Refereena Red Card

Martin K Sangma

Pringchibara Dikkini robol tingdoatara salgimikan salgionjok!. Attamo sal do·bret ki·sang dakangosa ga·akonbaaha. Uko head ka·soara jonggipa Bandini sko bigilaan gilgappilskajok! Chel·aoni nigiparang namedake u·ijaeming ukon ‘skoo rumal kae kal·a daka’ inesa rokomari intokskajokna. Katta agangiparangni aganbadean bilonga, indiba knatimnade su·ugipa ong·a. 

Mahari meeting, song melaa, mande sia, bia ka·a — iarango manderang tom·daka. Rokomari katta aro golporangko knanaba man·bebea. Robol kal·aoba manderangde bang·en tom·daka, indiba robol kal·a nio na·a maidakgipa kattako knana man·bata? Nang·ni songo ba sepangjolo robol kal·engode uanona re·ange knatime nibo. Kal·ramko duule nienggipa mande jinma maiko agana? Namana bate namgija kattaan bata; mandeko intekani, solani, ja·a besotatani, chonnikani, niam ong·gijako dakchina didiani, bamchakgija dakchina ka·a ding·doatani kattarangkosa knabata!

Saoba chrikatgen, “Tingsotatbo uko, agre bahaduri dakgipako.” Sakgipin aganatskagen, “Maina nie donga rough kal·gipakoara, dangniataibo.” Sakgipin a·bokatskagen, “Aiao! indakakon chipjama? Agrejok!” Badiaba noksiko asonggipaba a·bokatgen, “Kanama, indake free man·akon chipgijagipara?” Samgipinchini sakgipin aganatskagen, “Kal·na changjaode ong·katsrangbo!” “Mai nonsense-na carry ka·a dake gala; goal cha·na sikengama?” ine saiatakoba basakoba knagen. Badiaba somaiode saoba chrikatgen, “Mikklengma ia referee-ara, hand nangakoba sikgijagipara?… Refereena red card on·at!” Unon saoba badekale aganatnaba donga, “Man·e ra·na bang·jaha ia mikkang nigipa referee burbokde!” “Maidake goal chipnan cholitektekja na·simangara?” ineba mandetangrangna chake agangipaba basakobade donga. Basakobade indake aganakoba knaa, “Goal keeper tongtong tingatoa goal ong·pagenma? Mande donggijachisa ga·tingpaboda.”  “Goal keeperan mamingnan cholisrangjade iara!” ine chonnikakoba knagen. Kal·ram arijoljol nisan ra·bite kattimgiparangba sakgnian saia man·aonide jokrongja. Basakoba knagen, “Offside-koba nikjama linesman??” Basakobade mitam manderang gando kancha ganatgija ku·atogija kattarangchiba saigamgamataia. Mitamde doltangni mandekon, kal·rimskaan jebasi ong·sigipa kattarangchiba saiataia.

Bandi skoo rumal kajachim; ukon nigiparangde u·ijae jebasi agantokaha. Jegita bilak wa·saoba sko bigil gilgappilahaode biaba saknaanide dongpaenggen. Kal·giparangde da·nang, jinmani chrik-a·boke inteka gimikko knatimna somai dongja. Mitam kattarangko mingsa mingni knaoba uarangna aganchaknaba kal·mitingo chol man·paja. Jinmani aganenggipa kattarangko nigope chanchiode, kal·ramo ong·kate kal·enggipa sak 22 kal·naba changja, goal chipnaba cholija, mikronba nikja. Uamang nonsense, burbok, hopeless, mikkleng, kana, cholitektekgijagiparang aro unbaksa refereeba changgijagipa, sapgijagipa kanasa ong·rongbataia.  Kal·na changbatgiparangde da·nang, nigiparangsa! Robol kal·ako nimitingode jeba jekoba namnikatangtang saina man·aia ingipa gita ong·pila!

