Atchuni Agana

Kroshnil Sangma

Wachi ra·gataha. Salgi bangbang, aram gri tangsimbit nikachim. Pring salchugra sal wa·sabaaha. Atchu nokni grimra mikkango maikoba kongsi kongdang kam ka·enga. Atchuni bilsi 70 mang ong·gnok. Mande chagitchamna kra kra mande dokroa aro chananga. Kni matram pe·aha; ja·meapa chaaha; mikking chachura bon·e go·okjok; mikskim chu·a unia miksimil dika. Uni mikskimni miksimil ripit ripit bokan me·apani mikkim chaako mesokachim.

Ambiba atchuko bilsi rika rika dakaiachim. Indiba atchuna bate nom·bataha. Mikron samgnini biteo mikmarang supripdape mikron nikjaha. Jako gol·dik chale, gol·dikchi su·dikdike noksam nokgil ong·kate roana agre, ua noksul nokripeng roamna man·pajaha. Pringo sal ding·bom dakbaon uni demechik nokmikkang sa·raona dilongkate sal chakatrongachim. Ambi mikron nikpaje, minganti nanganan sakgipinni dakchakako nangaha. Ua gisiko skime, gam·bregija sinti ninie, salanti sa·rao sal chake salko re·atengachim.

Ua gittimo donggipa nokdango ge·sao mande saksa siachim. Gittim dingtango rogipa manderang sigipani nokona mahari ma·drang mikkang grongna, mitam a·kol cho·na dakchakna, ma·drang nanggiparang song·na channa dakchakna chimongbatokaha. Atchuni nok gittimni nakuramo dongachim. Gittimona napon atchuni nok sa·rako nappake re·na nangachim. Sa·rao salbaramenggipa ambi, manderang jinma jinma a·dinge re·pakangengon, an·tangni gitchingo asongtimgipa uni demechiko uamangni gimin sing·engachim.

Dikdiksani ja·mano, toksa dake re·baenggipa manderang atchuni nok sa·ra mikkangona sokbaaha. Ambini mikrono mikchi se·ep joke, ja·skuo gol·dik chanchane, manderangni ku·rangko knaon ku·chil mojim mojim dakako nike, siaona re·angenggipa manderang chadengdikaha. Su·namchik nanggiparangoni sakgni ambini ketchio chadenge, ambini jakko dangtape, “Ambi? Namengama?” ine sing·aha. Uaba rang·san nichaoe, jakpongko rim·brakbrake singa·aha, “Na·ara sawachim? Angsu?” Ambi ku·rangko ma·sijaha. Su·namchikrang an·tangtangni bimingko agane on·aha. Unosa, mikron samgnioni chimik naa gita mikchi jo·ole, namchiktangni jakko rim·rokroke inaha, “Nama ine maiako angkoa! Tanga ine maiako angkoa! Tanga ino name tangpaosachim! Sina ino dol·ot siosachim!” Ambi ka·siksike grapna a·bachengaha. Gitchingo chadenge sing·na sengenggipa gimikan ambini ma·ringana ka·a be·tokaha. Dikdiksana darangba ku·saba agangija jada sike chadenge seng·tokaiaha.

Unomiting, atchu jako atte de·bite ambini sambao chadengeaha. “Maiako agankuna. Salsal indine ma·ringe salna siangaenggipakoa. Jegita samra sampile nioba uan uan dakaijok.” Atchu uni su·namchik nanggiparangna aganchakaha. Sambengchi su·gri nanggiparang chadenge, “Nampaengama Atchu?” ine jako rim·e salam ka·tokaha. Mikron dal·e, namedake nichenge, “Namoba uantokaijok! Saaoba apsannaijok angade! Nikna nangako nikmanjok. Dakna nangakoba matchotjok ina gita. Basik salna Nokgipa sal donsoa una indake sengna nangaignok.” Atchu su·grirang sakprakprakni mikkangko tale nie ka·dingsmit dakaha.

Atchuni demechik nokningoni mora jako ra·e ong·katbae, Babara gritangrangko chadenge golpo ka·dilaigenma? Pagipa ka·dingsmit nipile, Asongnaode asongtokbo. Angade kam ka·joljolesa nikdikana golpojolenga. Gritangrang mora sale asongoba atchude jako atte de·bite a·mango asong chong·kepe kam ka·akon dontongjachim.

Dikdiksani ja·mano su·grirangchiko niate, Namtokengama? Angade anti a·kang re·na rama chel·a, neng·aba neng·aijok. Indakean mikkangba jajongba nikjaengjok. Da·o gita gisep gipuo sa·ratangona re·bagipako mikkang nikana agre nikbebejajokoai! Mitamkode mikkang gual gual dakpilengjok.

