Mangnamgija Mongma

Pe·skagipa: Melkey Chisim

1974 bilsio, Krih chijolo donggipa songrang kenbegni obostao ga·akaha. Uan mongma matte mangsani wenjojoengani a·sel ong·achim. Ua matte banoni sokbaaha, darangba u·ina man·jaha. Ua jechi wenangoba songni manderangna dongtomgijani aro rusianiko ong·atbeani gimin songni bang·bata manderangan kena napaha. Changgipino sawa mai a·selko chagronggen, darangba agansona man·jaha. Uan ramramari mongma buring ong·ja, uan maiba dakgipa diabolsa ine kal·aka man·gipa manderangoni bang·batan aganaha; maina ua maming a·sel grian ua jolni manderangko tom·tome dongna on·jaengachim. Iara maini gimin ong·enga? Uamang saksa sakgipinko sing·grikaha.

Indakpile kenbegni ong·gipa gimaani ia bewalo sokbaahaon songni bang·a manderangan noktang jamtangko wate re·angna a·bachengaha. Uamangni songko nokko wate katania aiao inmangni ong·ja. Uamangni janggi tangbewal ramram gadangnisan ong·achim. Indaken, namgipa mandekode mongma mamingba dakja ine tip-lut aganon uamang bebe ra·na jajae uko ra·chakna man·jaha. Ian kakket ong·ama ong·ja, maikai sakki on·na man·gen? Iako maidake talatna amgen? Mongma kal·akna miksongahaode dos grigipako, me·chikrangko aro bi·sakomangba watpakjawa. Diabol manchasan indakpilgipa rusianiko ong·atna amgipa ong·a. Songni manderang janggitangtangna kenchakasan ong·jaha, indiba ua mongma re·ruru-pe·ruru dakangon mairongpile gimaaniko ra·baachim an·tangtangan niktokaha. Mongma uamangni a·barangkosan nisiaia ong·ja, manderangni gipin gamrangkoba nosto ka·achim.

Ia rusiania uamangni nok-jamrangkosan ong·aiode gimaani inditana kingking ong·jawachim, maina uamangni nokranga wa·a aro samsirangchi rikgiminrangsa ong·achim. Uandakgipa nokrangko salsani gisepon rikpiltaina man·a. Indiba, bang·a manderangan mongmako ramao ba buringo chagrongdate janggitangtangko gimaataha. Ua mongmani misilbegipa bewalo saksa mandeko kal·ake gogoreng gojronatako aro so·otako che·em che·em aganon songsulni manderango kenjagoka napaha. Sambajolni songrang, jerangonin mitamde ru·uta bilsirangnan dongbaaha, gimaangna a·bachengaha. Mongma gipin biapchi wenangahaoba manderang ua jolo dongangkuna pa·jaha. Ua mongma bano mai dakenga darangba u·ijachim. Uamang indakesan u·ina man·aha: ua mongma adita jarangna gimaani ja·manode salsa salgni re·na nange chel·tanggipa gipin songrangona re·ange kal·akeachim. Ua biapranga mongsongbate Krih chijolni a·jarangko an·pagipa jolrangon ong·achim.

Uamang bachi katgen? Mongma gipin chango badia biaponiko kal·akegen, darangba u·isona man·jaha. Ong·gni obostako ra·chaksoe Nokgipani ka·sachakao ka·dongana agre songni manderang chol nikjaha. Indake dongana agre mai minggipin cholko dakgenchim!

