Jawani Message

Flash Fiction by
Wilberth D Marak

Klas jokbae Trogan kutturisasan dongaigipa nokni do·gako kulina chabi sikkrokataha. Pringo mi bijak song·manahaoba, somaina riktingen cha·nade man·srapangjaha. Da·o nokona sokbaoba okkriana skele, ding·atmanggijan cha·aijok. Plastikni morao asonge mi cha·mitingosa ua an·tangni ja·ako nione, samsachinikode jutta-muja okkuja ine nikengachim. Ua jaktangnaba kenchakmanpilengachim — ku·siko mi du·atara gingtingo du·atmanarok ine ua gisiktangni mainaba kusi ong·a amchakjae joksuakako u·iengachim.

Maina? Maina! Ua gisiktangkon ka·onangmanpilaha. Aganchakaniko ua an·tangnade u·iachim.

Shillongona sokbao uni nikechenggipa A·chik me·trara Betchi ong·achim. Mikkang namen nitoa, bimang namen daknanga! Trogan uni rorimska me·trangrangna bate Betchikon silnikbata! Ka·e ronaba gisikode sika indiba XII Science-o ong·kuaenggipa me·tra dambeko majonade siktaija. Facebook-o Betchina ‘friend request’ watatoba ra·chaksoe internetni gitade ripeng ong·jok; indiba Betchini Facebook wall-o changsamang like dakata, comment ka·ata ingiparang dongkuja — chat ka·a, inbox ka·a ingiparangde chel·srangkuenga.

Ku·sik on·grikkujaoba da·alde ramao re·pakgrikon Betchi ka·dingsmitangaha. Aiao! me·tra silgipani ka·dingsmitara ku·hajalsa aganana bata ine chanchie ua kusi ong·timakengachim.

Laithumkhrahona chi ra·baenggipa siltong banoba be·tongaha ine ua klason knaaha. Uni ortode, Laithumkhrah jol gimikon baditaba salnade chi man·jawaha. Trogan iana kusi ong·skabeengachim. Uamangni donggipa kosakchi silongket grimo chibasal gnangchim. Salarion uno mande bang·ronga, da·o chi siltong be·tongahaode mande bang·batgnok. Betchiba chi ko·na re·bagen!

Trogan klasoni sketbaaha. Ua taxio asonge re·baenga gimikan Betchini basing de·akosa gisiko noksa salengachim. Chibasalo manderangni siksepsep nol·sepsep dake chi ko·arangko ua nikjumangatengachim.

“Trogan, Trogan, angnaba basingsa!” Betchi uko okame basingko on·dingdingatengachim. Ua an·tangni ko·mangimin baltinoniko Betchini basingo pakataha.

“Thank you mo..” ine taxi driverni para ra·chake inon, chi ko·atani gimin Betchi mittele aganenga gita daknikengachim.

Indiba da·nang! Troganni an·chengo nok rikako siltongni chi man·pakangaha! Chi siltongko ta·raken tariaha aro attamon ua gittimo chi man·taiaha.

Klas seng·gnang jokbaode ua gittimtango donggipa A·chikskarangming nangrimna chol ra·rongaha. Shillongo A·chikskarangko u·i-ma·sie donania gamchatbea ine ua u·imanaha. Badiaba pante-me·tra, me·apa-me·chikmarangmingde ua meliaha. Indiba uni nangnikenggipa saksamingde da·onaba ku·sik on·grikna man·kujaengachim.

“Mamingba ong·ja,” ua gisiktango inaha. “Anga Shillongo porainasa re·baaha. Me·tra silako nike una ka·sasimake rona ong·ja…”

“Trogan, Trogan…” Sonibar attamchipak saoba uko okamatengachim.

Ua do·gako ochite ramachiko niataha. Uan uni ripeng man·gital Bilrak ong·achim.

“Maina?” ua do·gao naue sing·ataha.

“Saksan aratjama?” Bilrak sing·roro aganroro dakbaaha. Ua nokningona napbaon kadepe ra·baatangko engaha.

