsak andalna am·on giljao mombati sualaniko nika. Andalako dakgriknara an·tangtangan teng·aniko ra·bitgiparang ong·tokna nanga ine ia symbolrangchian mesoka. Kasan sibokmitingo dal·begipa aro andalgipa rong·kolona an·tangko ra·angako nikjumanga. Siaha ine uko andalani kolningona ra·ange donea. Unon songoni gimaenggipa Mangkungchi aro matchu charagipa sakgniko Kasan nikbaa. Mangkungchi uko watatpile inaha, “Teng·suako nikjokon srongsrong ja·rikangbo ne.” Uan andalaoni teng·aona bilcham ra·e re·angpilani. Kasan adita ja·kurang re·angengon Mangkungchi intaia, “Ka·san ….. nipilnabe, ong·jaode na·ade teng·ako brangatggnok.” Iano irony-ko jakkala. Nipiljachina mikratengon Mangkungchi “Kasan…” inatchengani ong·jachim, maina Kasan nipilna draatako man·genchim. Indiba andalaoni teng·aona re·ongkatangengon Kasan an·tangni bimingko okamako knaoba nipiljaha. Ian metaphorko jakkala baksana A·chikrangni aganrongako mesokani ong·a: Kasan Balpakramko nigame re·bapilaha; nipilode ua sibokaoni simakjawahachim.

A·gilsak namjaha, bilding bildang ong·aha; kengrike dongna nangani, namgijani, cha·bokani, jakgitel ong·gijani, gadang apsan ong·gijani aro uandakgiparangko mikkangchake janggi tangna nangengaha. Kenani aro jajrenganiko ra·bite dongengon Nengsal indake agana:

“Indiba da·ode andalana kenani pal andalakosa nichake dongmanengjok. Ta·rake sokbaon namachim, andalgripo katnape chakna. Haida, indakgipa andalani sokbaosa pilakan apsan gadangona a·bachengpilna gita man·taigen.”

Rapture-ni gita ong·nikaniko Nengsalni kattarangchian paraka. Miksonganide, Noah-ni chasongo chi dubia gita a·gilsakko grue rikpiltaiosa gital dake a·bachengtainade man·aignok ine Rapture paraka.

Kosako janapgipa themerango pangchaken songsalo kenchipchipe dongani aro ka·donggrikna neng·anichi golpoko re·ata. Maiba u·ina man·gijagipana kenanian Rapture-o golponi bidil ong·a. Dingtang dingtang kenanirangan songni manderangko chagropa gita ong·aha. Rapture-ko tarimiting salrango Citizenship Amendment Act-na jing·jengmiting; Assam a·doko National Register of Citizens-na ji·jamiting. Uarangni a·sel gipin jatrangni napbaanina kenanikoba golpoo donmitape mesoka. Uni gimin, gipin a·songo Rapture-ko nigiparang themerangoni mingsako “xenophobia” ine agangen, indiba obosta manchako cha·tote nigiparangsa chu·gimik miksonganikode u·igen.

Golpoko chanchibewale nipilani

Rapture movieni plotkode iano seatjawa, maina uko nitokaha aro da·o nitokenga. Indiba iakosa agangen — buringchi jinma me·mang chenggari okna re·angaoni Mangkungchi minggipa pante sokbapiljaon songo so·sojengjeng ong·ani a·bachengaha. Kamrup aro Ri Bhoi jolo Garo manderangni chenggari okaniko u·ijaode ia link-o poraina man·gen. Mande gimaon chempadora naani aro agittal manderangni songo napani gimin manderangni gisiko kena naptokaha. Uarango pangchaken songo obostarang namjaroroangaha.

Rapture jawilwatko nion bang·a sing·ani aro chanchibewalanirang gisikona nabaa. Bi·samiting salrangode chempadora bosta ra·bite wenenga ine mandal bibal balkariode kenronga. Indiba chempadora maidakgipa, da·onaba u·ichipja. Indiba mingsako u·ia — mandal bibalkari ba Februaryoni April jaonade skang salrango bang·a manderangan cha·anina dilmiting. Indakmiting somoirango cha·u-me·kurangba ong·katbata. Uni ja·mano chempadora ingipara mikron aro ka·rongte ote ra·giparang ong·skaaha.Indiao eye transplantko 1948 bilsio aro kidney transplantko 1971 bilsio chu·soke dakchengaha, indiba liver transplantko 1998 bilsiosa name chu·soke dakna man·chengaha. Ua salrangonin mikron, ka·rongte, bika otna mande rim·giparangni golpo A·chik a·songonaba sokbaaha. Wa·al gride baoni wal·ku ong·katgen ine agana. Apsan daken, chempadora wena aro mikron-ka·rongte ote ra·na rim·srukanganiba banoba dongbebeenggen. Indiba donggijako dongate janganirangkoba chansokja; uandakgipa janganiranga bebe ma tol·asa, basakobade u·i-ma·sigipa manderangnamangba jajaani ong·pila.