1947 bilsio, Bristish Sorkari a·brini manderangko sason ka·aniko pakwate donangna skang, kam ka·e cha·gni ma·manti cholrang nakataha. Uan mongsongbate, an·tangtangni tangka-paisa man·aniko tang·doatna aro dingtang dingtang jolrango donggipa songrango janggi tangani gadangko nambatatna gita a·brini manderangni nangnikanio pangchake ong·aha. Sorkarini ning·o kam ka·giparangsan iako nangnike chanchiaiaha ong·ja, Britishni sasonko nikrikgipa a·a-chi bang·gipa bang·a manderangan songsalni obostako namdapatna nangnikaha. India jakgitel ong·ani ja·manode uamangni buring bolgrimrangko jakkalani mongsonggipa niamrangko tik ka·giparang an·tangtangan ong·osa namgen ineba niksoaha. Uandakgipa niamrangko tik ka·gnigipa a·song gipinni sorkari ong·jana nanggen; maina mitam manderangni nikrikani gita, chol dongpagijagipa manderangni buring bolgrimo pangchake janggi tangna man·ako nikeba uamang mikbuaia. Ia buring bolgrimrangko songni manderang chasongsaoni chasong gipinona uamangni ma·a-paa aro mamatangrangoniko man·rikrikbaaha. Ia buring bolgrimrangko a·song gipinni sorkari an·tangtangni man·dapgninasan jakkalna nangnikaha.
Buringona sorok cho·angna gita tangkachi dakchakaniko on·gnigipa rori badinggiparang baksa agangrikna songni manderang namnikaha. Supegimin bolrangko salangna matma ba bol salgipa garikomangba brena uamangan tangka on·na nanggenchim. Uamang an·tangtangan kamko ka·gen, ong·jaoba jillaoni Khasi contractor saksako ka·atgen ine rori badinggiparang aganaha. Iako dakanichi namroro-silroroaniko ra·bagnok aro uamang jillao songdongna man·gnok ine a·a-chi gnangkalgiparang chanchiaha. Mangnamgijagipa mongmani kal·akako man·enggipa jolo songdonggiparangnade ian namgipa kobor ong·achim. Uamang kene dongaoni jakgitel ong·gnok. Ia kobor bang·a manderangnan dal·a chu·ongnikaniko ra·baaha. Bang·a manderangan a·jatangtangni buring bolgrimrangko gipinrangna palaha. Buring bolgrimsan mangmang uamangni janggi tangani aro tangka-paisa man·ani ja·pang ong·baengachim. Indiba a·jani gita maming bak nangegijagipa manderangna palon uamang dokrona ritchani ritcha bilsirang nanggipa bolrangko den·aha. Pil·sa gita, ian a·gilsakni bewal ong·aha. Uni gimin, namrorobaana bate nosto ka·e galanian bang·bataha.

Diabol mongma Pyrdi Chiga (Thain Umpyrdi) minggipa jolo gimaaniko ong·atbataha. Ua jolo Mei Pyrdi ine manderangni minggipa randi buchuma saksani buring bolgrim dongachim. Ua buring bolgrimko Pyrdi Bolgrim (Ka Khlaw Pyrdi) mingachim. Ua bolgrimko Bah Phransit minggipa man·e cha·gipa mandena palna nangahani a·selrang bang·a ine chanchichipna man·a. Ua a·ako dam nom·e palna nangao ga·akaha. Dam nambatao brena am·e Rs 35,000/- on·na am·giparang dongoba uamang ra·ningjaha — chanchikuaha. Haida, Bah Phransit chalakki dakani bang·akon! Saobarangni aganani gita, ua dal·dalgipa manderangming nangrimani gnang, aro indaken a·ako drae ra·aha. Indiba Mei Pyrdini samtangtango donggipa chonchongipa bolgrimrangkoba ua ra·aha ine bang·an u·itokskaa. Mitam aganaha, ua golpoao katta jakkalna changgipa mande ong·akon. Mei Pyrdi ua a·ako paljaode uni a·jana maming namgni dongjawa, maina uarangona sorok tariangjawa ine Bah Phransit ropahakon. Indiba sawa indakgipa aganmitakarangko bebe ra·gen!

Ua buchuma a·atangko palna sikjaenga ine adita somoirangnade knaachim. Indiba ua buring bolgrimona re·ange nia bang·bata changon dal·dalgipa bolrangko cha·ue den·angaha ine nikaha. A·rankarini sal somoirango uni buring bolgrimo maiba u·ina man·gijagipa a·seloni wa·al ong·kate kamrongaha. Da·nang! Ua buchuma a·atangko dam nom·e palgalana agre minggipin chol dongjaha. Ua inaha, “Uamang jekon chalakki bewalo dakenga dakaichina, indiba aram nalsaoni nione dongenggipa gnang. Uan uamangko sasti on·gen. Bebegitaba, ia a·gilsako angara badita ru·ute dongchagen!”