“Do·o bika! Mainasa ra·badamjok?” ua aiao inmane sing·aha.

Bilrakde Shillongo donga bilsignimang ong·engjok. Uade Shillongni pilak bakrangkon niktokaha. A·chikrangna agreba ua jolni manderangko u·iaba bang·aha. Unan Trogan uko ripeng dakna jotton ka·engachim. Uamang apsan collegeon poraiengachim. Bilrakde senior ong·soahani gimin college-oba ripeng bang·aha. An·tangni seniorming ripeng ong·na man·anina Trogan kusi ong·aha. Aro, unbaksana da·alde Bilrak do·o bika ra·e song·e cha·na re·baani gimin ua kusi ong·batengachim.

Bijak song·a minaha. Ua plate ko·gnio mi sana am·engachim. Unon Bilrak jacket jep ning·oni botolko bikotaha. Trogan uni bikotako gisik nange nie dongengachim. Uan chu botol ine nikarin u·iaha. Ringchina aganode maikon aganchakgnok ine chanchie ua ka·tong rongchu su·pilengachim!

“Choliakonba?” Bilrak an·tangna rumanahaon unaba runa jakgeng dake sing·aha. Ua aganchakningjaha. “Jakkaljaode nambata,” Bilrak intaiaha. “Indiba anga an·tangde watnan man·jaengjok. Mija jao babamangni tangka hajalbonga on·ataba angade ianoraraan bon·a. Jagitalosa bi·attaignok.”

Bilrakni sing·ana aganchakna jajaengon ua an·tangan indake aganpilani gimin name nikaijok. Glass sani ja·man glass sa rudaproroe ringen Bilrakde pekaba pekangengjok. Uni bel·belaba batrorobaaha. Ua Trogannaba rudrae on·aha, indiba ua jechakaiaha. Bilrak uni jechakdamana ku·rang rakbaaha. Nok nokgipa aro noksulrang knana kene Trogan glassko de·tome ringataiaha.

Robibar salni gilja joke Betchi ripengskarang baksa gittimni ramako re·baengachim. Trogan uamangko niksoon gisiko deldik dakaha. Nikjaora nikna sika, niksrangora kratcha·a ina gitan ua an·tangko donnuna biaprangko niroroengachim. Indiba ua mamingkoba daksrapkujaon me·trarang uamangni sepangona sokbachangaha.

“Oi, na·an Trogan ingipama?” Betchi ka·kame sing·aha. “Na·ara poraina re·bagipama, me·tra am·na re·bagipa? Troganma, Trojanma…. namnikja angade. Trojan nape nosto ong·na angade computer ong·ja!”

Gilja joke re·baenggipa me·tra maian ong·gitikjok! Pante aro me·tra dolgnian, uni inani ja·pang ja·dilko u·itokjae aiao inmanengachim.

Re·bagital, agittal mande mangmang me·chikni ku·sikchi inako man·on Trogan teng·enggipa salkon dimele nikaha. Uni a·gilsako rang·sanan mikka simgopangaha. Ua kratcha·a amchakjae wakidik mikkidik dakpilengachim!

Me·trarang janggilangon ripengskarang uko sing·dingdangna a·bachengaha. Indiba Betchi maina mancha inbildake donangaha Trogan u·ijae mamingkon aganchakna man·jaha.

Attamo nokona re·bapile saksan ong·taion pil·e Betchini kattarang uni nachikkolo gam·taiengachim. Maiba gualaniko dakmanahama chanchibee nioba a·selkon nikatjaengachim. Ua nangchakegni a·sel mingsakoba bikongkatna amjaha. Beben, ua inna man·ana kratcha·beaha, indiba gisiktango namnikanide matklotan dongkuja ina gitasan Betchiko dosi on·e chanchinade man·jaengachim. Maiaba u·isretgrikanisa uamang sakgnini gisepo dongpengenga ine ua gisiktango chanchie dongaha.

