Nomilming Tudraata

Fiction by Kalbin B Marak
Published: Jarongpang || Vol 1 No 2 || Dec 2017

Wachi ra·gatmanjok, Asanango Hundred Drums Festival ong·manjok; sin·karini ka·sinjrim ganggopao attam rona an·sengbajok. Boksoriri me·gong bibal balkrime, ge·a pattalo misari rimitjrijri mintokengaha. Sal napsrapgijan sin·srik dakbae,  attamo ripamchi chripchrip dakon, pringo guuri mitmate chel·kalachikode nikatmangja. Songoba bia, Turaoba bia — gitap gitap. songantion ina gita gamgiparang bilsini jakma ba·kutangtangko rana kusian gape nirokrokenga. Indakmiting salrango an·senge roani a·barang bang·an baksa porikana tarisonaba nangmiting.

Adita bilsirang re·angaha, salniangon anga dumbell de·e roani ja·man au-miksumane nokpanteo roengachim. Krismas ong·kuja baksa porika ong·na aditan somai dongkuengani gimin amasongba angko Turachi watatpilkuja, nokon donge poraichina agane donmiting. Attam simsimna gitiko angni ripeng Simpru prot dake sokbaaha. Chonaonin angming kal·rim-rorimgipa troska ripeng, bimingna ma·ate mande sakgisim. Aunan aratgipa mande un’ attamode kni matchu cha·sraka gita, overcoat gane nabaon bachiba re·na taribaaha ine u·isoaha.

“Hai, Kasi A·dapchi,” napsrapgijan bia cha·na re·na ine angko mong·aha. Mikchatang Walchinako grongna! Bia cha·na inade angko rimchapani kattasa ine anga namen u·iachim. Re·na gong·ja gong·ja inoba ua jetjete dongaha.  Turao poraiani gimin ua angko smart ong·nika; indaken jechi jachi re·oba angko rimronga. Jechakdamna sikjaha; ka·machi motorcycle donako nionate, petrolni obostako anga sing·aha. Uming songreon maiba majaba ong·simaia — dimchang a·changrango petrol bon·change gitchiakode chansokjajok. Pokpekpilaia inani gimin anga sing·dapjaha. Bia cha·na re·enga inani gimin anga okkrisiksik dakbaengahaoba noko mamingko cha·gijan ong·katangaha.

Attam simsimango chinga Kasi A·dapona sokeaha. Bebejokai! Song nakuramni ramasamo Walchina ripeng rimbite, bolpileng datkapao asonge sengsoaha. Chingni soka tarimean salam ka·soaha.

Seng·a aro andalani ari tiktako ong·miting; indakmiting somaiode namja ine A·chikrangba golpoa. Mitde-me·te ong·katmiting; matcha jol·u batsotmiting. Indakmiting chachaode namja, badeangsrangako sengna nanga ine wal·timo golpoarangko bi·saonin knabaa. Mitmit-matmat, mandekora nika mikkangara talja. Me·chikrang an·tangtangde bolpilengni jatchiona sinchepgrike chingna jakra jakasi rikamo asongna biap on·aha. “Walchinani ripeng?” asongangmitingo angni gisiko rang·san tik dake kenani nabaaha. Kensrapjaha! Asongaton angni gisiko kenenggipa chachamingan pakkre su·tinggrikjok. Aiao! Walchinaming dongpagipa me·chikara angko skangonin namnik-mikchastapgipa Rikmanchisa!

Rikmanchi — nitoa daknanga, mathematicso letter marks man·ronga. Angni matric ga·bate Tura doangna skangde Rikchi ma·detangming donge chingni skulon poraia; angni class 10 ong·o ua class 8-o ‘Wandering Singers’ poedokon poraikuengachim. Ango maia gunkon nikjok, Rikmanchi angkon nitatsimaia, rasong on·e, de·kadange agansimaia, recess ong·arikkitan cha·ani cha·na okamsimaiachim! Skulo poraimiting, adalna ku·angmiting — cha·ani ra·e on·akode kusian kusi cha·bebejok. Indiba, rorimrongoba cha·ani bikma ning·chi napangana agre Rikmanchina il·ikade angni ka·tongona jakskil rarepa gitaba napanga grichim.  “Rikmanchi ni re·pakode kni biba gingkolo napangon be·en gimik maibadake karen sala gita ‘dirrr’ dakrika!” ine gipinrangde agantoka; indiba angade biba man·rongenkon — rektek, mamingkon u·ija. Skul jokoba Rikmanchi “Babye…. Mmm—ma” inangronga; jeni ortokon angade collegeosa u·iaijok!

