A·chik A·songo Baptist Youth Fellowship A·bachengani

---

Seming D. Sangma

Baptist Youth Fellowship (BYF),  A·chik Baptist Mondolirango chadamberangni dal·begipa bakrimgimin kotok ong·a. Da·alo ia dolo sak hajal sotdokna bate chadamberang gnang. Ian dingtangmancha mondoli ba ma·malni dol ong·genchimoba A·chik jat gimikni gitan itihaso bang·a mingnama kamrangko chu·sokataha. Ia dolko A·chik a·songo a·bachenganichiba chadamberangna dingtangmancha pattianirangko ra·baaha.

 

Baptist Youth Fellowship A·bachengbaani

1891 bilsiona kingkingde Baptistrangni ma·malo chadamberangni dol dongkujachim. Ua somoio American Baptist Publication Society-ni Executive Secretary, Dr. Benjamin Griffith, Baptist ma·malni chadamberangna dolko bikote kam ka·atna man·ode Mondolirangna dakchakbeani ong·gen aro mikkangchi mondolirango dilgiparangkoba tarina man·gen ine nikaha. Indake Dr. Griffithni jotton ka·anichi 1891 bilsini July jao Baptist Young People’s Union of America minggipa dolko ong·katataha. Uan mongsongbate panterangni dolsa ong·achim.

1915 bilsio Americao World Wide Guild (WWG) ba me·trarangni dolko bikotskaaha. Ia dolni minggni miksonganiranga — (1) Baptist ma·malni me·trang Isolni Kattako gipatanio bak ra·paani, (2) Mondolio me·chik dolko bikotenba me·chikrangni mongsonggipa dakna nanggnirangko chu·sokatani ong·achim. Baptist Young People’s Union bilsi 50 aro World Wide Guild bilsi 25 ong·ani ja·mano, ia dolgniko ra·dimenba dolsa dakate kam ka·na man·ode nambatgen ine mitam dilgiparang nikaha. Ia namgniko niksamsoe dingtang dingtang Baptist Mondolirangni chadambe delegaterang 1939 bilsini December jao Denison Universityo Baptist chadamberangna dolko bikotna chanchirimaha. 1941 bilsini May jao American Baptist Convention, Kansas Stateni Wichita songjinmao Baptist chadamberangni gital dolko bikotna ra·chakaha. Indake 1941 bilsini December jao Indiana stateni Frankline Collegeo Baptist Youth Fellowship (BYF)ko a·bachengataha, aro ian Baptist ma·malni pilak chadambe-rangna tik ka·e dongimin dol ong·aha.

A·chik A·songo Panterangni Dolni Atchiani (1864-1900)

A·chik a·songo panterangni dolni a·bachengani 1864 bilsio Ramke Watre Mominni Damrao skul kuliaoni dipet ong·baaha. Ramke aro Omed mamasa 1863 bilsnini February 8 tariko Guwahatio Rev. Miles Bronsonni jakchi napbolatako man·aha. Uamang 1864 bilsini March jao songtang jolona re·bapile Nama Kattako manderangna aganprakna a·bachengaha. Ramke Damrao donge panterangna skul kuliaha aro Omed Matchokgre jolo wenroroe Nama Kattako skiprakskaaha.

1875 bilsini April jao Rev. T.J. Keith Goalparao Sobako ka·dilchengaha, aro uan Dal·gipa Krima (DK)ni atchiani ong·a. Ia Sobao panterang dingtang tom·ama tom·ja maming serikaniko nika gri. 1899 bilsio salaramchi donggipa Mondolirang Bakrima Sobako ka·skaaha aro uan Krima IIni a·bachengani ong·a. 1900 bilsio Saliram Am·beng jolni Krimako a·bachengatskaaha. Krima III-ko basako a·bachengataha u·ijaha, indiba uan Dambukko 1897 bilsio Mondoli songani ja·mano ong·na nanga. America a·songo Baptist panterangni dolko 1891 bilsio a·bachengahani gimin ia Krimarangni a·bachengaonin panterangni tom·aniko ong·atenggen ine chanchichipna man·a; maina American Missionaryrang jeko Americao daka ukon chu·sokatna jotton ka·rongachim.

