India-ni national bird do·de (peacock) ong·a. USAni national birdko American Bald Eagle minga. Bald kattani ortoa ‘sko tala’ ine an·ching u·ia. Indakode Americani national bird sko talama? Talja. Ua do·gamdotni be·eno chagipa kimil gisimprang daka; uni sko, gitok aro ki·meni bakoba gipokgipa kimil namen chaa. Indakode mainasa ‘Bald Eagle’ mingskaa? Iano jakkalgipa bald kattara balde ingipa chengoni English kattaoni ong·katskagipa katta ong·a. Chengode balde inon gipokako miksongachim. Uni gimin, achak gisimoba uni ja·arang gipokode A·chikrangni uko ‘Ja·bok’ minga gita American Bald Eagle gisimprang dakoba uni sko, gitok aro ki·me gipokani giminsa uko Bald Eagle mingbaaha!
