Namchik Nokkrom

Bilnang Raka K Sangma

Nibo, “sakobasa chra dakate rimanga” ine da·ode agantokengaha. Sakoba chra dakatmitingon jrip donge da·osa badi ka·ode nitoa ong·ja.

Me·chik inchagni, dontongdraana agre nokni kamrangde bon·bebeja! Aganjaesa ong·enggen: pilakande angni kamrangba ong·jaenggen. Mittinode nio-sariranga angko maikon aganenggen? Maming mitak-agana dongjaoba angaba ku·sikde ku·sik, betbetbebea. Basakobade segipa jripjrip dongaiana gal chaa gita daknikpila; angaba gisep-gipude an·tangkosan ong·nikbate ra·bebeaiakon. Nokdang an·senge dongakoba basakobade angan wa·al so·dobebea. “Maiko ong·nikja, namnikja joljol mikkangon aganosa nama, uko ra·bite gisik sachipchipade namja,” baita changan nono-pachi saia man·beaha; gitchija angaba! Jripjrip dakaigipani changsa manenga dakpaara “mongmako mikkingo gobo mandeko mikkango aganbo” ina dakgipanan ka·dingna sikkuenga angade. Bani kattakon man·pila dakaha buraba?”

“Het, me·chik inode bang·batan indakaiakon? Indiba angan namjaengode, uko namatna jotton ka·anikode jakwatna nangjawa. Uasan. Ang’ segipara nampabea da·nang!”

“Gas-ba bon·engaha, pagipana aganna gualenga; light billba gamkuja; oh, ua online bostu bi·atgipaba knalde sokbagnok. Ia skul re·anggipa paningsaba maian ong·enggen!”

Taty nokdringo kam ka·joljol rikkit dangkit chanchiroroe, kang·kare neng·ana segipani ku·simang ratna aina dingdegipao an·tangko niaton mikkingtangkosan nikaiaha — una ja·chele niomangba gingtingsreksan niktelaiahani gimin saksan ka·dingnapengachim. “Indakpilesa mangkandikma angara?”

‘Dingdong’ — nokni calling bell gam·oa tang·dopilaha.

“Ai, A·ai,” a·paloni demechik okamengana, “Oi Rani, da·mo da·mo,” ku·chakroroe do·ga oataha. “Skul jokbaaha ama?” Demechikni skul bag, segipani ra·bagipa dud, ruti dotgniko ra·sona jak snilengon “Skulan ga·suja” inana ma·gipa ka·dingsmite sing·aha: “Maidakaha skulara?”

“TV-an gri!” Unon uamang jiksesaan ka·dinggrimaha.

“Am, na·an skulon TV nina man·genba ….” betbetroroe turamtangchi napangtokaha. Gansre chinsreate, Taty demechikko de·tome ku·dimaha, “Dal·baengaha amaba, mo? Skul re·pilengaha!”

“Pagipakoba?”

“Neee ne, watbo, bal·eknabe na·a, ding·are ding·a, ding·ol…”

“Ku·dimaigen… mmmua” Taty manigija segipakoba engkote ku·dimaha….

“Oi… na·simang dongchimbone, angade re·engaha. Nonoko name dal·atbo, Taty” Nokgimik kusi ong·e samsiari bakrao kal·grike romiting chachaon segipa inaha.

“Bachi re·nakaha na·ara? Bachi re·nakaha?” Segipa apalbea chibimani nalsachipak mikkange re·angade re·anga, nipilangtaijaha: guuri bokso onao gimaangaha. “Nang·pa, nonopa, Carry!” nisokenga dipet chrike okamrika joljol Taty neng·bee nom·bokaoni mikselbaaha.

“Chakatboha nononi papa, seng·baengaha! Nono skul re·nahana. Maina na·ara chingko gale katangjok; angade da·o mai dakkugen?” sambao ba·ra gipokchi pujue dona segipako niktaion Taty ka·bea ku·rangchi, manggisiko rim·roke ka·siksik mikchi ong·taiaha. Sambao donggipa bakdrang ka·dongatani kattarangchi malmokengoba Tatyko jripatna amjaengachim. Ja·kusasan ga·kuaienggipa nokdangna indita dukni su·pekani, ka·beani srapon darangni ka·tongan banggriaha. Tatymang ma·ningsa aro pilak ma·drang maharani dukko niken duk ong·dapjachina sakgipinrang an·tangtangko ka·tong rake mesokna jotton ka·tokpilengachim.

