Me·trana

Maia dikgen’ bil, O nitoan’ sa·gre?
Muni pia angko gisik bingbrangate —
Ang’ gisikni noksao nang’ bimangan gapa,
Ang’ ka·tongni cha·su nang·ko minge grapa.

Ku·agana nang·ni knal moan’ sulrang,
Janggin’ gitni sul: sokjawa sagal me·chikrang!
Silka·tongan jronggen, ka·dingsmita nang·ni,
Kratcha·e jaksi chikgen mitderangni rani.

Oe na·a norombi, da·al sakki on·enga,
Nokbikromna mingknap ‘ne  mejalba agananga.
Wachin’ salo ronggrikbee salni nabaa gitasa,
Ong·genma na·a indiba rongdimelaonasa —

Saljatchion salnigenma nang’ teng·suani,
Andalani ganggopgenma soksrapgijan walni –
Ong·siani budu ritimjok ua me·chiko,
Wepripna me·tran’ gun, ring·mesoka sulo.

Manchokgipa bibal na·a dakgrikram a·bao,
Cha·amgipa matchok gita brani timsoramo,
Tikkelengon balgaona supekgenma wal·kusi,
Bnekgimin bibalska on·genma nang·na bisi!

Niatbo O me·tra, balenggipa mongnal,
Kaldik chibol chijangchio,  jeon bisi ginal,
Amja uko simtekatna chibisini duula,
Soa simao gitchoeba nitoriri bala.

Mesoka nang·na mongnal Salgron’ Aski jekai,
Dilna re·mikkangao, ua tanga maikai,
Onabe na·a do·ga, ruraan’ doktikana,
Ganbo gisikni danil, an·tang cholonna.

Melkey Chisim