Chong·mot a·selko namedake u·ijani a·sel songo kenchipchipe donganian golponi ga·brong ong·a. Songo-noko basakoba mande naenga inon ong·bebeanioba pangchaka aro basakobade donggijanan charurutoka. Mande naenga inon gipinchini re·bagipa manderangkosan potronga. Agittal mande songo noko naode kengija ong·naba namja indiba kenani ja·pangkoba namedake talatnade neng·skaa. Uandakgipa somoirango so·sojengjeng ong·engania an·tangtangni giseponiba dongama inede sing·rongja. A·songna jatna ine minge silchidare de·e nakatgipa dolrangko A·chik a·songo nikangaha. Uamangni nakaton silchidare ra·e tangka dabigipa dolrangba nakatchapa; ua nakatpagipa dolrangni a·sel basakobade “asolrangsa” biming man·a. Basakobade “asol” dongjaoba “nokgol” dongskaa. Mingsa scene ba nakatanio sakgni budepa manderangni cha dokano golpoako nika. Mande naengani gimin simsake dongna nanganiko uamang golpoa. Ua budepa manderangni indake golpoani kride indakgipa obostarang gital ong·ja, skang salrangoba chagrongaha ine u·ina man·a.

Chempadora wenengani gimin songni me·asarang walmikrake dongtimtokengon manderangko jajrengatbegipa katta nakatdapaha: bon·kamani salrang sokbaengaha, wal 40 sal 40 a·gilsako andalgen, pattigimin mombatirangna agre maming teng·anian dongjawa ine pamong jinmana parakataha.

Mande naenga aro a·gilsak andalgen — songo noko ka·suange kenanian wepripaha. Maian ong·pilengaha, manderang jajatokaha. Mande gimaenggipara sani jakma? Gipin biaponi wenbagipa chempadorarang ma bira? Agittal nikgipa mande sakantikon chempadora ine chanchichipani ong·kataha.

Huro minggipa me·a bi·sa sina nangon uamang an·tangtangon sing·ani nakata. Gaobura aganaha: “Indiba iara sani a·sel? Sako dos galgen? Kenjagoke katbae bi·sarangko katchina agangipa me·chikmakoma, ma an·ching gimikan dos donggipa manderang? Maina mancha kenenga an·chinga? Sawa mancha iaranga? Mitdema mandema? Uni gimin an·ching iarangko rim·chongmotna nanggen.”

Mangkungchini gimaani aro sokbapilani bidingo bikpil bawil chanchina nangao ga·aka. Ua bachi gimaachim? Songo obosta ong·engani bidingo ua maikoba u·iama? Ua sokbapilon pagipani ja·ga saao nange an·tangni gimaani gimin aganna man·jaha. Ua maikobade u·ina nanga. Uni nok maidake kamaha? Ua an·tangan so·ama — saobarangsama?

Golpoo mandeni kri katta ku·rang aganna changaniko nigrikgen tariaha. Uamanga songo chong·mot obosta ong·enganiko u·igipa manderangan ong·toka. Maia maja ong·enga pamong u·ia. Ua andalani bilrangoni jokchina jinmana skiprakgipa ong·a, indiba bon·kamao an·tangan andalani bilchi amangako man·e katna tariaha. Pamong ku·srame aro rongtale aganna changgipa ong·a. Indiba ua mitapgipa kattarangchisa aganaha, jekon manderang u·isokjaha. Katta ku·pa man·e aganna changahaon chong·motgipa dilgipa ong·aiama ine Rapture sing·aniko on·a?

Gipinrangni kene so·sojengjeng ong·engon “grangko namnikgipa” Sobel jajrengja, do·ga kelki bangbang dongaia, maina ua  ong·enga obostako u·ia. Indiba ua jripjripsa, golpo bon·aonan ku·saba agana gri. Ua an·tangni secret mission-osa jakchakgija ong·e dongaha. Kakketko u·igiparangan ku·gri ong·e dongaiode songsalna gimaani ong·a. Indiba uarangko jinmana aganon namgni donggen ma dongjawa aro an·tangna mai ong·gen, Sobel gita kongchampilgipa mande u·ienggen. Pamongni ja·kurangko Kasan pagipa u·ia; ong·enga obostani gimin uo chanchichipani gnang. Indiba ua u·iatangko parakatna bilgrigipa gita ong·a. Obosta ong·ako nikgipa Kasan —uade mikdo nanggipa aro ku·chitsa; uni aganako nokni manderang aro rorimskarangsan u·iaia. Chong·mot ong·aniko u·ioba mitam manderang uamangni bewal aro obostarangchi bebeko parakatna champengako man·a ine iano mesoka.

Songo maia mancha ong·enga adita sak manderangde u·itoka. Sawa mai ja·kuko de·angenga, apsanpagipa manderangde u·igrika. Pamong baksa sakgni manderangni tangka chane ong·katangon kelkiko adita mesoke dongkua. Maina? Maikoba nikama nikja, name nibo.

