Misi Kario

Lizar N Areng, Mangsang
(June 2005 Chimik)

Attam salni ka·sino rue rue chenggari jikjak!
Misi sarang minbara a·kisangchi gongriting detdat.
Balwa balsipsipana nokgiloni me·rakku wilwat,
Bri’ rikge rimitchip bol snaru bibal banritak.
Boldim ritimgitalo do·bret biljipjipako pintilik,
Dandrak gakgakatako salni napsimangjoko wetwat,
A·ba a·se wa·gongo mat bilwengwatako wengwat,
Wala andalangana ganjapa a·baokatjoko chekritchak-
Ganggu susam chikako, ru·at nade ganako,
Ding·ol gramchie jaksi ku·chot cham·aba
Gamatangni sriwil jakmatangna mesoko,
Gisik suri changaijok alsokgija gamaba.
Jabilsi jawensoke karitang an·piljoko
An·sengjokchimai gose game cha·gipa!