“Manderangni agangipa boyfirend-girlfriend ingipasama, ra·na dongnan dakengama?”

 

Aiao….! Bilsi gittamni ja·mano ua apsan me·chikkon grongtaie, ramasamni bolpilengo pakkre natgrika gita asongengon anga jumang me·mang dakbaaha. Angaba skango adalna ku·angmiting salrangoni dingtangbejok, ja·deljok, u·i-ma·sijok, BA poraipilengjok. Angni ka·tong kenenga gita dikdika ta·rakbaaha! Indakmitingon Rikchi nangchape asonge, “Aiao, chiktota!” ine angni jakko roprope roengachim. Amawai! Anga changangjaha; jakko sale katoba rim·pilaia. Indakmitingon gisikona chanchiani ming hajalna bate sokbaenga gitachim. Paksachiko niaton Simprumangde salgni okgimu chakaha gita chacha ong·engachim. Kenani angoni ekangaha; anga ka·onange a·ako bilgimikchi ga·timaha. Indiba, indakmitingon kenani chumbuk salopa gita sokbapilaha.

“Sawarang na·songara? Ha, sawarangsa?” rongreng rongreng chingchipakan mikkangbae dokkan ki·sango chu ringgipa me·apa sa·rongrangoni saksa krengbaaha. Uni ki·sang ki·sangan saksani ja·man saksa dake ong·katbatokaha. Uamang chingkon duulbaon gisiko mairongachim anga iano talatnan changja.

“Chingasa na·a, gume…” jaja jiji dake Walchina aganchakataha. “Ia angni ripengrangsaba. Bia cha·na re·baasa…” Walchinani gumetang! Da·o mai ong·gen?

“Bia cha·na? Ianosa bia ka·engama?” Chingni sepangchapon  chadenge rang·dateaha, “Bia cha·na re·bagiparangma bia ka·na jom·bagiparang?”

“Iano nomil pante rona man·jawa ine signboard tape donako nikama nikja?” Chingko janggilate, ramasamni chikareo su·budangdange sakgipin gitok sakselpile rakataha.

“Songni rama dual aro dokanrango chu palna aro ringna man·jawa ineba signboard-o seakonba….” Simpruni aganmitduengon jrip dongchina Walchina jotdikataha. Maiba ku·sachi rakkale aganchakode obosta namjabatgen ine niksoengachim. Uamang sakantian pektokaha; saksade wakgaljol tujol —

“Manderangni agangipa boyfriend-girlfriend ingipasama, ra·na dongnan dakengama?” Uamang dama rikkanga gita, jinma ongrima gita chingko rittap rittap sing·e roaha. Saksamangba mandesal ong·jaha, nama bewalo aganchaktaitaioba namgnian dongjaha, batesa gongge gongwat agane toding su·ding dakaha. Pekgiparangoni saksade Rikmanchini wanggipa ine anga u·ina man·aha. Ja·chi jakchi sokato jaksikatskaode uamang mamingan ong·angjawa, ka·onange rang·sitani angona sokbapilaha. Jegita ka·suangani ba dukni sokbaoba anga okkriakode u·itelaia, cha·napaba cha·napaia. Okkriahaode angona ka·onanganiba sokbana man·aia. Indiba sal somairang namja — angni chanchina changani gisik paksa peng·pangskaaha. Pekgijagipa gipin manderang sokbao talate on·aignok ine angade jrip dongsrangaijok. Simprude  ku·sa ku·gni rakkale aganchake apsa apgnide nateng man·e ra·aha.