Ku·ma-nagok, ona gadango janggi tanggiparangde mande ong·jama ine Rapture sing·aniko on·a. Mande gimaani gimin songni manderang thanaona re·angon police officer indakesa agana: “Sko tik ong·jakonba bisongara?” Uni ja·manoba ua ku·sik gam·aiana aganatkua: “Dakaibo na·song jekoba, rim·a cha·nasa nangja.” Indiba agittal mandeni gimaode police officer an·tangan photo ra·bitpile sandianga. “Dakaibo na·song jekoba” inata gitan songni manderangde gipin cholko nikjae dakaha. Policena on·ode jamin man·e jokapilaigen inaniko golpoo rongtalen mesoka. Badiaba obostarango a·songni law & order-o manderang ka·dongchakna man·jae an·tangtangni cholnika gita daktokna draatako man·a. Indake ong·ahaon uko ong·a ine ra·chaknaba man·ja, ong·ja ine jenaba man·dika. Golpoo Kasan pagipa Nengsal ia balkon chilna nangaha.

Andalani bilrangoni jokchina skiprakgipa pamong minggipin dakgipa andalaoni katangna jotton ka·aha. Indiba seng·ani ba pring ong·kuaion uko minggipin dakgipa andalani bilrang srapanichi chu·gimik jatengaona sokangjaha. Songo ong·enga obostani gimin ua u·iengon uni ga·enggipa ja·kurangni giminba u·igiparang dongskaaha. Andalao napahaon teng·aona jokangna neng·ani ong·a. Uamangni katangengo nok wa·al kamako nikataniko kamenggipa Sodom aro Gomorrah-oni Lot aro uni demechikrangni katangenga baksa aditade toatna man·a.

Saljagring, Amak, Pilseng — ia sakgittam manderangni giminba chanchina nangao ga·aka. Uamangan pamong aro Kimkimeni katango dokgake galgiparang. Amak a·bachengode, policeni sing·o, ku·sik to·tae aganachim. Kimkimeming nape tuo aro bon·kamao Kasanko ka·mikkenatode ua name srangen agana. Saniba noko gilja ka·mitingo jajong an·chi dake gitchakbaa. Ua somoioba “mande mande” ine chrikani gimin chaangtoka. Uano Rakman aro Sengrakmang rikanga. Kasan pagipa nokona sokbapilon, “Raksengmangni. Sakgittam dongana. On·tisa ja·manchakangode maian ong·genchim!” ine jikgipana aganea.

Rapture filmni bidingo segni a·bakku bang·en dongkuenga. Golponi miksonganiko pe·anide pe·gipaosa pangchaka. Uarangkode gipinrangna, mongsongbate literatureni manderangna donenga. Pamong, Sobel, Kasan, Nengsal — iamangni gimin chanchie sena man·gen. Haida, Nengsalni characterko seanian angnade rakbatgipa ong·genkon. Bon·kamao nokking naprugipani bidingo sing·giparangan bang·bata. Uko dingtang dingtang dake pe·na man·a. Uani bidingo an·tangni chanchianikode iano seatjawa; gipin dake pe·giparang uko seatskagen ine agantokenga.

………………………………………………………..

Camera kal·akani bidingode anga u·i-ma·sigipa ong·ja, indiba Rapture jawilwato minggittamko mongsong nika. Skanggipade long shot — uan camerako off ka·gija ru·ute ka·e dongani ong·a. Mingsako mesokna — Rapture-ni a·bachenggipa scene andalaoni a·bachenga, bilchamrangni teng·ako su·tota gita dakaoni nikrorobaa, jinmani chenggari oka camera sepangona sokbaa. Ua gimikan minit 3mangni jolgimik video — camerako off ka·a gri. Jako gymbal gnang camerako de·e buringo indake ka·nade rakbegipa kam ong·a. Ka·mitingo camera ba kal·enggipa manderangni gisepo maiba gualani ong·ode badita uko daktaitaigen?

Camerani minggipinara depth of field. Video ka·anirango mongsonggipa subject-san focus-ni ning·o ong·ronga. Indiba Rapture-o deep depth of field inako jakkala. Mingsako janapna gita, Kasanmang paningsa re·baengon ja·a teng·dikgipa matchu nirikgipako gronga. Uamangan main subject. Ong·rongbewal jawilwat gitade uamangko sambae mesoke Kasanmangko, rakkualko aro uni ja·a saengako tong·tang tong·tang dake mesokgenchim. Indiba ua sceneo uamangni samtangtango ong·anirangkoba focus-ni ning·on mesokchapa: kenchipchipe dongengon bi·sarangni kusi ong·e robol kal·engako chel·ao nikata. Uni ortode, camerani mikkango, midgroundo aro backgroundo mai ong·enga uarang gimikkon mesokna jotton ka·a. Apsan daken, frame compositionoba apale mesokronga. Badiaba characterni gisiko maiba ning·tua chanchiani ba nangchakeani ong·engode uko close-up mesoka.