Manderangni agane on·aoniko knaani gita, Betchini bewalna mingsa dal·bee kenna nanggnia uni ma·a pana agane on·gnian ong·achim; maina Betchi je kattakoba ma·a pana joljol agane on·rongaiachim ina. Ma·a pachi saia-ina man·kuode baditan kratcha·taina nanggen ine chanchiani uko kenjagokatengachim.

Mingsani ja·man minggipinko chanchien chanchien ua poraianioba gisik on·na man·brejachim. Gisik suk ong·jaen ua cha·a ringanirangnaba simsakjapilaha. Uko ram·srokpile nikengachim. Gisikona bilding bildang ong·ani sokbaon unbaksa golporime ka·dimeatnaba Shillongode uni ‘best friend’ saksaba gri. Mai cholchi an·tango dos dongja ine Betchina mesokgen ine chol niroroaba da·onan man·kuja. Maini a·sel Betchi uko ka·onangpretaha ukoba da·onan u·ikuja.

Shillongona porainasa re·baaha, poraianion gisik on·batna nanga ine chanchianiba chanchianisan, a·sel chagrongahaon kam manchachi sokatnade una rakbeaha. Bilrakkoba nikade nikenga, indiba uko gelna jotton ka·engani gimin agangrikan dongjaengachim. Bilrakming menil stapa dakpile ripeng ong·ode dakstonggipa ramaona re·onangengasa ine u·ina man·ahani gimin uko bon·chongdikatna manchimanaha. “Nang’ Facebook inboxko check ka·kujama?” ine Bilrak uko changsa changgnimang sing·aha, indiba “Ka·ja. Facebook kulian gri” inesan ua seng·sote aganchakaiachim.

“Facebook? Inbox?” ua da·osa an·tango sing·manengachim. Ua uni laptopo dingtangmancha internet jakkaljaoba mobile phoneni GPRS-ko laptopo teke jakkalachim. Indiba mobileo internet pack bon·ahani gimin internet kuligijan ru·utkalahachim. Facebook aro Bilrakni gisepo maming nanggildeani dongja ine ua gisik nangjaha.

College chutti ong·engani gimin Trogan nokon poraie roengachim. Indakmiting chachaon Bilrak re·bae uoniko tangka hajalgni srona bi·aha. Hajalgni srona on·na man·pile uni jako baoni tangka donggen ine jechakbeoba Bilrak manijaengachim.

“Nang·o dongjaode jeonikoba sroe on·bo,” Bilrak dabichaaha, “Ong·jaode angade Facebooko Betchina nang·ni message seatako ma·gipa pagipana agane on·sranggen!”

“Mai message!?” ua jagoka gnang sing·aha.

“Mijao an·chingni ringe roo na·ara Betchina Facebook gita message watjama?” Bilrak intaiaha.

“Angade watja o·e!!”

“Na·ade watja o·e!” Bilrak ka·dingaha.

“Indiba nang·ni laptopo angni git wate romitingon na·ara angko aganaba — Betchina message watatbo ine. O·e, type ka·e watatgipade anga, indiba uara nang·ni Facebook accountsaba. Gong hajalgni angna knalni gisepo sandie on·jaode agane on·telaigen!” Bilrak agane re·angpilaha.

“Oh! kattade indakesa wenkone dongenga!” Trogan da·osa u·ibaaha. Chu ringrongpagija mandeni peka — haida pekmitingo maikoba aganmanbebeahama ine Trogan chanchiaha. Maikon aganmanjok, maikon messageo seatenggenchim! Chu mandeko indake kratcha·gniona galonna man·a ine ua da·osa nikatengachim. Groksa chuni a·sel chasongsa kratcha·ani ine chanchie ua dongtojabeaha.

Bilrakni re·anga tarimean Trogan internet caféchi re·anggalgale Facebook kulie niaha. Betchina Englishchi message watatako nikbebeon ua kattarangko poraie gisik jada ong·angpilaha:

U’re the prettiest baby I’ve seen in my life.
I’d trade my soul for a girl like you.
Muuuahhh!