A·ako palani ja·mano Mei Pyrdi apjitange Phlang-Di-Ngan minggipa biapni sambao dongeaha. Indakmitingo Bah Phransit sorok pruani kamrangko a·bachengataha. Bilakgipa aro aro hajira komiana ka·na gong·gipa manderangko ua kamna jakkalaha. Ia kam ka·giparangna hajira bang·gija on·aan chu·ongachim, maina uamangni songode bostu sregrikgipa bewalon pangchakkuaengani gimin tangka jakkalanide ru·utkujachim. Songni skia man·pagijagipa manderangko indake onchepani gimin manderang Bah Phransitko chonnike ka·dingrongaha. Indiba Bah Phransit ka·dinge aganchakrongaha, “Anga pangnaba angni manderangko namgija jakkala dongja. Saniba namnikgija aganako changsamang knajokma?” Ua indakeba inaha, “Na·simang indake chanchie ia sal somoirango seng·rikjaode na·simangnan gimaani ong·gen. Indake ong·ode na·simang a·bri buringon dongangkuna nanggen!” Uni kattarangko chanchie niatode uni miksonge agananiko u·iatna man·genchim.

Aram simgope andalgripgrip dakgipa salsao Bah Phransit an·tangni jeep-o jillaoni ong·katbaaha. Kam ka·giparangna antiprako on·na nanggipa hajirako sualna ua ning·tugipa biaprangchi re·angaha. Ua buring bolgrimrangona an·tangan re·ange nirorona nangnikaha. Bolrangko jillaona salangna gita sorok pruna uni niroroako aram sime andalgripgrip dakgipa sal champengna man·jaha. Kamrangko biap dimchang dimchange on·tiprakprak ka·atengani gimin, tangka on·na ua re·roroangna nangaha. Jillaona sepangbatgipa aro a·a ga·nanggipa biaprangode kam a·bachengkujachim. Diltugipa aro a·a ga·nanggijagipa biaprangosan kam ka·atna ua hajira ka·giparangko ra·aha. Kamtangko matchote ua sambajolni chiringo mesal cha·na re·angaha. Uan sorok tarienggipa biaponi chel·jachim. Ua ja·koprangko oke done, neng·take mesal cha·na rong·pattalo asongaha.

Mesal cha·mansrapkujaon, chongipa chiringo saksan kam ka·enggipa mandeni a·boke aganwatatako ua knaaha. “Babu!” ine kam ka·gipani inwataton ua wa·arangni brete gam·baengako knaaha. Uni ga·chakenggipa a·ani bak moengachim. Kam ka·gipa “Ka Iaw-baw!” ine chrikataha, jean uamangni ku·siko “Mongma!” ine miksongachim.

Mongma inako knaon Bah Phransit kenjagoke til·chrongdoaha aro ta·rakprete re·jitangaha. Ru·utgijan, mongmani ong·katbae kam ka·gipa mandechipak mikkange re·angako nikataha. Ia sakgni manderang uni a·jaona ga·batbae uni tom·tom dongengako golmal ka·ahani gimin sasti on·gen inenga gita ua gam·bee mikopretpretna a·bachengaha.
Bah Phransit kenbee, janggitangko jokatna kataha. Ua an·tangni ja·koprang aro mujarangkomangba kolangjaha. Ua ja·pa sagniko chanchigijan rong·srekrangni kosako katangaha. Uni miksonganian, jedakeba jeep-ona soknasan ong·achim. Jeep-ona sokahaon ua gadogalgale, ta·rakprete sale katna a·bachengaha. Da·nang! Kam ka·gipa mandeba jeepni ki·sang ki·sang ta·rakprete rikbae, “Babu! Angkoba sengbo!” inpaachim. Indiba Bah Phransit an·tangkosan jokatna chanchie nipilmangjaha. Rama gongge dakgipaona sokna skangan ua kam ka·gipani misilgipa chrikako knaaha. Una mai ong·aha, nipilatnamangba Bah Phransit nangnikjaha. Ua kenbeahani gimin a·brini paksaona sokangkuja dipet gariko dondikjaha. Mongmako nigamatna man·gipa a·bri paksaona sokangon ua ong·gimin obostako nimrakatna mangmang on·tisa dondikaha. Sorok a·bachenggipachipak mongmani ong·onangako mangmangsan ua nikatna man·ahachim.

“Atchiaonin iano songdonggipa matburing jat manderang! Uamang an·tangtangko maidake chel·chake donga?” ua an·tangko dongtoatkalna aganaha. “Indiba jeba ong·bo, ua kam ka·e cha·gipana jeba ong·bo, una inditan ka·pakgipa darangba dongjawa. Indiba angode dedrang aro ma·drang mahari gnang!” Uni ja·mano ua naljokgipa biapona sokkujana kingking man·adipet ta·rake salangkuaha. Aditani re·angkuani ja·mano, kenna nangani dongjaha ine nikahaon ua ong·gimin a·selni gimin chanchiangjaha. Kam ka·gipana uni tangka man·gni chu·gimikkon on·baahani giminsan ua suk ong·jaha. Ua mandena namgija a·sel ong·ahaode indita tangka indin gimaaignok. Kam ka·gipani mahari maikoba dabina nangode ua banoniko tangka bate man·dapskagenchim.