Ma·a-paana u·iatna aro mesokna nanggen ine chingko rimangaha. Name talatna man·gnok ine anga jechakjaha. Simpruko Walchinamang nokchi gumetangan joljol rimangaha.

Nok sepangangon, aiao! — mande so·otgipa ba cha·ugipako bichalona rimangenga gitasa angko samtangtangchin jakko rim·ketesa dilangaha.

6 bajimango Rikmanchimaangni nokona sokeaha. Waltingkujani gimin ma·gipa pagipamang wal·timon rokuengachim. Wal·timona sokeon ma·a-paana name talate on·na ka·dongsoani dimelangpilaha; maina Rikchini pagipaba unon botol songdosoengachim. Uaba chingko dilanggiparang gitan ong·aijok! Jeba ong·bo, gipinrang re·angahaode anga kattimbangaignok inesan anga niwilwale dongchengaha.

Indiba angni chanchisoa gita ong·jaha. Rang·gitik sakbonga sakdokmang me·aparang sokbadapaha — Rikmanchini mama-ada nanggiparang! Da·o ringgipa pekgipa gimikan dikdiksana jrip jrip; sokbagiparang ong·mikkang Krismasko aganjole asongtokaha.

“De Rikmanchi, mi cha·dilechengbo,” ina baksa angni knabregija kattarangko da·sio chu pekgipa Rikmanchini wanggipa mikselbeen aganaha. Aia!

“Hai boning,” sokbagital dambe me·apa saksa rinok rinok agane angko babilsichina sikduduangaha. Babilsiona napninggija anga ua mandena talatna jotton ka·beoba ua, “Ong·aiaba boning, ong·aiaba…. Angade namen kusi ong·a. Hai mi cha·chengbo, angaba cha·genba” inesan aganchakaiaha. Rikmanchide jegita aganoba  mamingkon aganchaka gri,  Unomiting angni gisik samsachide gitduenga gita indiba samsachide “Easy, easy…. Cholko niroke joke kataibo” ine balnamatenga gitachim. Uamangni nikaniode anga nomil rodilbebejok! Gipin songo indaka ramramde ong·ja baksa maidakgipa manderangan dongenggen: bikpil chupil chanchina nangon pagla ong·na gitik dakpilaha. Angni mobilenade uano networkba gri: unomitingde bang·a biaprangon man·kujachim.

“Su·buna re·chengkunama….mosa,” anga boningna ka·sine agane chol am·ramaha. Babilsini sambengchipak bathroom gnang, ning·chi napange anga ga·krange su·bujoljol chanchibeaha…. chanchiade arara. Baditan ru·ute ning·chi nape dongaha anga u·ipiljaha. “Miksrang…. Miksrang, maidakenga na·ara….. Oi?” do·gako taktaka aro Rikmanchini ku·rangko knaosa anga jeans zipperko saldoaha. Ong·katbaon mosa baksa sakgipin pante do·ga mikkangon sada nol·joljole sengengachim. Rikmanchiba gana chong·dokdok ganasajok. Ua angna towel chonako on·aha. Mandeko su·atna gitik anga towelko ra·chake a·palo salang walang jokenggipa rubber hose-ni chio jaksu-miksue mikkangtango ipakon gisiko maibakae mangrakaniko man·dapa gita nikaha. Knikoba chi on·tisachi rim·milaha. Uanon mikchipe ga·krangkue, ro·e rang·site, balwako second brimangna rakkie uko ka·sine watpilaha. Changbrimang indakani ja·mano anga power man·ahakon!  Jehok jahok, anga jacketko oke ra·bitaha, aro an·pile ja·ku ga·gengwangbae towelko Rikchiona godapate, mosamingan babilsichipak re·angaha. “Achak bi·sa dake namgni griwa, ia me·aparangming gro jesranggen,” anga jacketko kang·kareo katongaha.