AIAO! Betchina iako ta·raken u·iatna nanggen ine chakatprake internet café-oni ong·katbaaha. Betchiko gronge manchan aganna nanggen ine chanchie ua Facebook gita message watatpilakode ong·nikjaha. Janggi tanga gimikan dos dong·gijana matnangako chiltome dongna nanggen ine ong·katbaengon internet jakkalani tangkako gambanan gualpilengachim. Facebookoni log out ka·na gitik dako saniba message sokbaakoba ua kulie nibajaha. Kakketko aganode, ua Facebook-kon nidikjolengachim!

Betchini inangani ja·pang ja·dilko da·ode Trogan u·iaha. Ua matnangaoni jakgitel ong·na cholkode nikataha; indiba Betchi uni aganako bebe ra·genma, ua gisiktango sing·engachim. Betchiko bano, basako, aro maikae gronggen — ua chanchidamari somaiko galataigija Trogan ta·rake re·angaha. Ua me·asani kri an·tangni ka·donga dongatokko salchimonge Betchimangni nokchinan re·mikkangaha.

Ramarangni kosakko ja·ku ga·angengon an·tangara maiko dakna ba aganna nanggenchim, pilakkon gisiktango noksa sale, agangnirangkoba mikosto ka·angengachim.

“Dingdong!” Betchimangni soke calling bellko sikdepaton gam·angaha.

Do·ga oate nisogipara Betchini pagipachim.

“Ah! Bachinisa jong?” ua sing·soaha, “Mainaba re·baama? Napbabo, asongebo.”

Trogan uko mikkangchakgrike asongaha. Ua re·angani miksongako aganna an·tangko kim·kim mesokaha.

“Mama, na·ade angko u·ikujaenggen,” Trogan aganaha. “Angko Trogan minga; ianon dongenga, aiwa chibasal ka·mao – Kong Marweinni noko para dongenga. Anga ia bilsioni St. Anthonys Collegeo poraienga, BA first yearo… Da·alo angni re·baani miksonganide indakechim — Angni Facebook kulie donaoni sakgipin mandesa Betchina ong·ae ong·jae dake message watataha — angade ong·pajachim! Bilraksa watatana! Mijao Betchini angko inangoba angade ja·pang ja·dilko u·ipajae ku·ange dongaiaha, da·al Bilrakni aganpilana internet cafechi re·ange kulie niosa nikaha. Betchina uko agannasa angade re·baachim —angade watatjamancha mama!”

Trogan sorok rikamni footpathko re·angengon cement nagange donggipao ja·gitdotaha. Uni jutta ning·ani ja·si ja·dikahaosa an·tangara ramaonpitti ine u·ibaaha. Da·o gisiko bel·belenga gita chacha Betchini pagipani mikkango aganchakna pa·bebegenma — ua gisiktango sing·taitaiengachim. Jeba ong·china, Betchimangona soken re·na nanggen ine ua ja·ku ga·angkuaha.

Betchimangni nokona sokangaha. Do·gako dala tekachim. He!!! Manderanga bachitokjok? Trogan jajajiji ong·chae noksulrangoni sakoba sing·na man·arok ine niroroataha. Noksuloni saksa una agane on·aha.

Betchi, chutti ong·ani gimin pagipamang baksa un’ attamon night buso songtangchi re·angengachim. He! da·ode……… Mobiletangko nion bus re·chakatani somaiba ong·engjok ine nikaha. Trogan Polo stationona ka·oksie daariangaha.

Rama gimikan gari changketachim. Ua taxi driverko Polochina joljol re·china aganon gadorimskaranga Police Bazarona re·enggiparangsa ong·ani gimin jechakaiaha. Laithumkhrahoni Barikonaba gari danketaia. Barikoni Police Bazaronaba miksamang re·arin neng·takna nangtaijok. Police Bazarona soknan ru·ute somai nangaha.

