Bilni Ning·o Jakgitelani Gri
Limi Gabil
Nokdango songsalo janggi tanganio mama adarangan mahari madrangni skotong ong·e bil man·giparang ong·a. Noa-namchik, jonga-gri maiba a·sel ong·o, gro-jinang man·oba mama adarangsa bil man·e sason ka·a. Nokdango jikseni gisepo meligrikgijanio, galgrik-ekgrikani somoioba mama adarangan an·tangtangni bilko jakkale kam ka·e nokdang ong·atpila. Ma·a paana, ma·drang maharina kratcha·aniko ra·baode doke sate sason ka·a — uan uamangni bil.
Songsalo aro nokdango janggi tanganio mama adani, sea-pani bilni ning·o ong·e me·chikrangara bilgrigiparang ong·a. Niamchi kae donako man·aha ina gita me·chikranga pilak kamni bidingo gisiko aro be·eno jakgitel ong·pagijagiparang ong·a. Nokdango maiba obosta ong·on kakketko aganpana jakgitelani gri ong·ronga. Mitam me·chikranga sea-pani sasti on·ako chakna nanga. Badiaba nokdango me·asa nokdangna simsakjaode an·tangan me·asani kamko ka·e nokdangko rikna nanga. Mitam me·chikranga nokni skotong me·asa dongjae pring attamna gipino gamnape, dedrangko aldumittange, neng·skime janggi tanga. Indake jakgitel gri bilgrigipa me·chikrangko songsalo namen mikchepa. Segri pagri me·chikrangko darangan mande mingja birong chanja. Ia chasongo songsalo ba nokdango janggi tanganio me·chikrangni maiba dakgualaniko a·gilsakna paraka. Indakgipa kam aro bewalrangan me·chikrangko kratcha·aniona galonani namgijagipa bewal ong·a.
Nokdangko rikanio me·chikrang seko pako dakchakgiparang ong·a. Nokdango pilak a·sel obostarangko chagrongon baljrimanirangko chile chakchike nokdangko rikgiparang ong·a. Skango aro ia chasongoba me·chikrang a·songko aro jatko re·dilanio niksenggiparang ong·a. Gam chimonggipa me·asrang aro gamko man·rikgipa me·chikrang ine chasong gitchamo aganbagenchimoba ia chasongode me·chikrangba biltangchi gam chimonggipa, jaktangchi kam ka·e cha·giparang ong·a.
Ia chasongo bang·a me·chikrangan an·tangtangni gisik seng·anichi, changa-sapanichi nokdangko aro songsalko rikenga; mitam jatko niksengatenga. Ia seng·ani chasongo school, college, universityrango aro dingtang dingtang chugipa gadangni kamrango me·chikrangan bang·batgipa aro niksengbatgiparang ong·a inoba gualani dongjawa. Uandakgipa mingnama kamrangko man·oba me·chikranga songsalo mande ra·ako man·na krapajama? Chasongni kri dingtangrikrike ia seng·ani chasongo bida dal·oba, chugipa gadango janggi tangoba, gisik seng·gipa matgipa ong·oba jakgitel gri songsalni niaman uamangko kae donaha.
Adita bilsina skang nokdangsao ong·gipa obostako anga gisik ra·a. Jikgipa toromo aro songsalo niksenge janggi tanggipa ong·oba segipa uko kajia ka·e dokrongachim. Ua segipani sasti on·ako chakchikrongachim. Ua segipachin dakmajoako man·rongachim. Salsao uamang nokdango kajia ong·e segipa nokoni kataha. Segipa nokoni kate dongon me·chikni mama adarang nokdangko namatpilna kam ka·na nangaha. Me·asako nokona rimbapilna mahari dolgni tom·e melaaha. Melaanio nokdangni ong·a obostangko aro me·asani nokoni katani a·selrangko sing·aha. Segipa jinma jatchio chadenge aganengon jikgipani kosako tol·e aganaha. Segipani tol·e aganangkuengon jikgipa ua kattarangko ra·chakna man·jaha. Ua kakketko aganchakna jotton ka·engon mamatang dal·gipa “Jrip knachengbo” ine tap satkapataha. Saksani ja·mano saksa mamatang adatangrang dip dai doktimiloa a·ao gitile nom·angaiaha. Aiao! Ang’ gisikde chaknapjaha. Katta matchotgija doktimilon melaanio so·sojengjeng ong·aiaha. Kakketko aganpana chol gri, be·en aro gisikni gita jakgitelani gri ua bilgrie ga·akaha. Me·asani dos chu·gimik ong·oba mama adarang nokdangko namatpilna me·chikon dosko galgope donaiaha. Uni nitogipa, ka·dingsmitkamaigipa mikkang da·o rongdimelaha. Segipani kakket ong·gijanio kratcha·a mikgil siaona galonako man·aha. Mama adani sasonni bilchi gisik aro be·eno saknaaha.
Nokdangko namatna kam ka·aniara mama adarangani bilan ong·a; indiba uamang basakoba bilko badee jakkala. Noa-namchikko sason ka·anio uamangni janggi tangani gadang chona dal·a nichenggija biltangkosan jakkale doke-sate sason ka·a. Nokdango jikse kajia ong·anio sakgnian dos ong·oba me·chikosan dosko galgope donronga. Songsalo janggi tanganio indakgipa kamrangchiba me·chikrangko galonronga. Basakoba bilko badee jakkalanichi doknang satnangjaode sina bon·na nangode an·tangon nangpilgen, noa-namchikni nokdangsa gimagen, dedrangsa branggen. “Katta ma·gitcham Niam songgitcham” ina chasong gitchamo mama adarang noa-namchiko sko sote mangakimataia ina. Indiba ia chasong gitalo ua niamrangko ja·rikode ra·chakna man·gijani ong·a.
Uni gimin, chasongni kri, ra·chakna man·gijagipa dakbewalrangko gale, mama-adarang noa-namchikko aro sea-pa jikdeko kraa bewalo mande ra·e sason ka·aniara nama. Mikkangchi nokdangko man·riknasienggiparang aro jatni dakbewalrangko ripingnasienggiparang me·chikrangan ong·a. Uni gimin, bilgrigipa me·chikrangko dakchakna, ka·sina kattarangchi, nama kam aro bewalchi ra·dona; angni ma·a ine mande ra·na.
Chimik | Vol 6, No 111 | Nov-Dec, 2023