Tatyna andalgipa wal ong·engoba a·gilsakna pring ong·taiaha: Carryko gopani sal. Vellore hospitalo siakosa ra·baani gimin seng·gnangan kamrangko matchotatna songni aro mondolini manderang ka·sotokaha. Salsa skangan kobor man·sotokahani gimin, pilakchini sokbana nanggiparangba seng·gnangan sokbatokaha. Salni chi·sa bajion giljani pamong aro pilak ka·sagiminrang tarisogimin program gita gilja ka·aha. Git ring·aha, ka·dimeania bi·aha, Carryni janggi tanganiko jinmana poraiaha.

Sastroni kattarangko poraie, ka·dongani kattarangko pamong aganaha. Bon·kame mikkang nirikani somoi — uamangni dukko nike, tom·a dongpagipa sakantian donnuaosa ka·a be·tokengachim. Ringpengskarang, ma·drang, mikkang nirikna sikgipa gipinrang bon·angahaon, segipani bakso sambaona Tatyko sakgni rim·chape rimbaaha. Segipani manggisiko skoo rimroke, mikkingo ku·dimchotaha.

“Re·angbo nang·pa, anga nang·ko pangnaba niktaijawaha,” jikgipa ka·bee grapaha. Ka·tong rake mesokenggipa jinmaba ka·a chakna amjae grau grau graptoksrangaha. Ma·gipani, an·tangko de·tomenggipa ma·detangni aro jinmani grapako nike bilsi gittamni demechik sing·kuaha, “Baba mai dakaha, ha ade?”

Mikkangchina bibalari niksamsoa jumang rang·sanan choknoke chotbakaha; tangkamsusu nikgipa chimik an·chengrarasaha. Mikkangchi re·kugni ramako ja·ku ga·angkuna jal·angan be·aha!

“Anga an·tangde jeba ong·bo, nonoko maikai mande ong·atpagnok? Chona rema kamrangko sandie ka·naba baoniko tanggitik; iano dongkunaba angna maian ong·gen?” Mikkangchina mingsogimin ja·kurangko chanchiatpile chaktojaengon, demechik nikgija ka·siksike grap grape, an·tangko a·gilsako rasong gribatgipa me·chik insimengon inangkuna kattaan griaha. Ong·chongmotenga obostarangko bikpil, Tatyde jumang gitasa nikskaengachim!

*******

A·gilsak ga·brongtango re·wilwile sal aro walko ong·atengon ua duk-mikchin’ saloni chanbae anti gni gapaha. A·chikni dakbewal gita, mahari dolgni mela-saldongani somoi sokaha. Pringnin song·gipa song·aha, changipa chanaha. Noko mandean awen-jawensaha. Demechik Lisha, maming duk-sukko u·igija basakoba bi·saskaming, basakobara dal·arangming kal·grike ka·dingenga, an·tangchina sokbao Taty ka·dinge mesokmikenga!

Chra mongting wa·ge ja·tingrang mahari dolgnini jatchio mikkangchakgrike asongtokaha. On·ako cha·e, ruako ringe somoi ong·ahani gimin mande ra·ani kattarangko janape, me·asachini chra aganchengaha. Me·chikchini mongting aganengon, maharitang tom·ao Tatyni agangimin kattao pangchake, maming on·song-su·songna nangani gri ineba parakjolaha.

“Sko kimkatekoba, bimang do·pinchepoba chrani biapko ra·e, mongtingni morako sale anga me·asachini gita aganna chadengpaenga.,” me·asachi chra saksa biapko ra·e aganna a·bachengaha.

“Da·ororoni salrangode mela-saldongani, katta-dokani aro gro-jeanirangba dingtangaha. Chinga aganme·apa aganoba bang·batan u·itokjawaha, an·tangtangba jakkalrongjaeming ku·bitbatangaiaha. Uni gimin, man·adipet, katta nom·achin an·ching golpogrikaiana.” Jinmaba ka·dingsike ‘namaigenba’ intokaha.