Manderang agana: “Cha·aniko chikkape salruruangenggipa chibrimrangna batede alni kosako gadoe re·angpagipa chibrimrangsa neng·bata.” Ian agane roani kattasan, indiba robol kal·ako nigiparangni kam baksa  apsan ong·a. Jinmani kattarangko knaode, bebean, kal·gipa-rangna batede aganatenggipaan changbatgipa ong·na nangbebea. Indiba indakgiparangko kal·atskae niode mai ong·genchim?

A·we jolode wachikario pattal gamgipa ge·giparangba neng·a-saa ingija attamchibarade robol kal·a nina katangtokaia. Dal·a chona, me·apa me·chikma — aro pante me·trarangkode maiko agansrangkuna. Song·a rita babilsini kamrangkon sket bakket dake, robol kal·a ninade nomilrangba daariangaia.

Chang·sao biap damsao angni sepango chadenggipa mandeba kal·gipa saksako indake saigamatjok, “Indake su·dikna nangaiakon chipjaode mai burbokna hire re·basranga!” Uni ku·rang rake chrikana nioa ua an·tangde ja·a samsa chonbata; rama re·nan jentensa! Nibo, bia an·tangde robolkoan kal·jaenggen indiba kal·gipakode burbok saiatna manaia — maina saina, inna aro solna ba chonnikna tangka nangja!

Da·o kal·enggipa 2018 FIFA World Cupoba nigiparang indaken namgija kattarangkon jakalenggenma? Ia kal·anirangoba an·chingni songadamni manderang gitan robol kal·anio namgija saianirangkon jakkaltokode kal·giparanga an·tangtangko saie rochinasa kal·ramona ong·kate on·enga gita ong·aia.

A·we jolode wachikario pattal gamgipa ge·giparangba neng·a-saa ingija attamchibarade robol kal·a nina katangtokaia. Dal·a chona, me·apa me·chikma — aro pante me·trarangkode maiko agansrangkuna. Song·a rita babilsini kamrangkon sket bakket dake, robol kal·a ninade nomilrangba daariangaia. Me·chikmarangba bi·sa angde jaksambal gnangmangba robol kal·akode niaia. Ia me·chik dolrang kal·ramni badiaba bako bang·kale tom·dakesa nirongbata. Saksa robol kal·rakgipa agana, “Me·chik jinma chrikatjokode an·tangkoan katna ta·rakbata gita nikpila; tingsotrikoba sabreja.” Uni ortode kal·gipaba me·chikrangna balsalade dongakon, uni giminsa sa·dikoba bewalkode chakchikaiakon! Mitam kal·giparangde bachi me·chik jinma donga uchipaknarongrong ga·tingsima dakaia.

Skangni salrango Rome songjinmao, rim·gittanga aro nokkol itako man·gipa manderangko mandeska baksa, basakoba matburingrang baksa niramo dakgrikatachim. Dakgrikaniko nina a·songni raja, rani aro dal·dalgipa manderangba tom·daka-chim. Indakgipa dakgrikania bang·bata changon mandeska ba matburing baksa ong·oba saksasikko mangkimao bon·chotachim. Indaken Nero rajani chasongo ong·chenggipa Kristianrangko bang·en so·otaha. Susaanio chegipa mandena basakobade janggi tangkuani cholko, ong·jaoba nokkol ong·aoni jakgitelaniko on·a. Indiba badiaba manderangkode so·ota man·kujana kingking sakgipinrangming dakgrikataitaia. Mandeskako ba matburingko mangkimana man·ode nienggipa jinma kusi ong·e chegipana jakpa doke chrik-a·bokachim. An·chingni songrango indakgipa obostaona kingking ong·atjaoba robol kal·ako nienggiparangni kattarangde chengo Rome-ni manderangni chrika gitan, ama man·gipako chonnika gitan, chegipana kusi ong·chake chrik-a·boka gitan apsanangaia. Indaken nigiparangni kattao pangchake, basakobade kal·giparangba dolgipinni kal·giparangko ong·siatna jotton ka·e, dolsa dolgipin baksa dokgrike kajia ong·ani, nigiparang jinmani chagrime dokruruani, aro songsa songgipin baksa meli-nangrimgijanirangonaba sokronga.

Published: Chimik | Vol 6 No 6 |Nov 2012
(Updated Version)