Police Bazaroni Polo stationona joljol ta·raken re·angaha. Indiba rasong grie Turaona re·gipa night bus bolsakoba nikejaha. Dokkano sing·e nioara Turani busrang re·angaoni kontasamang ong·jok ine u·ina man·aha. Ua stationo gari chakka su·kange neng·takchakna taridamgipa cemento asonggope dongaiaha. An·tangni dosi grianiko mesokna aro Betchiko grongrikna uni chatimangbaa magnasa ong·aiaha. Ua mobiletangko sikdepdepe roengon ‘Betsey’ ine save ka·gipa numberko nikaha. Uni gisikona mingsa dake niani nabaaha.

Ua Betchini numberko sikdepataha, indiba maina aro maiko aganna sikdepatenga uko gisiktango tik u·ijaengachim.

“Hello, sawa?” ku·rang sing·atengachim.

Trogan aganchakna changjae off ka·ataiaha. Ua dikdiksa dongarin pil·e sikdepattaiaha.

“Sako nanga?” ku·rang sing·attaiaha.

“Hello, Betchi…. anga Troganchim…” ua aganna changningjaha.

“Trogan!” Betchi aganataha, “Ohh… Trogan, kemane, anga nang·o kema bi·na man·bachipjajok. Anga nang·ko indake inna nangjachim. I’m sorry, very sorry. Da·o maina ka·atengachim?”

“Ohh… amm…. mamingba ong·jaba,” Trogan aganchakaha, “Indiba anga nang·na aganna nangtela katta dongachim…”

“Oh, angaba u·iatengaba… ua messageni giminkonba? Bilraksa watatachimna?” Betchi sing·ataha.

“O·e Betchi, ka·sapae angade uko watatja chong·motne… angade da·alsa Facebook kulie nike nawang dakaijok! Anga nang·ko gronge mancha agangen inen na·simang nokchi re·angachim…. indiba na·simangan re·angsoaha…”

“O·e o·e… da·o Nongpoh soke dikdiksa neng·takpilengjok,” Troganni agana matchotgijan Betchi agansekaha, “Angaba da·siosa mangmang u·ia… Bilrak an·tangan aganata… Bia nang·o kema bi·na am·engana. Aiao! Trogan, I’m very very sorry ne…. Anga an·tangkon ong·sie nikengjok, gipinni kamni a·sel a·sel… Uara Bilrakni kattarangsana. Indiba na·ara angko….”

“O·e… Bilrak basakgalgal aro mai dakmiting somaion watataha angaba nikjaha,” janggilo ra·bita bal rang·san ritchenganga gita Trogan agansotaha, “Da·ode angko ong·gija dake chanchipanabejokne Betchi. Da·ode anga Facebook ingipakon kal·jawajok; deactivate ka·e donsranggnok!!”

“Maia!!?” Betchi jagoka gita sing·atskaaha, “Angni da·sio message reply ka·atgipana na·an aganchakkuja!”

“Mai messageko! Mai reply? Jawani messagenara maina reply??” Trogan jajajiji dake indiba ka·dongbatroroe sing·ataha.

“Haida, angaba name u·ija! Indiba na·a uko nina nangtelgenba!” Betchi aganchakaha, “Na·a angni replyko nina mangmangba Facebook kulipilbo! Ka·sapae! Jawani message ong·oba nang’ account-onin sokara sokbaa. Nang·ni…. Oh! Papamang re·baengjok! Bye bye hero! See you!” Betchi bik dake done mobilekoba switch off ka·jolaha.

Trogan mobiletangko nitate dongaha. Ong·gija matnanga man·aoni ua da·ode jokaha. Indiba Betchi Facebook gita mai replyko watataha, ua gisik ka·kit ka·kit dakpile u·ina sikbeaha. Sambajolon internet café kulikugen, ong·jaoba mobile phonena internet pack chiptaina nanggen. Trogan ja·ku ga·jitaha.