Baptist Chadamberangni Kam (1901-1919)

1905 bilsio Rajasimlao Soba Dal·gipa tom·bimonganiosa skanggipa Krima ge·brini panterang dolsan dake tom·aniko ong·atchengaha. Uamangni dolo adita tangkakoba chimongaha. 1906 bilsio Resuo Soba Dal·gipa tom·bimonganio memberrang sak 3,395 aro tangka gimik gong 4,572.76 ong·achim. 1908 bilsio Okkaparao Soba Dal·gipa tom·on panterangni dolko name mangrakataha. Ia sobaosa Padot aro Dakchakgipa Padotko panterang seokchengaha. Uano Padotna Redin M. Momin aro Dakchakgipa Padotna Riksan Mominko seokaha.

1908 bilsini May jao Turao donggipa panterang tom·e, A·chikrangni ganding chindingrangni giminba chanchigrike, A·chikrang maikae ganna chinna nanga Garo Hills gimiko donggipa panterangna u·iatskaaha. Uarangoni mongsonggipara, A·chikrang lengti, gamcha, gando aro dhutirangko ganrongachim. Indiba iarang kam ka·anirango kengsi kengdang dakata. Uni gimin, pilak daken nitoe nikgipa pentalun (half pant) aro bil amgiparangde longpantko ganna nanga ine chanchigrikaha. Jattangko silroro-namroroatna jatgimik basakoba chanchirimna nanggen ineba tik ka·aha

1910 bilsio Derek songo Soba Dal·gipa ong·on Missionaryrang namnikode aro Sorkari Entrance Schoolko (High School) kuliode an·tangtangni tangkako School kulina on·pagen ine panterangni dol ku·rachakaha. Apsan bilsini August jao Shillongo poraigipa Ramsing N. Sangma, High Schoolko kulina sakprak pelprakko on·patokchina panteskarangko ku·mongataha. Ia apsan mandean Turao High Schoolko A·chikrangna kulina janggi tanga gimik krengstapangaha.

1915 bilsini bijatchimango Turao poraigipa chatrorang Young Men’s Christian Association (YMCA) baksa bakrimaha. Indiba Indiani gipin YMCA dol baksa bakrime uamangni kam ka·anirangkode mamingkoba serikani dongja. Apsan bilsion panterangni tangkako jakkalani bidingo dongimin committee Turao chanchitaiaha. Uano chanchie tik ka·anirangara: (1) A·chikrango B.A. pass ka·gipa dongjaengani gimin saoba matric pass ka·gipako collegeo poraina panterangni tangkachi dakchakgen. Ua B.A. pass ka·ahaon sakgipinko korostangchi dakchakskachina. (2) A·chikrango skulo poraiani ki·taprang dongkujaengani gimin ki·tap segiparangko didina aro uamangni segiminrangko chapa ka·e on·na panterangni tangkako jakkalgen. (3) A·chik Mondolirangni bilgrianirangko champengna aro uamangko bilakatna pamongrangna dakchakgipa manderangko rakkigen. Indiba ia kosako chanchigiminrangoni mingsaba chu·sokjaha.

Skanggipa Dal·gipa Dakgrikanio (First World War) France a·songona re·anggipa A·chikrangoni bang·batan panterangni doloni ong·achim. 1917 bilsini December 9 tariko 69 Garo Labour Corps, India Labour Camp, Franceoni, uamang songtang-ona sokpapilon an·tangtangni man·gni tangkaoniko Garo Missionna on·na ba Procharok saksako rakkina ine Soba Dal·gipana chitti seataha.

1901-1919 bilsirango panterangni kamrang bang·bataha ine nikna man·gen. dilgiparangba skia man·gipa aro Americao poraigiparang dongani gimin uamangni dol mikkim gnanggipa ong·aha. Jobang D.Marak, Modhunath Momin, Bosin Momin, Ramsing Sangma, Tawaram Marak, Redin Momin, Sinjong Momin, Jonsing Marak, Rangam Momin aro indake namgipa dilgiparang ua chasongo ong·kataha.