Gritangrangba gisiko kratcha·sik dake, atchutanngna an·tangtangko agane on·tokaha; unosa sakantiko mikkang nidoe katta chengtaiaha.

Gritangrangoni saksa an·tangtangni mangsongako agana joljol an·tangni be·en an·senggijako janapaha. Atchutang mikgron mikdenden nitate, Na·ara mijasal mnisalni bi·samangmang. Gritangoba namchiktangni bi·sasa. Da·omani indine ma·amode maidake janggi tanggnoksai? Gritangrang an·tangtangko nitatgrike ka·dingsmit dake chakengachim. Na·songara agre dambe dambeni, intangde angnade tikjajoka ingipa gita, adoskel jik kimade. Dal·a kambe chu·sokgija, bilsok jaksokgija, dambeoni jik kimode mande bil be·e sabisi man·a altua. Atchu gritangrangko nitate aganna a·bachengaha.

Anga mni an·tang mama ada nanggipakon nikrikjok. Chingni adatang dal·batgipa saksa bilmiting jakmitingo sie katangchanga. Una ma·drang mande on·rikna sandioa pante bilsokako man·jajok. Una dambe bilsi sokgijako on·rikna nangjok. Ua mandena mai ong·a uiama? Bilsi gittam bilsi brini ja·manoan saa man·na a·bachengaha. Gama rim·achiba pa·sike, maikoba dakachiba pa·sike, bilsi gimik gimik sajring ding·jringako knaijok. Jikko name mittangachiba ong·ja, deko name alduachiba sokja; jiksa desa a·jak ra·e alduna nangaona sokaijok.

Gritangrangchiko niate, Chingade mande gitchamna ma·at pante bilsoke pante roa. Gimikna skang atte mai sil mata uko uichengna nanga. Attepong mai wa·ako, maidakako, basik biweng ra·change den·a uko skie ra·chenga. Wa·a bipek silana den·naioba bipong ilingjaode, atte bisok kolpuo bisokna napongode maiko jakkalna? Bipongba ilinga unia bisilba mata dakosa an·tangni namnika gita atteko jakkala nama. Chinga a·ko o·e game cha·paigipanade attean jakrimra, gitchian jakrikra. Indakesa, an·tang atte chate, gitchipong pue, bolma pe·e a·ba o·na bingbang man·osa, a·tot o·e a·ba a·sa gamna gamsokosa, da·ode jikmittangna man·gnok, nokdang dako ba·ku nikaignok ine, an·tangtangko kang·kare ka·na man·osa, jik kimna chanchipara.

Nikomkome, sko brikjpoljole, Chk! Da·aoni bi·sade, ma·ko ma·watgijan, wasokchi chasokkujaon, nomil mikchaengjokna! Mandeska jikjak jikjak. Me·a bi·sako inkunama? Me·chik bi·sako jekunama? Kakket aganode, ma·ni sokko cha·ani wasokchian be·kuja, grang wa·rong an·kuja; ja·sian chakujachim! Sa·ra dimu kal·ani, gana kancha kal·e roani bilsisakuachim!

Unide,mandeska mitdakana, atteska den·dakana, ma·a-paa chakmatjae, mandeskana ku·sikna mikgil sie, bol gita kambe chasingbako, wa·gita wa·ring ringsongbako sing·e on·aignok. Unode, oktangtangko gapatna gamsimak rim·simakna ga·akjok; ong·jaode maiko cha·na. Jikna ganna patna krengtimakna nangjok. Bi·sa dambe wa·ring kambe ding·a chakrakkuja, sin·na chakmatkuja, bilsokgijako gamsimak rim·simake bil be·e saa dinga man·gnok.

Me·chikba uan. An·tangkoan simchakna sapkuja. Unon segipa kime bi·sa man·gnok. Cha·na ringna chu·ongja, odekko ba·bite a·jak gamna nangainok. Unikode an·tangkoma, detangkoma, setangko simchaknama? Bi·sa saksa demikkang nikoan jikma jikse ku·keng wakeng dakna a·bachenggnok. Alna alsokja, dena sok kanna nanga, unikoa segipani dekdoko chaka dakoan saa ding·a man·gnok. De ba·roro alsokjaroro, gama rim·a bilakroro bil be·roro, indakean sabisiba bang·roro. Nokdang daksrapjajoka, ba·kuan niksrapjajoka,dedrangan dal·srapjajoka. Indakean nokdangba ong·srangja, ba·kuchiba soksrangja, sasa susu soru bosu dakangainok.

Anggridrang, angsudrang, anga a·ko game cha·dila, bak an·tang jik kimchengaoni bilsi sotbri batjok. Da·o chawari demechikni alduako cha·tima bilsi chikking gapna am·engjok. Dedrangkoba nikengjok. Su·drangkoba nikengjok. Indakoba bilsi re·angesa sabewal saenga, bol gita ja·gokna, wa·gita wa·ramna a·bachengenga. O! Na·songde! Da·omani indinode!