Okkribeengjok, aro chol man·ahao katna bilkode nanggen: anga babilsiona napangaha. Indiba tebilo totmare-kingmare sachisoako nikon anga ka·onangbee nitataha. Gittimo bia donga — indita ming bijakrangko maina song·genchim? Uade mai, sachakani ge·antion angni namnikbatgipa bijakrangsa! Uan maidake ong·na man·a, aiao inmanbeani ong·oba anga aiao inmanjaha. Rikmanchi angni namnikgipa cha·anirangko, bijakrangko u·ia. Ia pilakan tarisamsoani gnang!

“Oi Rikmanchi….. na·a mai dakmanchaenga wai??? Iaranga……” Indiba, “Aia! maisa boning,” angni gangchengbaon mosa agansote angko sikgomtaiaha, “Hai, cha·chenge jekoba dakgenba.” Doctor check-up ka·o rang·site on·a gita ka·sopo balwa gape adita chang rang·site anga chokki be·na am·pile asongaha. An·tangkon u·irikjajok! Ka·onangen cha·jokma mai dakama, e·salo tepa palsako bon·ango Rikmanchini pe·dape on·akosa nikaijok. Aiao! Gotai! Anga pil·tai Rikmanchini adalnan ku·angtaiaha! Cha·ade cha·a wang·atsrangaijok; nokoba anga mainaba ka·onange cha·ode mi song·taina nangronga. Mosade basakgalgal cha·mane ong·katangjok, gue pan ra·bae angni sambengo asongepilakosa nikaijok.

Wal·timona rimangtaion asonga minitsa ong·srapgijan sani depante sani rikmatchu sing·dingdangtokaha. Uamangni sing·arangko dokpenggale chong·mot kattako mama-adarangna name talatna ba·ku ra·angengon Rikmanchiko okamattokaha.

“Angade namosa Salkipa, namjaode wal·kipa! Na·simang sakgnian u·ibone Rikmanchi! Indakpile jechakenga….. na·ara maiko agangen?” mamatang ku·simangcheng dakgipa a·a mopile krengaha. Rikmanchi ki·tap ra·bita gnang asongchong·kome grapaha.

“Iarangko nibo, mama….” Rikmanchi adita photorangko dape donako ma·gipana on·ataha, “Aro ia SMSrangkoba nibo.” Aiao! Aiao! Mai photorang, mai SMS!!!

“Ohh… skulo poraimitingon nang·na chamoschi mi du·e on·jok! Bahh….Kuch kuch Hota Hai styleba photo ka·pilasa!” ma·gipani kattarangko knaon anga skulo picnic cha·chotako gisik ra·ataha.

“943_________” iara nang·ni mobile numberanma jong?” saksa ka·sina ku·rangchi sing·on anga an·spu nabae aganchaknan changjapilaha! “Aiao! Maiko nidapgen iarangko; pante me·tra katta watgrike roasa! Ha ninakode,” Ua mobileko sakgipinna on·atengon anga chakatprake ra·sekrikaha. Aiao! Salgi a·sak!! Angni watatgipa SMSrangan bebe! Ka·onangan suake anga mikkang ki·sang chanchisranggija Rikchiko gitoko rim·e sikruruangaha, indiba niksrapgijan angko sakgni sakgittam rim·tataha.

“Ia walba wal! Da·odipet anga namjaoba chakchikkuengane,” angko todingdinge mamatang ku·simangcheng ka·onangbee indataha, “Indita sakkirang  dongengo na·a jechakkuengama? Chinga nang·ko name sing·e sane niengachimba. Sala! Chingni noa-namchikde sostama?”

“Knalo kring bidilko sandiange kam ka·gen,” ua aganangkuaha. “Da·alde katta dongjajok; chekkeo gaaha, koksio chipe don! Intangode namjawa. Rimangtok!” mikka kim·preta gita agane ua Rikmanchi pagipani ki·sangchi botol dongipako chi bringija songtekataha. Panterang angko gipaktoke nokchina rimnapangaha — aganan aganjok, Rikmanchini turam! Rikmanchini napani ja·manode do·ga chipani gam·ako knaaha.

Kalbin B Marak

………… BON·KUJAMANCHA!