Antigipino, kam ka·giparangni hajirako on·rongbewal salna salsa skang, Bah Phransit janggitangna kenaha, maina ua ning·tugipa biaprangona re·angtaina nangahachim. Indiba ua buring ning·ona re·angana agre minggipin chol gri. Jillako wate re·angna skang ua an·tangko naljoke aro chel·chake rakkiani gimin chanchiaha. Uni gimin, ia chango ua slai gona sapgipa mandeko rimbitangna tik ka·aha. Ua mande armyo napgipin ong·achim aro chel·chakna gita rifle ra·bitachim. Ua mandeni dakchakaniko am·ahaoba Bah Phransit janggitangna kenkuaha. Batanggimin antio mongmako chagronggipa biapona sokon ua simsakaha aro biapko namedake nikuaha. Rang·sanan ua kam ka·gipako a·bri nalsao nikate gisik dongtoaniko man·aha. Dakronga gitan, ua kam ka·gipa soroksamo ro·ong dokengachim. Ua mande batanggimin antio gangipa apsan genji gitchakkon gane, chek dakgipa apsan chinberakon chinachim.

Nangmiting somoio maming dakchakanikon on·gija gale katangahani gimin namnikgijaniko agannaba gnang ine chanchie, Bah Phransit kratcha·a gnang kam ka·gipachipak mikkange gari salangaha. Ong·anggimin a·selni bidingo katta naate sing·ode maiko aganchakgen, ua ta·rakprete chanchiaha. Chanchina ta·rakgipa ong·ani gimin, aganchakgni kattarang uni gisikona ta·raken nabaaha. “Nang·gita seng·gipa mandeko maming jontuba saknaatna man·jawa ine anga u·ia ripeng,” ine ua aganchakgenchim (gipin chol dongjahaon, kam ka·e cha·gipako “ripeng” inanio mai dingtanggrikani donggenchim). Ua indakeba agangenchim, “Mongmani sorokchipak katangko nikon anga re·bapilna nangani gri ine anga nikaha, maina na·a uoni joke katna man·aigen ine anga u·iachim.” Indake aganna man·dike nikode, ua mandena Rs 10/- on·on namaigen, maina ugita dakgipa kangal mande uko man·on kusi ong·e ong·anggiminko gualaigen ine Bah Phransit chanchiaha.

Gisiko dongtokalniko man·e ua kam ka·gipachipak gariko ta·rakbate salangaha. Indiba a·bri paksaona sokangon uano darangkoba nikjae jajajiji dakaha. Ua gariko dondikaha aro ong·one biap bichamko namedake niaha. Batanggimin antio gitan rong·srekrang apsan daken dongkuengachim. Indiba kam ka·gipa mande bachi gimaangaha? Kam ka·gipani chek dakgipa chinberani chonchone grinpriprae dongengako nikon uni kni chadona a·bachengaha. Re·anggipa antio kam ka·gipani gangipa genji gitchakkoba ua nikaha. Indiba uaranga gringiminrangsa ong·achim. An·chi ran·krapahani gimin genji gitchakan gisimahachim. Tupi aro ta·makku ringani noli a·ao bilding bildang ga·ake dongengachim. Uarang peru aro se·elrangni bale kal·akako man·gija name dongkuengachim. Da·nang, ua kam ka·gipana misilbee ong·gimin a·selko darangba u·ikujaesa ia bosturangko dangdikgipa dongkujachim! Ua mandeni rang·san gimaana jajrenggnigipa uni nokdang dongama dongja u·inaba ia diltugipa buringni bakko re·pakgiparang namen komiachim. Ia kam ka·e cha·gipa gitan, bang·a manderangan kam ka·e cha·na am·jojoe songretokachim.

Rang·san, talatna amgijagipa kenani uni ka·tongo napaha. Ua gisiktango inaha: “A·bri paksachi angni nikatgipara sawanchim?” Ua gitok ran·aha aro sko riming rimang dakbaaha. Ua rang·san gariona re·angpilaha. Uni gisiko mingsakosan u·iaiaha, aro uan man·adipet ta·rake gari sale nokchi re·nachim.