Indakmitingo, demechik cha rue ra·baaha. Atchutangni aganako knatimgiparangna cha on·eaha. Gritangrang saksaba mamingkon aganchakgija saksa sakgipinko nitatgrike knatimengachim. Uchi atchutang aganako dontongja, sigipani nokchina chakate re·naba jakkeja, cha ringmano dikdiksa asongkuaha.

Da·o gita an·tang jeko nika uko agane on·oba, indita janggi tangani salrango mai dakarangko chagronga, uko basakoba agane janape rooba nachilo chinapjajok; da·ororoni bi·sarangna agane pattie on·ode takrako chi rudapata gita chinapjajok, a·bani bolitchongna aganenga gita gingtong balwa ringaijok. Basakobara, an·tangkosa kore chaenga gita, goncho itenga gita, chanchie an·tangnan kratcha·pila.

Gritang su·gipa saksachi name niate, Nang·dedranga dal·daltokjokma? Gritang ka·dingsmit nichake, O·e, Atchu. Bilsina skang skang dal·daltokengaha. Unikode, on·tisani ja·mano, Bao mai daktokenga? Uchi gritangba, Mai dakna, Atchu. Gimikan da·osa poraitokengade. Ka·ding mitching nitate, Una agre mai kam. Na·songan gamna rim·na arata. A·ba o·na a·ba gamnaba sapengarok, sapjaengarok. An·tangan sapjaode maiko dedrangna skie on·na. Gisik nange poraiattokbo. Na·song gimiknan aganenga. An·tangtangni aratako, ma·a-paani kattako manigija denggu dake cham·ram cham·chip dakako name an·tangtangko nipile, dedrangna ching gita daknabe, chinga gita ma·a-paani kattako ra·jaode indake rama branga ine agane skie on·bo.

Na·song an·tangtangan, alimila ma·a-paani pring attamna mipal am·e on·ako cha·e bikma gapo, mikkangchina chanchigija gong·greng dake gitchiako uiengjokba? Intangde a·gilsako angnade me·chikan tikjajoka ingipa gita ado bakdo jik kima da·o mai ong·enga taljokkonba? Dedrangko indakna on·nabe. An·tangtangba gisik pil·bo. Dedrangnaba rama mesokbo. Na·song anggri angsudrang, da·o gisik pil·e an·tangtangba rama namako basejaode, dedrangnaba kakket ramako re·na skijaode, nang·dedrangni chasongde bate namjanasienga. Gimikan seng·giparara, gimikan matgiparara; janggi tanganide neng·batroroenga. Atchuni ambini kattako knatimja, ma·ni paani ramako ja·rikja; chasongan dingtangjok, janggi tangan a·mikbrang nikaijok. Chel·achiko nikatpaja, nikaba niksokpaja, indakoba songtang wilwilao da·o janggi tangani bewalko nirike niode, angade duk man·chaka.

Gritang ja·sku sing·chake ku·sik rim·tipe dongengachim. Ambia nachila knaenga manderangni mikkangko nikna man·jaenga, gisiko duk man·e, Sako wel·weldamenga, Na·ara? Namchiktang gitchingo chadenge, Gritangrang su·drangnasa aganatenga, pattiatenga, Mani. Una namchiktangni jakko rim·e, Nang mamade, mikkang grongna re·bapagipakoba indinchachaijok. Namchiktangba manitangni jakko rime, Indakan salo agane skie on·natjao basako Maniba! Nang·sudrang nang·gridrangni namgninasa, gisik pil·e janggi tangchinasa ku·pattienga.

Atchu gritangrangko nitate, Angni kamde ian. Angade knalanma, ambinanma. Da·ao gita somai man·no jongna grina agane on·nangjaode, janggi tangani ramako mesoke donangjaode, simano gopramoni chakatpile aganna skina man·jajoka. Na·songba anggri angsudrangba, mamani atchuni aganako knarikosa, mikkangchi dena sa·naba, jonga gri nanggipanaba, ma·a nonaba, mosa boningnaba, mni atchude indine aganachim; skango mamade indakesa rama mesokachim ine, aganskana talatskana man·gne. Mande an·tangari seng·ja, mandeskani ku·pattiako, seng·gipaskani rama mesokako, gisiko nange unia ka·tongo rongchike ja·rikesa seng·a. Atteba kamalni doka baibai jakkalode matja. Uko chiripe, rong·chi namao wil·jringe, skatang den·dakdakgija, rong·o den·krekgija unia be·en bitin rate mitdim nang·ako wal·o so·srake rongtale ripake wil·taitai jakkalosa matroroa. Mandeba indakean daka. Ma·ni okoni atchiani jolde seng·ja. Namako gisiko chipna nanga, namgijaoni gele katna nanga. Namako ku·pattiana nachil songna nanga, ong·gijako aganako pele chakna nanga.