“Be·gipade be·angaha, wilgipade wilangaha. Bika a·dram be·ani mikchi chiwaringani mande sakantinan soka. Ian a·gilsakni mandena donsogimin sal, aro ianoni darangba joke katna amjawa! Iani gisepon, a·sak tangrikenggipa mande jatni niam-reti, dakbewal-ka·bewalrang dongkua; an·ching A·chik jatoba mingnama dakbewalrang gnang aro iani giminan an·ching da·alo mahari dolgni tom·dakenga. Da·sio knagimin kattara, be·akako sokchuna, wa·gatao jorana nangjawaha ineba janapangaha. Na·simang nangjawaha inode maming dakna amja. Chingade mittelana agre maiko agandapgen!”

“Da·alo an·chingni rongjrie chanchina nangenggipade ian — ia nokni ma·a-paa noko demechik dongjani gimin noa-namchikkosa bohari rimbae donangaha. Da·alo ia nokko nirikchina, dongtimchinan….” Indiba uni indake aganangmitingon me·chikma saksa chakate, rakkale aganataha.

“Ia nokde ambi atchuonin Marakrangnisa, da·aloba knaloba Marakrangnin. Tatyko bohari donahaode Sangmarangnisa ong·aignok!”

“Indakede ong·bo ba ong·jabo, ka·sinesa chanchigrikna,” da·si agangipa me·asani chra aganangkuaha, “Atcha indide sawasa bohari rime donangskaa, Marakranganjama? Da·o sea-paa sia-kata ja·manode rikgale galaignokma?”

“Chingade ma·drang ba·rimani gitade bohari rimbaakoba u·ija; sawan dakdilaha ragal-sugalja,” sakgipin me·chikma rakbate inataha. “Da·oba ia nokko nirokna inode ma·de-ma·jongni dedrangan bang·pret!” agane ua ku·chil wagam gitchakao guekon asongjol du·atkuaha.

Pilakchin dikdiksana jrip daktokaha. Mama adarang, dolgnini me·chikrang an·tangtangna mitu mita agangriktokaha. Mikrono mikchian talgija, Taty demechikko ja·pingo rime pilakkon knatimesan dongaienga.

“Aia! Manimangba indakesa dakakon, nammitingode nanga nangjana chingan tangka paisana, merong-mechuna suale cha·paachim …. ma saobasa sika-budi on·ahama?” Taty gisiktangosan sing·enga, aganchakengachim.

Me·chikchini chrarangde maiko aganpagen ina gita me·asani dolchini aganako knatimesan dongtokengachim. Bohari rimania A·chikni dakbewalde ong·ja ine nikengoba, noa-namchikni gimin kratcha·na jaksi chikna ian chingni sal ine uamang nikengachim. Saksa sakgipinchiko nitatgrike, saoba chadengatgnokma, katta aganatgnokma inoba dongjaengachim!

“Atcha, biok-cho·ot depanterang bachiaha?” me·asani chra samba ketchi niwingwange chadengaha. “Angade katta a·bachengatjok. Maiko mancha rai on·naka? Na·simang agantok.” Ua suk ong·gijako mesoke asongpilaha.

“Anga, ang’ noa namchik Tatyni mamatang je·et,” me·chikchini chra chakatdraaha, “katta dokgipa, gro jegipa ong·pajaoba iano chadenge aganpaenga. Ano Taty gisik sajawa ine anga ka·donga, maina na·a saksa skia-poraia gnange ja·delgimin A·chik me·chik. Chingni aro pilak tom·enggiparangni nachikolrang jeko knaenga, ua kattarangko chanchiaton uarang kakket ine angade nikenga. Anoko namchikko bohari ba demechiktang gitan ia nokko nirok-simsakna rimbaaha. Indiba uani gisepon pilak miksonganirangko na·simang mahari gimik namnike mikchaen dakahama ma dakjachim chingade u·ipaja.

“Na·simangko gisik neng·atenggipa, sko saatenggipa chingan ga·akenga: na·simang on·jawa inode chingade maiko dakpana; na·simangni mal gamna mikboke ra·sekna nidingengaba ong·ja, Marakrangan iako namnike rimbaa inesa chingade ma·sipaia. Uni gimin, da·alo maharani niam-retikosan niataigija, an·chinga Kristianrang ong·tokahani gimin, gisik sagrikgija saksa sakgipinko jaksi otgrikna jotton ka·gija, namao matchotatna man·ode nama inesan angade agana namnikaiaha.” Mahari aro noa-namchikni palo mikkang simdik, waki dikdik, wajaringo na·kam bu·su bu·kame dongengako ote galata gita srang dimprang agansrangaha.