Gariona re·angengon, gario dongenggipa unbaksa re·rimpagipani rang·san aganako ua knaaha, “Babu! Mongma!” Bakan ua mongmani mikopretako knaaha. Ua mikoania kenbegni ong·an baksa batanggimin antio uni knagimin gita apsanachim. Jeep-ona sokarin ua uona bildojolaiaha. Indiba uni gisik srangbaon, jeep mikkango mongmani chadengako nike ka·dongani chel·angaha. Ua gisiktango chanchitaiaha: “Ua baoni nabataiaha?” Mongma baoni nabaaha uko chanchina mangmangba somoi dongjahachim. Ua jokgijagipa obostao ong·aha. Badiachipak jeepko salgonggegen? Uochachan mongma ja·atangko de·doe jeepni skotengo ga·timataha. Bah Phransit ainarangni srisrae be·angani aro nosto ong·gimin engineni gam·akosan knana man·aiaha. Ua mamingko dakna man·na skangan mongmani sundul uchipak snilbaaha aro uko kon·duule garioniko salongkataha.

Bah Phransit ku·chilrangko oe, “Dakchakbo!” ine chrikpretnasan man·aiaha. Ua ia kattako changsa mangmangsan inangna man·aiaha. Rang·sanan mongma jeepko a·kongkep dakgipaona romromataha. Slai ra·e re·pagipa mande Babuko naljokatna man·jaha, maina uaba gari baksa romromchapangaha. Ua ka·sine malame ong·kate Babuni chrik-manggasiako knanasan man·aiaha. Mongma uko misilbee kal·ake roengachim. Re·pagipa mande saknaa man·jaoba nikuake dongnasan man·aiaha, maina uni ra·bitgipa slai chiringsamni ro·ong dal·ao nanggake gonggeaha aro nosto ong·ahachim. Ua kenjagoka nape an·magoka changgimin gita ong·aha aro re·jitnan ja·ku tang·jaha. Mongma kal·akako wate dikbegipa buringchi napangpilkujana kingking ua jeep nokkingni kokkimao ma·chake il·eng-siksakgija dongaha. Ua adita somoina sengkuani ja·mano nosto ong·gimin garioni ong·katbaaha. Be·en jada changa gita ong·pilahaoba jeeponi maibakae malame ong·kataha aro sorokchipak ta·rake re·angaha.

Kenan gape, ua ja·tong raka dipet ua biaponi katna a·bachengaha. Mongma rikbaama rikbajaenga ua nipilroroaha. Dal·gipa aro chugipa rong·brakona sokkujana kingking ua rang·sitna dondikgijan katangaha. Diabol mongma maibakae re·pakangna nangode ua rong·brako dongnue chakna man·genchim.

Ua chugipa rong·brakko neng·edike maldoaha. Uni ja·mano ua sabeenga gita be·en jil·jile asongaha. Kontagni ba kontagittamna ua dakchakaniko man·na sengsokuengachim. Uni saltokruba be·ahani gimin, buring damgipinchini bol sale re·bagipa gariko mai bajio niksoaha ua tiktakko aganna man·jaha. Uni ba·ra jipjangate chrikatako knaon gari salgipa dondikaha. Bah Phransitming re·angpagipa mande ta·rakbee bol salgipa gario gadoaha. Ua somoio uni mikkang bokdalgepahachim. Skango Japaneserangming dakgrikao siako mikkangchakgimin ong·omangba ua indakpile kengnikode chagronga dongkujachim. Ua an·tangna ong·gimin obostako gari salgipana sulsul agane on·aha. A·sel ong·giminni bidingo agane on·na gita police station sokkujana kingking gariko salangkuaha.

Bon·kamao, ong·gimin a·selni gimin agangijan indake u·ina man·a, chong·motan, Bah Phransitoniko bol bang·bee ra·gipa mahajon lap ong·pretgnok! Ua an·tangni workshopna nanggipa bol gimikkon indin man·aha. Bah Phransitna on·gni tangka uni jakon ong·kuengachim. Gisiko bi·chakan gape, mahajon tangka gamgniko sianggipani dedrangna on·skagen ine ka·dongchakana agre darangba mamingkon dakna man·ja. Indiba ian aganrongbewal gitan ong·angaia: Iani bidingo maiko agangen? A·gilsak…! Ian a·gilsakni bewal ong·a.

(Translation: Adita bilsirangna skang, ia golpoko Englishchi seako A·chikkuona pe·skachina on·aha. Translation matchote on·aton mamingba u·iatpila dongjani gimin jinmaan poraie rochina iano gatatenga)