Na·song da·ororoni bi·sarangde, sakgipin gitchie nangkame uigminko ki·tap seakosa, mikot mikot porae gisiko chipe seng·a. Indake sakgipinni jakmakosa ja·rike seng·ani giminsa gualnaba altua, rama brangnaba altua. Poraimitingo gisiko chipa poraiman·jokode gisik guala. Chingara salanti an·tangtangni janggi tangao mai nama mai namja uko nirike, namako gisiko chipe, namgijako re·gele, nikba niba gimin ong·ani gimin jeko gisiko chipa ukode chasongnan gualjajok. Bilsi sotbri sotbonga gappile jikdong debae nokdang riko ba·ku dako, songni nokni bewalko, mandeskani janggi tangani bewalko namakoba namjakoba nike uibajok, nirike talbaman·jok.

Me·apani namja ine beng·ako drae dakode siaona ga·aka, sijaoba an·tang ong·sie janggi tangaona soka. Ma·a paani nama ramako mesoka gita ja·rike janggi tangode, janggi tangao okkri cha·asiakosa chagrongaia, an·tangtangko kratcha·ataona, ong·sie janggi tangna nangaona sokja. Dal·batgipa, bilsi bribatgipade, pangnan an·tangtangni nike ma·sigimin kakketkosa agana. Uni gimin, janggi tangaode janggi tangani ramako gisiko basena nanga; mandeskani dakakoba namama namja, knal mai ong·gen, ambin banona sokgen, gisiktango cheknaba changchongmota.

Mitam mandede ku·sik chi·achiba mandeskako rama ong·gijaona dilgala. Gisiktango name rongchike nama namgijako dingtangate chanchina sappajaode mandeskani ku·sik chi·ana ja·rike siani a·kolo giputomaona soka. Basakoba saobarangde an·tangni namgija miksongako an·tangni namgnina chu·sokatna, saoba an·tangna bate uigijako, saoba gisiko chanchigija mandeskani ku·sikna gisik cha·sugipako, chi·rok chi·rok kattachi rope, ong·gijako ong·a gita, namgijako nama gita gisik sale ropna sol·na changgipa gnang. Indakgipa mande baksa nangbake ra·jokode, maiba namgijao rengsi man·pajokode, bakrimoa siaona sokgnok, eke katoa nang·ko watjajoka dakgnok.

Na·songde mande dambe, gisikba dambe. Ia a·gilsako manderangni dingtang dingtang cholko mesoke tol·pnike dakako uisokkujawa. An·tangni namgnina sakgipinko ripeng dake ong·gijana jakkalgnikoba ma·sisokkujawa. Changsa ong·gijao ja·gipue ra·ode unoni ong·katpilna neng·aha. An·pilbana mandeskana kratcha·a, una ja·rikoa siani a·kolona dilanga; namna sikoba nampilna amja, sisrangna inoba an·tangko so·ote sina pa·ja dakaona soka. Nangana badie ku·sik chi·ode simsakna nangane, anggridrang. Mandeska a·gitchae stappile ripeng dakoba mikrakna nangane, angsudrang; ong·jaode ripengni jakchian dambenge galonako man·a. Angade nikmanjok. Janggi tangao mandeskani indakao jang·nangako nikmanchajok. Saoba an·tang cha·ue rim·a man·o ua maming dosi gri salario ripeng dakgipa mandeko a·mikaba gnang ine salchapako man·e pattoko chipa man·akoba nikjok. Unan an·tangde mandeskani ku·sik bokbokako ramram bebera·jajok. Na·songba name an·tangtangna simsake janggi tangtokbo.

Salpaksa ong·na am·engaha. Sigipachi re·ade atchutangni ku·rangchi muni puako man·tokaha. Namchiktangrangba dedrangna ku·pattiako knatime re·gija sengaiaha. Unosa atchuni demechik ka·dinge, Aia, Babara! Nang·gridrang sigipachi re·paenggiparangde salpaksa ong·na am·pilengjok. Unosa salko nidoe, O·e, bebe! Angade re·gnok dognok ingija asonganasa kamtangko ka·aenga. Re·angtokbojok.

Gritangrang unosa chakate, ka·dingsmit salam ka·e, Chol ong·oa basakoba robataiaignok, Atchu. Uchi atchuba ka·dingsmitde, Na·song basako sokbataikuna? Na·song sokbataiama, haida, angan re·angchengama!

Published: Chimik, December 2012