1920 bilsio Tura M.E. Schoolko bak 2 dake sualaha. Me·chikrangni schoolko Mission chalaiangkuaha aro me·asarangni schoolko Sorkari ra·aha. World Wide Guild, jekon 1915 bilsio Americao a·bachengahachim, uko Mission Girls’ Schoolo Missionary memrang a·bachengataha. Ia WWG, Christian Girls’ Higher Secondary Schoolo da·alonaba dongenga.

1930 bilsini ja·mano panterangni kamrang adita tang·dotaiaha. Skia man·gipa dilgiparang, jekai Jackson S Momin, Wilson K. Marak, Sudhindro K. Marak, Bronson W. Momin — iamangan ua chasongni dilgiparang ong·achim. 1934 bilsini Soba Dal·gipao uamangni report on·ani gitade panterang Printing Press Fundna aro High Schoolna tangka chimongaha.

1932 bilsini May jao Rev. V. W. Abbey Turaona re·bae pante-me·trarangna dingtang Christian Endeavour (CE)-ko a·bachengataha. Turao CE-ni dilgipara Rev. A.F. Merril ong·achim. Missionaryrangoni bang·batan CEni memberrang ong·achim aro uamang ia dolni tom·anio dongpana Indiani bang·a biaprangchin re·rongaha. Assamese giljarangode da·alona kingkingba CE dol dongengkua.

Garo Hillso BYFni A·bachengani

1945 bilsio Rev. Randall Turaona re·baaha. Uni re·bachengaona kingkingde Garo Hillso panterangni dolsan dongaia aro gipin a·palni dolrang baksa bakrimpaanide CE baksasan ong·aiachim. Ua A·chik pante me·trarangko dolsan ong·atna aro mondolio dilgiparangko mikkangchina gisikni gita tarisona ine Baptist Youth Fellowship (BYF)-ko Turao 1948 bilsini October jao a·bachengataha. Rev. Randall aro Jackson Momin chonchongipa gitrangko A·chikkuona pe·e pante me·trarangko ring·dilaha. Unbaksa, Gauhationi CBCA Youth Director, Rev. Edward Singha aro Rev. R.G. Bears Turao antisa donge pante me·trangko an·saodilangaha. Ia dolko 1949 bilsini February jao Santipur Mondolio Krima II-ni tom·bimongo Soba Dal·gipa ra·chakaha. Indake ua bilsioni dipet BYF A·chik a·songo a·bachengaha. Rev. Randall BYFko a·bachengate A·chik chadamberangni bebe ra·aniko tangchaoatpiltaina man·genchim. Indiba ua BYF-ko name dakdilangna somoi man·jaha, maina ua 1950 bilsion Americachi re·angpilna nangaha aro Indiaona re·bapiljaha.

Sandie nikanio BYF 1980 bilsirangoni dingtangna a·bachengtaiaha. Skia man·gipa dilgiparang ong·kataha. Teseng G. Momin Hongkongo poraie re·baaha. Unbaksana Lindrid D. Shira, Webstar A. Momin aro uamang gita dakgiparang BYFko re·dilon namen an·sengbatrikrikaha. 1988 bilsio sak 12 skia man·gipa A·chik chadamberang Glasgow songjinmao ong·atgipa Baptist World Youth Congress-ona re·angaha. Uano uamangni Wangala Danceko BBC Channel gita United Kingdom gimikon watataha.

Rev. Randall-ni jumang da·alo chu·sokaha. Toromni gitasan ong·aigija, skia poraianiko didina, ong·sie janggi tanganirangko champengna kamrangko ka·enga; songsalo rongtal-an·tale janggi tanganikoba skie on·enga aro chiring chibisikrangkoba tange rakkina ku·monganirangko on·enga.  Indake BYF A·chik Baptist mondoli gimikon chadamberangko dilneng do·mikna chiru-a·gatna kamko ka·gipa ong·baaha.

(Chimik Vol 6 No9, November 2013)