Balkasin balwa ka·sinjrimjrim melaa jatchio balsipsipaha. Saobarang ka·sine aganenga, “Baosa mikkaan— brau dakbanakakon!”

“Angade chrarangoniba chonbatsranggipa ong·aiaini gimin da·si na·simang chrani agana gitan srangsrang aganaignok,” Carryni ma·gipani saksakamkam jonggipa chakate aganna a·bachengaha.

“Da·alo an·chingni sko sana, jera ra·grikna nangania sianggimin-bon·anggiminko mitak-agana gita dakaigen: angni gumetang abitangni a·selan ong·a ine angade aganaigen. Gumeba an·tang boro babu ong·akosan u·iaia; abikode maiko aganpana — gume jeko agana, namnikjaoba ra·chaknan nangpaaia. Ia noko demechik dongjani gimin na·simangni noa-namchikko bohari rimbaani bidingoba maming agana gribebe; chinga Marakrangde u·ibebeja. Ano Tatyko rimbaani somoioba sakobasa chra dakatate rimangana, chingade u·irikjabebe, kakketkon aganenga! Gumeba gumebebe, an·tangkosan u·inikbebea! Na·simangba ma·sichake chingkoba kema ka·pachina angade kema bi·aignok. Anoko namnikjae aganengade ong·ja, indiba ian jatni niam. Da·o dipetde chingni songjoljolode bohari rima ingipade dongpakuja mo?” Niwilwale saoba aganchakchina ingipa gita aganako dontongaiaha.

“De, aganna nangako agantokaha; katta rongtalgijako ma·talataha,” cha sualangenggipana ‘ringkugen’ ine gakguatjoljol me·asachini mongsonggipa chra chakate aganskaaha.

“Da·ororode bang·bata skia-pora man·gipa, dal·dalgipa manderangan atteska den·tekbata; ma·chong-mahari de·reta, torom til·eka, jatni niam-retiko ga·changbate ong·gijako dakdiltokenga! Anga tol·e banaie aganjaenga, an·ching sakantian mikrontangchin niktokenga. Agangiminko agantaitaia gita, batanggiminko janaptaiaoba mosa-boningko mitaka gita dakaia; boningni kamba ong·bebeja. Chengo Bonepa A·tilao mela-saldongon A·chikranga demechik sa·chonkosa nokkromna donna tik ka·baaha. Ukon an·ching A·chikranga da·onan ja·rikbaenga. Ian jatni dakbewal, ja·rikbewal.”

“Uni gisepon, ia nokdango da·o mancha ong·engania an·ching mahari dolgnini gualani aro simsakgijani a·selan ong·aha ine angade agangen. A·chikode bohari rimani gri o·e. Uni giminan Tatyko namchik nokkrom rimbao an·ching jrip dongani ong·jachim ine anga an·tangde da·o jak songdoa. Sawa saja namchik nokkrom rimangenga, katta donangenga uko me·chikni mahariba talna nangachim. Nibo, “sakobasa chra dakate rimanga” ine da·ode agantokengaha. Sakoba chra dakatmitingon jrip donge da·osa badi ka·ode nitoa ong·ja. Gimikchian gitan wilwilstip, bengsia stita. Beben, Carrypani a·bachengatgipa nokdang ong·ode Carrypani kattaan ong·chinachim; indiba ian baditaba chasongna Marakrangni man·rikrikbaenggipa nokdangsa ong·a. Uchikoba niatna nangengon, iachikoba chanchina nangengjok. Da·alo Carry sigitikja ong·ode Tatyko namchik nokkrom rimbaani bidingo an·chingba jrip dongkuaigenchimma?” Ua agandangkuna man·jaha, maina….

DELIP….. TIMMM…. changsa kimpretaha; bachinian saljrakjrakon mandeskako mikkang talpilgija rang·sanan andalgropaha; mikka-balwa ta·rakbaaha; mahari tom·na alamala tambu ping·gipako su·kange rakatgipa wa·akon oksropaha, tom·a donggipa manderangkon pingopsrangaha. Me·chikmarang man·atangtang gana salchepchepe nokningchi katnaptokaha; me·asaranga saoba apsalio, saoba noksamo; katsrapgija biap chaktelgijaranga tambu ning·on jaktangtangchi salkringe rim·e chaktokaha. Agangrikakon knapilgija basingni chi paka paka mikka gamongsrangaha!